Bu günlərdə Şimali Kipr Türk Cümhuriyyətinin ev sahibliyi etdiyi “Türk dünyasının gənc gücü: Bir millət, üç dövlət vizyonu” mövzusunda konfrans keçirilib. Sözügedən tədbirə Yeni Azərbaycan Partiyasından, Türkiyənin Ədalət və İnkişaf Partiyasından və Şimali Kipr Türk Cümhuriyyətinin Ulusal Birlik Partiyasından olan gənclər qatılıb.
Ekspertlər hesab edir ki, bu qəbildən olan tədbirlər mühüm önəmə malikdir və onun əhəmiyyəti təkcə ölkə sərhədləri ilə məhdudlaşmır. Eyni zamanda bu, gənclərin tarixi köklərinə bağlılığının gücləndirilməsi baxımından da vacib önəm kəsb edir.
Milli köklərə güclü bağlılıq
Perspektivdə bu kimi tədbirlər Türk dünyasında əməkdaşlığın dərinləşdirilməsinə də öz töhfəsini verir. Gənclər arasında belə tədbirlərlə səmərəli fikir mübadiləsinin aparılması artıq bütün türk dünyasında qəbul edilir. Burada nəzərə alınması vacib bir hal həm də odur ki, indi dünyada təhlükəli kosmopolit ideyalar geniş yayılmaqda davam edir. Təcrübə göstərir ki, onlar ilk baxışdan zərərsiz görünsə də, arxasında böyük təhlükələr duru. Hətta belə təəssürat yaranır ki, bu ideologiyalar elə bil müxtəlif ölkələrdə, dövlətlərdə insanları, əsasən də gəncliyi öz milli köklərindən ayırmaq üçün ərsəyə gətriilib. Belə şəraitdə gələcəyimizi təmin edəcək gənclərin öz milli kimliyindən ayrılmasının qarşsının alıması ön planda gəlir.
Texnologiyanın insanları bir neçə saniyə ərzində qitələri və mədəniyyətləri birləşdirdiyi bildiyi qloballaşan dünyada milli kimlik məsələsi bir çox gənc üçün uzaq və hətta əhəmiyyətsiz görünə bilər. Bununla belə, öz milli köklərinə güclü bağlılıq şəxsi kimliyin, birliyin və mədəniyyətin qorunmasının mühüm elementi olaraq qalır. İstənilən xalqın gəncliyi üçün öz irsini dərk etmək və dəyərləndirmək sadəcə keçmişə hörmət etmək məsələsi deyil, bu, mənalı və əsaslı gələcəyi formalaşdırmaq üçün güclü bir yoldur. İstənilən xalqın, millətin təşəkkül tapmasında onun gənclərinin necə tərbiyə aldığı, vətənpərvər olduğu, milli-mənəvi dəyərlərə bağlılığı böyük önəm kəsb edir. Azərbaycan bu mənada uğur nümunəsi yarada bilib. Məsələn, faktdır ki, 44 günlük Vətən müharibəsi Azərbaycan gəncinin necə vətənpərvər, torpağına bağlı olduğunu bir daha dünyaya əyani şəkildə göstərdi. Heç vaxt Qarabağı görməyən gənclərimiz Ali Baş Komandanın əmri ilə şücaət göstərdilər. Onlar canları, qanları ilə bu torpağın hər qarışının müqəddəs olduğunu, onların həyatı bahasına başa gəlsə də torpaqdan vaz keçməyəcəklərini nümayiş etdirdilər. qeyd edək ki, prezident İlham Əliyev bu il mayın 10-da Ağdam rayonunun Kəngərli kəndinə köçən sakinlərlə görüşüb, onlara evlərin açarlarını təqdim edərkən etdiyi çıxışında bu xüsusda bir daha maraqlı məqamlara toxunub. Burada müəllimlərə xitabən prezident bildirib: “Sizin kimi müəllimlər igid gənclər yetişdirmisiniz. O gənclər ki, gedib sinələrini qabağa verib torpaqlarımızı düşməndən azad etdilər. Bu, tarixi hadisədir və bugünkü dünyada gedən prosesləri hər birimiz izləyirik... Bizim tarixi Zəfərimiz artıq dünyada bir möcüzə kimi qəbul edilir... Bax, mən bunu sizə açıq deyirəm. Hər birimizin payı var. Əlbəttə, Ali Baş Komandan, bütün əməliyyatlara və bütün işlərə rəhbərlik edən şəxs kimi mənim payım da var, təbii olaraq, amma hər birimizin. Çünki xalq arxamda durmasaydı, əgər müharibə dövründə hər hansı bir tərəddüd hiss olunsaydı, yaxud da ki, cəmiyyətdə hər hansı bir fikir ayrılığı olsaydı, bu Qələbəni belə şəraitdə, belə ağır vəziyyətdə qazanmaq mümkün olmazdı. Şəhidlər dəfn olunurdu, şəhidlərin anaları, ataları, yaxınları deyirdilər ki, dayanma. Bilirsiniz bu nədir?! Xalqımız böyük xalqdır. Biz haqlı olaraq xalqımızla fəxr edirik, sizinlə fəxr edirik”. Həqiqətən də Azərbaycan gənci müasir olsa da, savadlı, ağıllı formada inkişaf edir, onlarla birlikdə əsas dəyəri olan milli vətənpərvərlik ruhunun yüksək olduğunu göstərir.
Gənclər Azərbaycan mədəniyyətini dünyada uğurla təbliğ edirlər
Təbii ki, Milli köklər coğrafiyadan daha çoxunu əhatə edir. Onlar kollektiv tarixi, ortaq dəyərləri, ənənəvi adətləri, dili, keçmiş nəsillərin mübarizə və zəfərlərini təmsil edir. Gənclərdə bu elementləri tanımaq və qəbul etmək güclü şəxsiyyət hissini gücləndirir. Bu, özünüdərk və özünə inam yaratmaq üçün bir təməl yaradır.
Bir çox hallarda insanın öz milli köklərinə dərin bağlılığı qürur və aidiyyət hissi aşılayır. İstər ənənələri öyrənməklə, istər ana dilində danışmaqla, istərsə də xalqın tarixini öyrənməklə gənclər özləri və dünyadakı yerləri haqqında daha bütöv bir fikir formalaşdırırlar. Bu köklülük şəxsiyyət böhranlarının və psixi sağlamlıq problemlərinin artdığı bir dövrdə xüsusilə vacibdir. Mədəni qürur və tarixi şüur gəncin inkişafında sabitləşdirici qüvvə kimi çıxış edir. Dünya bir-birinə daha çox bağlı olduqda, mədəni homogenləşmə riski artır. Dillər yox olur, adət-ənənələr sönür və yerli adətlər çox vaxt qlobal tendensiyaların kölgəsində qalır. Müxtəlifliyi və beynəlxalq əməkdaşlığı əhatə etmək vacib olsa da, bu, unikal milli kimliklərin silinməsi bahasına başa gəlməməlidir. Gənclər öz irsinin gələcək nəsillər üçün qorunub saxlanmasında mühüm rol oynayırlar. Bu fonda Azərbaycanda mədəniyyət məhsulu və xidmətlərinin gənclər üçün daha cəlbedici olması, gənclərin mədəni tədbirlərdə iştiraka təşviq edilməsi cəmiyyətin inkişafı üçün çox vacibdir. Gənc nəsli ölkədəki mədəni proseslərdə iştiraka stimullaşdırmaq onlarda incəsənəti duymaq, qiymətləndirmək, sevmək və bədii dəyərlər yaratmaq qabiliyyətini formalaşdırır. Bu, həm də Azərbaycanın dünyada təbliğində böyük önəm kəsb edir. O səbəbdən gənclərin cəlb edildiyi mədəni tədbirlərə də xüsusi diqqət olunmalıdır. Bu mənada Müstəqillik Gününə həsr olunmuş “Azərbaycanım” Beynəlxalq VIII Uşaq və Gənc Rəsm Festivalı qeyd edilənlərə əyani nümunə kimi göstərilə bilər. Qeyd edəkki, festival “Azərbaycan səni sevirəm!” şüarı və “Mənim gözlərimlə Azərbaycan!” mövzusuna həsr olunacaq. Tədbir çərçivəsində elan olunan beynəlxalq müsabiqəyə Azərbaycanla yanaşı, ABŞ, Belarus, İran, Türkiyə, Qazaxıstan, Rusiya, Çin, Peru, Hindistan və Myanmadan olmaqla 2 minə yaxın 8-21 yaş arası yeniyetmə və gənc qatılıb. Sərgilərdə 900-ə yaxın rəsm əsəri nümayiş olunub və bu əsərlərin müəlliflərinə sertifikatlar təqdim edilib. Əcnəbi iştirakçılar tərəfindən elektron poçt vasitəsilə göndərilən əsərlər çap edilərək çərçivədə sərgilənib, müəlliflərinə diplom və sertifikatlar göndərilib. Tədbirin əsas məqsədi Azərbaycanın uşaqlar və gənclər tərəfindən necə görüldüyünü əks etdirmək, milli mədəniyyətin təbliği, eləcə də yerli və xarici iştirakçılar arasında mədəni mübadiləni təşviq etməkdir. Belə tədbirlərin sayının artırırlması vacib hesab olunur. Gənclər milli mədəniyyətləri ilə öz irsinin idarəçiləri kimi çıxış edirlər. Onlar müasirlik qarşısında keçmişin dəyərlərinin və dərslərinin itirilməməsini təmin edirlər. Bununla da onlar dünyanı müxtəliflik və perspektivlə zənginləşdirərək qlobal mədəniyyət mozaikasına töhfə verirlər.
Samirə SƏFƏROVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
