24/11/2020 13:43
728 x 90

Rusiya mediası Ermənistanda yeni lider axtarışında - "müqayisədə Paşinyandan məsləhətlisi yoxdur"

Ramil Hüseynov: “...Ermənistanda vətəndaş qarşıdurmasını istəmir”

img

Rusiyanın “Kommersant” nəşri yazır ki, Ermənistanın bu gün ən böyük faciəsi müharibədə uduzması deyil, ölkəni bu vəziyyətdən çıxara biləcək liderin olmamasıdır.

Sözügedən məsələ ilə bağlı qeyd edilir ki, 10 noyabrda Paşinyan sülh anlaşmasına imza atmaqla Ermənistanın məğlubiyyətini rəsmən təsdiqlədi. İndi çoxları Azərbaycanla bağlanan təslimçilik müqaviləsinə görə Paşinyanı lənətləyir. Amma bu adamlar yanılırlar. Paşinyan Ermənistanı gözlənilən bir çox bəladan xilas etdi: “Ermənistanın bu gün ən böyük faciəsi müharibədə uduzması deyil, ölkəni bu vəziyyətdən çıxara biləcək liderin olmamasıdır. Nikol Paşinyan pisdir, anladıq. Bəs yaxşı kimdir? Moskvanın ortaq dil tapdığı keçmiş prezidentlər Robert Köçəryan və Serj Sarkisyan indiki halda doğru seçim deyil. Erməni cəmiyyəti üçün onlar korrupsiya ilə güclü əlaqədə olan siyasətçilər kimi yadda qalıblar. Və ədalət naminə deməliyik ki, Ermənistan ordusunun deqradasiyası, düşmənindən keyfiyyətcə geri qalması Paşinyanın yox, məhz bu adamların günahıdır”.

Bununla belə, qeyd edilir ki, hazırkı vəziyyətdə Paşinyanın istefası Ermənistan üçün məqbul sayılmır: “Müharibəni davam etdirəcəyini və itirilmiş torpaqları geri alacağını vəd edən populistlərin hakimiyyətə gəlməsinə icazə verilməməlidir. Bu, Ermənistanı daha böyük fəlakətlərə sürükləyə bilər”.

O da məlumdur ki, Rusiya mətbuatı hər zaman Paşinyana qarşı olub və onun yeritdiyi siyasəti tənqid edib. Rusiya istəyib ki, Kremlin maraqlarını əsas götürən qüvvələr hakimiyyətdə olsun. Belə olan halda, maraqlıdır, Rusiyanın Paşinyana indi bir qədər fərqli münasibət bildirməsi nə ilə bağlıdır?

  • “Moskva üçün uyğun zəmin hərtərəfli formalaşan kimi o devriləcək”

Məsələyə münasibət bildirən siyasi ekspert Ramil Hüseynov bunu bir sıra amillərlə əlaqələndirdi: “Əvvəla Rusiya mətbuatı ölkə hakimiyyətinin maraqlarını ifadə edir. Təsadüfi deyil ki, ölkənin bütün media orqanları hakimiyyətin təbliğat siyasətini həyata keçirmək üzərində köklənb. Kreml yaxşı bilir ki, Ermənistanda cəmiyyət əvvəlki kimi Rusiyapərəst qüvvələri dəstəkləmir. Baxmayaraq ki, Ermənistan Avrasiya İttifaqında, KTMT-də təmsil olunur. Ölkə iqtisadiyyatında Rusiyanın təsir imkanları böyükdür. Ancaq bütün bunlar yetərli olmayıb. Belə olmasaydı, o zaman Paşinyan “rəngli inqilab” dalğasında hakimiyyətə gələ bilməzdi. Ermənilər ölkənin iqtisadi inkişafını Qərblə sıx əlaqələrdə görürlər. Bunda erməni lobbisinin rolu böyükdür. Düzdür, Ermənistanda Rusiyanın maraqlarından çıxış edən siyasi qüvvələr var, amma onlar çox zəf elektorata malikdirlər. Yəni tərəfdarları azdır. Rusiya ona görə Azərbaycan Ordusu tərəfindən Xankəndinin azad olunmasına imkan vermədi ki, Ermənistanı birdəfəlik itirməsin. Ancaq çətin ki, bu nəisə dəyişsin. Çünki ermənilər 30 ilə yaxın Qarabağı işğal altında saxlasalar da, de-yure olaraq əraziləri özününküləşdirə bilmədilər. Əksinə, bu, Ermənistana siyasi, iqtisadi-sosial problemlər gətirdi. İndi də elə bir imkan yoxdur ki, Rusiya Köçəryan kimisini şişirdib “qəhrəman” etsin. 90-cı illərdə bunu edə bildilər və Qarabağda səhra komandirlərini Ermənistanda hakimiyyətə gətirdilər. Tutaq ki, Köçəryanı yenidən prezident etsələr, o, əvvəlki reallığı bərpa edə bilməyəcək. Ən azından ona görə ki, Azərbaycan çox güclənib. İndiki vəziyyət 90-cı illərdəki vəziyyət deyil. Belə görünür ki, hazırkı vəziyyətdə Rusiya Paşinyanı devirib Ermənistanda vətəndaş qarşıdurmasını istəmir. Nə də olmasa, Ermənistan Rusiyanın müttəfiqidir. O üzdən, hələlik Kreml Paşinyana münasibətdə bir qədər loyallaşıb. Ancaq bu daimi olmayacaq”.

Siyasi ekspert hesab edir ki, Moskva üçün uyğun zəmin hərtərəfli formalaşan kimi, Paşinyan devriləcək.

Vidadi ORDAHALLI

Son xəbərlər