Soçi görüşü ərəfəsində birgə Rusiya-Ermənistan təlimlərinin zərurəti nə idi?
Rusiya və Ermənistan hərbi qüvvələri 24-25 noyabr tarixində birgə hərbi təlim keçirib. Bu barədə Ermənistan Müdafiə Nazirliyi məlumat yayıb. Bildirilib ki, Ermənistanda hərbi hissələr yüksək döyüş hazırlığı vəziyyətinə gətirilib, şəxsi heyət əvvəlcədən müəyyən edilmiş ərazilərdə dislokasiya olunub. Komanda və müşahidə məntəqələri yerləşdirilib. Təlimlər aviasiya və tank bölmələrinin iştirakı ilə baş tutub. Qeyd edək ki, Ermənistan ordusunun, xüsusilə sərhəddə 1 nömrəli döyüş hazırlığı vəziyyətinə gətirilməsini bəzi ekspertlər Soçi görüşü öncəsi mümkün təxribata hazırlıq kimi qiymətləndirib.
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Azərbaycan Prezidenti İlham Əliyevlə Ermənistanın Baş naziri Nikol Paşinyanın dekabrın 15-də Brüsseldə görüşəcəyi barədə məlumatlar yayıldığı bir vaxtda erməni mənbələri rəsmi İrəvanın sərhədə qoşun yığması barədə xəbərlər tirajlayırdı: “Həmin vaxtdan Ermənistan Azərbaycanla sərhədə əlavə hərbi qüvvələr göndərməyə başlayıb. Kəlbəcər və Laçin istiqamətində hərbi qüvvələrin sayının artırılması, əlavə texnikaların cəlb edilməsini sərhəddə yaşayan erməni əhalisi də təsdiqləyir. Bunun ardınca Soçi görüşünün keçirilməsi təsdiqləndi. Əlbəttə, belə bir məqamda Ermənistanın sərhədə əlavə qoşun yığmasını 16 noyabr döyüşlərində xeyli itki verməsi ilə də əlaqələndirmək olar. Yəni güman etmək olardı ki, rəsmi İrəvanın bu addımı müdafiə xətlərini gücləndirmək məqsədi daşıyır.
Lakin erməni mənbələrini izləyərkən Ermənistanın bu addımı ilə yeni təxribatlara hazırlaşdığı aydın olur. Son döyüşlərdən öncə də erməni tərəfi sərhədə əlavə qüvvə cəlb etmişdi. Döyüşlərdən sonra isə Azərbaycana qarşı təxribat xarakterli bir neçə addım atmağa cəhdlər edildi. İndi də görüşə bir gün qalmış birgə hərbi təlimin keçirilməsi Azərbaycana təzyiq mahiyyəti daşıyır. Gərək ki, görüşə vasitəçilik edən Rusiya neytrallığını qoruyardı. Bu məsələdə isə açıq tərəf kimi çıxış edir. Narahat olmağa dəyməz. Əsas strateji yüksəkliklərə Azərbaycan Orudusu nəzarət edir. Yəni üstünlük Azərbaycandadır. məqsəd diplomatik görüşlərin əhəmiyyətini azaltmaqdır. Danışıqlar prosesi üçün yeni "yol xəritəsi”nın müəyyənləşəcəyi də istisna edilmir. Ermənistanın görüşqabağı sərhəddə yeni təxribatlara əl ataraq vəziyyəti gərginləşdirmək istəyi belə düşünməyə əsas verir ki, İrəvan məsələnin danışıqlar yolu ilə həllində maraqlı deyil”.
Məhəmmədəli QƏRİBLİ
