Prezident İlham Əliyev Azərbaycan Televiziyasına müsahibəsində Avropa İttifaqının Ermənistana 2,6 milyard avro, Gürcüstana 2,3 milyard avro vəsait ayırmasına, Azərbaycana isə heç bir vəsait ayrılmamasına münasibət bildirib.
Prezident bu mövqeyi ədalətsiz adlandıraraq deyib: “Azərbaycana gəldikdə, 150 milyon avro rəqəmi səsləndirildi, amma konkret bizə deyilmədi bu, nə rəqəmdir və nə vaxt veriləcək, verilməyəcək, bunun şərtləri nədir? Əlbəttə, mən hesab edirəm ki, bu, ədalətsiz mövqedir. Çünki Azərbaycan Cənubi Qafqazın ən böyük ölkəsidir həm ərazisi, həm əhalisi, həm də potensialı baxımından. Bu günə qədər Cənubi Qafqaz ölkələrinə belə böyük məbləğdə vəsait verilmirdi. Yəni bu, onu göstərir ki, bu vəsait məhz müharibədən sonra verilir. Yəni, bu vəsaitin verilməsinin səbəbi müharibədir. Əks təqdirdə, 30 il bundan əvvəl verəydilər, niyə məhz indi verirlər? Əgər belədirsə, onda müharibədən ən çox əziyyət çəkən ölkə Azərbaycandır. Azərbaycana bu vəsait verilməlidir”.
Azərbaycan Prezidenti qeyd edib ki, 10 min kvadratkilometr ərazi tamamilə dağıdılıb, erməni vandalları tərəfindən məhv edilib. 100 minlərlə mina döşənilib və bütün binalar, tarixi binalar, bütün infrastruktur məhv edilib: “Amma pulu verirlər Ermənistana. Ermənistanda bir dağıntı var? Yoxdur. Mina döşəmişik orada? Yox. Bu qədər işğaldan əziyyət çəkən ölkə olub? Yox. Əlbəttə bu, ədalətsizdir. Bu məsələ ilə də bağlı əlbəttə, fikir mübadiləsi oldu. Cavab elə oldu ki, Azərbaycana elə bil ki, vəsait lazım deyil. Birincisi, bizə heç kim təklif etməyib, bizə təklif edin, mən deyərəm, bizə lazımdır, yoxsa yox. Amma bizə heç kim təklif etmədiyi halda deyirlər ki, Azərbaycana vəsait lazım deyil. Bəs azad edilmiş torpaqları biz bərpa edəsi deyilik? Milyardlarla dollar vəsait lazımdır, o, göydən düşür? Azərbaycan şəffaf bir ölkədir. Maliyyə resursları da bəllidir. Bəli, biz özümüzü təmin edən ölkəyik. Amma əgər bizə də Ermənistan kimi qrant olaraq vəsait verilsə, biz heç vaxt imtina etmərik”.
Avropa İttifaqının bu açıq ədalətsizliyini nə ilə izah etmək olar və Azərbaycan bunun fonunda qurumla gələcək əməkdaşlığına hansısa korrektələr etməlidirmi?
Politoloq Rəşad Bayramov “Bakı-Xəbər”ə açıqlamasında bildirdi ki, bu suala ən dolğun cavabı elə Prezidentin özü çıxışında verib: “Bəli, Avropa Birliyi bu məsələdə olduqca ciddi haqsızlığa yol verib. Azərbaycan hər iki Qafqaz ölkəsindən böyükdür. Əhalisinin sayı da çoxdur. Yardım regional amil üzrə olunursa, onda niyə biz kənarda qalırıq? Əgər Prezidentin dediyi kimi, müharibə faktoru əsas götürülübsə, onda niyə bizə yardım edilmir? Müharibədən daha çox ziyanı biz görmüşük. Əgər ölkələrin maddi vəziyyətləri analiz edilərək bu qərara gəlibsə, bu da məntiqi deyil. Çünki Azərbaycanın hazırda işğaldan azad edilən ərazilərdə quruculuq işlərinə, qaçqınların yerləşdirilməsinə, ərazilərin minalardan təmizlənməsinə ehtiyacı var. Bütün bunlar üçün də külli miqdarda pul lazımdır. Əgər söhbət humanitar addımdan gedirsə, ən böyük humanizm bizə vəsaitin ayrılması olardı. Ancaq mənim fikirimcə burada daha başqa maraqlar nəzərə çarpır. Avropa Birliyi bununla faktiki olaraq Ermənistanı satın alır. Çünki həmin kiçik ölkə üçün bu çox böyük vəsaitdir. Şarl Mişelin regiona səfəri çərçivəsində Ermənistanda keçirdiyi görüşlərin nəticəsi Ermənistanın Rusiyaya növbəti xəyanətidir. Paşinyan qərbyönlü mövqeyinə uyğun olaraq, Qərb dairələri ilə işbirliyini inkişaf etdirir. Ermənistanın NATO, Avropa İttifaqı və digər təsisatlarla ardıcıl təmasları bunu təsdiq edir. Avropa İttifaqının Ermənistana 2.6 milyard avroluq yardım paketinin ayrılacağının elan olunması o deməkdir ki, Avropa İttifaqı Ermənistanda ciddi layihələr həyata keçirməyi hədəfləyir.
Paşinyanın bu demarşı Rusiya üçün arzuolunmazdır. Şarl Mişel fransalıdır və Emmanuel Makronla eyni ideoloji platformadan çıxış edən şəxsdir. Moskvanın Yerevana ardıcıl dəstəyinə baxmayaraq, rəsmi Yerevan Qərbə doğru irəliləməkdə davam edir. Bütün bunlara baxmayaraq, Aİ Azərbaycana qarşı ciddi ayrıseçkiliyə yol verib. Hesab edirəm ki, bu addım Azərbaycanın Aİ ilə qurduğu səmimi və ardıcıl münasibətlərin ruhuna adekvat deyil. Belə olacağı halda, Azərbaycan mütləq qurumla münasibətlərində korrektələr etməlidir”.
Məhəmmədəli QƏRİBLİ
