Rüfət Quliyev: "Ölkəmiz xarici investorlar üçün daha cəlbedici görünür"
Xəbər verildiyi kimi, bəzi investorlar vergidən azad edilib. İnvestisiya layihələrini "Tik-idarə et-təhvil ver" modelinə uyğun həyata keçirən investorları dövlət rüsumunu ödəməkdən azad edən qanun qüvvəyə minib. Azərbaycan Respublikasının Prezidenti İlham Əliyev "Dövlət rüsumu haqqında" Qanunda dəyişiklik edilməsi barədə" 2016-cı il 14 oktyabr tarixli Qanunun tətbiqi haqqında Sərəncam imzalayıb. Sözügedən qanunun 3.3-cü maddəsinə əsasən, investisiya layihələrini "Tik-idarə et-təhvil ver" modelinə uyğun həyata keçirən investorlar "Tikinti və infrastruktur obyektləri ilə əlaqədar investisiya layihələrinin xüsusi maliyyələşmə əsasında həyata keçirilməsi haqqında" Qanuna əsasən, dövlət rüsumlarını ödəməkdən azaddır.
Maraqlıdır, investorların vergidən azad olunması iqtisadiyyata nə kimi təsir göstərəcək? İnvestisiya layihələrinin "Tik-idarə et-təhvil ver" modelinə uyğun həyata keçirilməsi tikinti sektorunun yenidən fəallaşmasına təsir göstərə bilərmi?
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev "Bakı-Xəbər"ə açıqlamasında qeyd etdi ki, investorların vergidən azad olunması ölkə iqtisadiyyatına müsbət təsir edəcək: "Xarici investorlar üçün Azərbaycan daha əlverişli ölkədir. Çünki ölkədə siyasi-iqtisadi sabitlik hökm sürür. Xarici investorlara da elə məhz belə ölkə sərf edir. Ölkəmiz xarici investorlar üçün daha cəlbedici görünür".
Həmsöhbətimiz ümid edir ki, xarici investorlar tək maliyyə sahəsinə deyil, eyni zamanda, İKT sahəsinə də investisiya ayıracaq.
İnvestisiya layihələrini "Tik-idarə et-təhvil ver" modelinə uyğun həyata keçirən investorları dövlət rüsumunu ödəməkdən azad edən qanunun qüvvəyə minməsinə gəlincə, millət vəkili qeyd etdi ki, bu addım iqtisadiyyatda inkişafa səbəb olacaq: "İqtisadçı alim olaraq deyirəm ki, bütün dünya iqtisadiyyatının inkişafının təməli tikinti bumundan başlayır. İstənilən ölkənin iqtisadiyyatının inkişafı tikintidən asılıdır. Hansı ölkədə tikinti ləngiyirsə və ya dayandırılıbsa, deməli, həmin ölkənin iqtisadiyyatı böhrana uğramaq ərəfəsindədir. Tikinti bumu başlayan ölkənin iqtisadiyyatı çiçəklənir. Ümumiyyətlə, iqtisadiyyatda inkişaf tikintidən asılıdır. İnvestisiya layihələrini "Tik-idarə et-təhvil ver" modelinə uyğun həyata keçirən investorların dövlət rüsumunu ödəməkdən azad olunması iqtisadiyyatın inkişafına ikiqat təsir göstərəcək. Qanunun qüvvəyə minməsi Azərbaycan iqtisadiyyatının inkişafına səbəb olacaq. Ölkədə yenidən tikinti bumu yaşanacaq".
Günel CƏLİLOVA
