12/12/2019 10:16
728 x 90

Paşinyanın Avropa və ABŞ-la inteqrasiya layihəsi iflasla bitdi - Avrasiya Birliyindən “yaxşısı yox imiş”...

Əli Orucov: “İqtisadiyyatı və siyasəti birbaşa Rusiyaya bağlı olan bir forpost dövlətin Avropa Birliyinə problemlərdən başqa verə biləcəyi heç nəyi yoxdur”

img

“Avrasiya İttifaqı bizim üçün çox vacibdir”. Bunu Ermənistan Baş naziri Nikol Paşinyan amerikalı jurnalistin “Ermənistan Avropa Birliyinə qatılmaq istəyirmi?” sualını cavablandırarkən deyib. Onun sözlərinə görə, Avropa Birliyinə üzv olmaq Ermənistan üçün prioritet məsələ deyil: “Mən belə düşünmürəm, ona görə ki, biz hazırda Avrasiya İttifaqının üzvüyük. Biz öz münasibətlərimizi bu təşkilatda inkişaf etdirməyə hazırlaşırıq. Bu, iqtisadi ittifaqdır və o bizim üçün vacibdir. Ona görə də hələ gündəmimizdə belə məsələ yoxdur”.

Ermənistanda Nikol Paşinyan hakimiyyətə təzə gələndə Qərbin ondan müəyyən gözləntiləri var idi. Gözləntilər əsasən Ermənistanın Avropa qurumlarına inteqrasiya istiqamətində səylərini artıracağı ilə bağlı idi. İlk vaxtlar Paşinyan bu yöndə müəyyən siyasi reveranslar etdi. Avropa təsisatlarından pul qoparmaqdan ötrü üstüörtülü vədlər verdi, bir sıra ölkələrə səfərlər etdi. Ancaq onun bu yöndə səyləri nəticəsiz bitdi. Çünki Qərb ondan islahatlar həyata keçirməyi və konkret mövqe ortaya qoymağı tələb etdi. O isə bunların heç birini həyata keçirmədi. Əksinə, Rusiya ilə daha da yaxınlaşmaq yolunu tutdu. O baxımdan Paşinyanın məlum açıqlaması göstərdi ki, Ermənistanın Qərblə inteqrasiya layihələri iflasa uğradı.

Maraqlıdır, Paşinyanın məlum yanaşması Qərbdən ona olan etimadın daha da azalmasına səbəb ola bilərmi?

  • “Paşinyan məlum açıqlaması ilə bəyan etdi ki, Qərbin bu yöndə gözləntiləri reallaşmayacaq”

Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucov bunu istisna etmədi: “Əvvəla onu demək istərdim ki, Ermənistan Avropa Birliyinə daxil olmaq və yaxud da quruma inteqrasiya olunmaq üçün gərəkən şərtlərə cavab vermir. Ermənistanın bütün sahələri Rusiyadan birbaşa asılıdır. İqtisadiyyatı və siyasəti birbaşa Rusiyaya bağlı olan bir forpost dövlətin Avropa Birliyinə problemlərdən başqa verə biləcəyi heç nəyi yoxdur. Paşinyana sualı verən jurnalist də, görünür, naşıdır və Cənubi Qafqaz regionunu, o cümlədən də Ermənistanı yaxşı tanımır. İkincisi, Qərb onsuz da Paşinyandan müsbət nəticələr gözləmirdi. Siyasi dairələr Moskvadan asılılığını nəzərə alaraq Baş nazirin üzərinə o qədər də getmirlər. Həm Ermənistan rəhbərliyi, həm də Qərb yaxşı başa düşür ki, xarici siyasətdə kardinal dəyişiklik etmək ölkədə ciddi fəsadlara yol açacaq. Bu, Rusiyanın bir subyektinin Qərbə inteqrasiyası kimi bir şey olardı ki, bu da nəzəri və praktik baxımdan mümkün deyil. Qərb üçün vacib ölkələrdən biri də Ukraynadır. Ancaq Ukraynanın Avropaya inteqrasiyasına, AB-yə üzv olmasına ehtiyatla yanaşırlar. Ermənistan isə nə geopolitik, nə iqtisadi resursları, nə də investisiya baxımından Qərb üçün cəlbedici ölkə deyil. Qərb Ermənistana qarşı yumşaq siyasət yürütməklə bu ölkəni Moskvanın nəzarətindən çıxarmağı hədəfləyir. Qərbin özünün də Ermənistanın Avropa Birliyinə üzv olmasına indiki şəraitdə marağı yoxdur. Ermənilər belə yollarla özlərinin vacibliyini, əhəmiyyətini gözə soxmağa çalışırlar. Bu isə siyasi blefdir. Bütün hallarda, Paşinyan məlum açıqlaması ilə bəyan etdi ki, Qərbin bu yöndə gözləntiləri reallaşmayacaq”.

Vidadi ORDAHALLI 

Son xəbərlər