07/07/2020 00:18
728 x 90

Azərbaycanda korrupsiya ilə mübarizə mexanizminin dəqiq təyinatı - sistem xarakterli institusional...

img

Prezident İlham Əliyev iyunun 3-də Ağcabədidə “ASAN Həyat” kompleksinin açılışı zamanı ASAN könüllüləri ilə görüşündə ölkəmizdə korrupsiya ilə bağlı görülən tədbirlərdən danışıb və bildirib ki, “ASAN xidmət”in timsalında bizim müasir yanaşmamız görünür:

“Onu görürük və sübut edirik ki, korrupsiya ilə, rüşvətxorluqla nəinki mübarizə aparmaq mümkündür, uğur qazanmaq mümkündür. Biz bütün vasitələrdən istifadə edirik. Əlbəttə, hesab edirəm ki, burada əsas rol sistem xarakterli tədbirlərdir. Çünki artıq “ASAN xidmət”in timsalında görürük ki, burada bu mümkündür. Ona görə, bu sistem xarakterli institusional tədbirlərlə biz korrupsiyanın, kölgə iqtisadiyyatının meydanını daraldırıq. Ancaq bununla yanaşı, inzibati tədbirlər və cəza tədbirləri görülür və görüləcək”.

Prezident İlham Əliyev bildirib ki, Azərbaycan ictimaiyyəti bu məsələ ilə bağlı məlumatlandırılır:“Deyə bilərəm ki, mənim ünvanıma gələn minlərlə məktubda korrupsiya, rüşvətxorluqla bağlı bizim mübarizə çox yüksək qiymətə layiq görülür. Vətəndaşlar bunu təqdir edir, bəyənir və biz görürük ki, yerlərdən artıq siqnallar gəlməyə başlayır. Mən bir daha demək istəyirəm ki, mütləq ictimai nəzarət olmalıdır. Məmur özbaşınalığı ilə bağlı hər bir siqnal araşdırılacaq. Təbii ki, bu siqnallar ədalətli olmalıdır. Burada da hansısa qarayaxma kampaniyasına yol vermək olmaz və kortəbii yanaşmaq olmaz. Hər bir siqnal ciddi araşdırılacaq. Çünki istisna deyil ki, kimsə yalandan ortalığa bir məlumat ata bilər, kiminsə kimdənsə xoşu gəlmir, onun haqqında nəsə yaza bilər, belə hallar da var. Ona görə, ilk növbədə ədalət və ictimai nəzarət təmin edilməlidir. Əminəm ki, biz korrupsiyaya və rüşvətxorluğa qarşı mübarizədə də qalib gələcəyik. Təsadüfi deyil ki, Ümumdünya Səhiyyə Təşkilatı pandemiya ilə mübarizə sayəsində görülmüş işlərə yüksək qiymət verərək Azərbaycanı nümunəvi ölkə adlandırıb. Bəlkə də başqa ölkələr haqqında oxşar fikirlər səsləndirilib, amma mən eşitməmişəm. Azərbaycana gəldikdə, Ümumdünya Səhiyyə Təşkilatı, o təşkilat ki, dünya miqyasında bütün səhiyyə sahəsində işlərə rəhbərlik edir və işləri koordinasiya edir, Azərbaycanı nümunəvi ölkə adlandırıb”.

Göründüyü kimi, ölkə başçısı Azərbaycanda korrupsiya ilə mübarizə mexanizminin  dəqiq təyinatı sxemindən danışıb və  sistem xarakterli institusional tədbirlərin zəruriliyini bildirib. Bu mexanizm özündə nəyi ehtiva edir?

Hüquqşunas Mehman Muradlı “Bakı-Xəbər”ə açıqlamasında bildirdi ki, korrupsiya bəşəri bir bəladır və onunla mübarizədə ən effektiv vasitələrdən istifadə edilir: “Bu amil dünyanın bütün ölkələrində var. Onunla mübarizə ölkəmizdə çox aktiv şəkildə aparılır. Təbiidir ki, burada sistemli mübarizə lazımdır. Sistemli, institusional mübarizə deyəndə, biz bir sıra ardıcıllğı gözləməliyik. Ölkədə bununla bağlı möhkəm və ali səviyyədə siyasi iradə var. Çünki bu bəlanın kökünün kəsilməsində Prezident daha çox maraqlıdır. Bu məsələdə yerlərdən, sadə xalqdan ölkə başçısına ciddi dəstək var. Ölkəmizdə korrupsiya ilə mübarizə aparmaq üçün lazımi hüquqi qanunvericilik bazası mövcuddur. Yeni yaradılan texnoloji  imakanların tətbiqi də bu istiqamətdə öz faydasını verir. Xüsusilə də bir sıra xidmət sahələrinin elektronlaşması korrupsiya ilə mübarizə üçün effektli vasitə sayılır. Maarifləndirmə də lazımi səviyyədə gedir. Bunlardan nəticə çıxarmayanlarla bağlı isə sərt cəza tədbirləri görülür, həbslər həyata keçirilir”.

Ekspertin sözlərinə görə, bu yaxınlarda Strasburqda Avropa Şurasının antikorrupsiya monitorinq orqanı – Korrupsiyaya Qarşı Dövlətlər Qrupunun 2019-cu ildə fəaliyyətini əks etdirən hesabatın təqdimatı keçirilib:”Hesabat parlament üzvləri, hakimlər və prokurorların fəaliyyətində korrupsiyanın qarşısının alınması məsələlərini əhatə edir. Hesabata əsasən, Azərbaycan Respublikası tövsiyələri 61,9 faiz icra edib. Ölkəmiz bu göstərici üzrə Avropa Şurasına üzv 50 ölkə arasında 7-ci yerdə, MDB ölkələri arasında isə 1-ci yerdədir.

Prezident İlham Əliyevin sərəncamları ilə korrupsiyaya qarşı mübarizəyə dair milli strategiya və fəaliyyət planları qəbul olunub, bu sahədə yeni strateji baxışlar və hədəflər müəyyən edilib. Bu strategiyanın icrasına uyğun olaraq həyata keçirilən institusional və qanunvericilik islahatları, yaradılan elektron hökumət infrastrukturu, vətəndaş cəmiyyəti ilə qurulan sıx əməkdaşlıq və geniş maarifləndirmə tədbirləri antikorrupsiya siyasətinin təzahürləridir.

Dövlət xidmətlərinin göstərilməsində korrupsiya hallarını tam istisna edən “ASAN xidmət” modeli beynəlxalq səviyyədə ən yaxşı təcrübə kimi qəbul edilir. Azərbaycan Prezidentinin təşəbbüsü ilə yaradılan və Azərbaycan brendi olan “ASAN xidmət” bir sıra dövlətlər tərəfindən öyrənilir və tətbiq edilir”.

Məhəmmədəli QƏRİBLİ

Son xəbərlər