Azərbaycanın xalq artisti, görkəmli aktyor və rejissor Ramiz Əzizbəylinin səhhətinin kəskin pisləşməsi, qayğı və çətinliklər içində olması barədə elektron KİV-lərdə davamlı olaraq məlumatlar yayılır. İddialara görə, R.Əzizbəyliyə Azərbaycan Mədəniyyət və Turizm Nazirliyi tərəfindən heç bir kömək göstərilmir, onun müraciətlərinə cavab verilmir.
Deyilənlərin nə qədər həqiqəti əks etdirdiyini araşdırmaq məqsədilə xalq artisti Ramiz Əzizbəyli ilə əlaqə saxladıq. R.Əzizbəyli "Bakı-Xəbər"ə açıqlamasında adından mətbuatda yer alan açıqlamaların əsassız olduğunu bildirdi: "Yazılanlar məni çox əsəbləşdirir. Mədəniyyət Nazirliyi də, Azərbaycan dövləti mənə hər zaman dayaq olub, bu gün də dayaq durur. Yazılanların heç bir əsası yoxdur, bu, həqiqəti əks etdirmir. Mənim adımdan yazılan narazılıq dolu fikirlərin hamısını təkzib edirəm, yalan yazmasınlar. Düzdür, səhhətimdə problem var, iflicəm, amma danışıram, fikrimi açıq ifadə edə bilirəm. Yaxşıyam, özümü pis hiss etmirəm. Dövlət mənim üçün nə lazımdırsa edib. İki dəfə ev verib, Prezident təqaüdü alıram. Şükür Allaha, heç bir çətinliyim yoxdur. Mənə göstərdiyi qayğıya görə Mədəniyyət və Turizm Nazirliyinə, dövlətimə böyük minnətdarlığımı bildirirəm. Xahiş edirəm ki, bunu yazasınız. Qadasın alım dövlətimin, hökumətimin. Bakıda evdəyəm. İflic məni işimdən uzaq saldı. Təqaüddəyəm. Kinoda sonuncu işim "Yalan" filmi oldu".
Qeyd edək ki, Ramiz Əzizbəyli Azərbaycan kino rejissoru və aktyoru, Azərbaycanın xalq artisti, professor, Azərbaycan Dövlət Mədəniyyət və İncəsənət Universitetinin estrada və musiqili teatr rejissorluğu kafedrasının müdiri, "Hacı Zeynalabdin Tağıyev" və "Qızıl Buta" mükafatları laureatı, müğənni, ssenari müəllifi, təcrübəçi rejissor, film səsləndirən kimi mədəniyyət tariximizdə xüsusi yer tutur.
Sənətkar 1987-ci ildə "Debüt" studiyasında çəkdiyi "Pirverdinin xoruzu" qısametrajlı bədii filmi ilə rejissorluq fəaliyyətinə başlayıb. Film bir neçə beynəlxalq kinofestivalda müvəffəqiyyətlə iştirak edib, Kiyev şəhərində keçirilən Ümumittifaq festivalda isə rejissor debütünə görə mükafata layiq görülüb. 1991-ci ildə isə "Bəxt üzüyü" tammetrajlı bədii filmini çəkib. Film kinoteatrlarda nümayiş olunan ən baxımlı kassa filmi və yeni tariximizdə çəkilən ilk ən gəlirli kino işi kimi yadda qalıb. Film Daşkənddə keçirilən Asiya və Latın Amerikası ölkələrinin kinofestivalında xüsusi diploma layiq görülüb. Rejissoru olduğu "Yalan" bədii filmi isə Qarabağ probleminə, onun törətdiyi faciələrə həsr edilib. Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın əməkdar artisti, 1 avqust 2008-ci ildə isə Azərbaycanın xalq artisti fəxri adlarına layiq görülüb.
Böyük sənətkarımıza uca Yaradandan can sağlığı arzu edirik. Çünki onun kinoda görüləcək saysız işləri var...
İradə SARIYEVA
