Əli Orucov: “ABŞ-ın timsalında müşahidə edilən fəallıq dolayı olaraq sülh prosesinə töhvə verməyi nəzərdə tutur”
ABŞ Senatının Beynəlxalq əlaqələr komitəsinin üzvü, senator Stiv Deynsin fikrincə, Bakı ilə İrəvan arasında sülh sazişinin imzalanması Cənubi Qafqaz regionunda sabitliyin və rifahın əsas təminatçısı olacaq. Belə ki, senator Stiv Deyns Ermənistanın Baş naziri Nikol Paşinyanla görüş keçirib.
Görüş zamanı regional təhlükəsizlik məsələləri və Ermənistan iqtisadiyyatına investisiya perspektivləri müzakirə olunub. Senator ABŞ-da Donald Tramp administrasiyasının Ermənistan və Azərbaycan arasında sülh sazişinin zəruriliyi ilə bağlı mövqeyini dəstəklədiyini bildirib.
Məlum olduğu kimi, senator Stiv Deyns bundan əvvəl Bakıda səfərdə olub, Prezident İlham Əliyevlə görüşüb. Daha sonra o, İrəvana səfər edərək Paşinyanla görüşüb. Bundan əvvəl Donald Trampın şəxsi nümayəndəsi Stiv Uitkoffun Bakıda olması barədə məlumatlar yayıldı. Düzdür bu, rəsmi səviyyədə təsdiq olunmadı, amma inkar da edilmədi. Belə görünür ki, Vaşinqton sülh sazişi ilə bağlı praktiki hərəkətə keçib.
“Hiss olunur ki, sülh sazişi müqabilində Vaşinqton Ermənistana investisiya vəd edib”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, son vaxtlar Tramp administrasiyasının timsalında sülh sazişi ilə bağlı fəallaşma hiss edilir: “Düzdü, bu, əvvəlki vasitəçilik formasında deyil. Yəni ATƏT-in Minsk qrupunun üzvü statusunda ABŞ tərəflər arasında vasitəçilik etmir. Ən azından ona görə ki, Azərbaycanın Minsk qrupuna qarşı olan haqlı mövqeyi məlumdur. Üstəlik, Azərbaycan vasitəçi olmadan Ermənistanla danışıqlara önəm verir və təcrübə də bunun doğru olduğunu sübut etdi. Azərbaycanla Ermənistan arasında bir sıra məsələlər birbaşa təmaslar hesabına həll edildi. Sülh sazişinin bəndləri razılaşdırıldı, delimitasiya işlərinə start verildi və s. O cümlədən, Bakı vasitəçilər olmadan sülh sazişinin imzalanmasında qərarlıdır. ABŞ-ın timsalında müşahidə edilən fəallıq dolayı olaraq sülh prosesinə töhvə verməyi nəzərdə tutur. Vaşinqton bir sıra faktorlara görə, tərəflər arasında sülh sazişinin imzalanmasında maraqlıdır. Birincisi, Orta Asiyaya maraq getdikcə artır. Qərb istəmir ki, həmin region və oranın zəngin resursları Çinlə Rusiyanın təsir dairəsində olsun. İkincisi, Orta Asiyanı Avropa ilə birləşdirən ən qısa, optimal və etibarlı yol Azərbaycanın timsalında Cənubi Qafqazdan keçir. Üçüncüsü, Rusiyanın başı Ukrayna müharibəsinə qarışdığı üçün sülh sazişi üçün fürsətdir. ABŞ yaxşı bilir ki, Ukraynada müharibə bitsə və yaxud da Rusiya hansısa üstünlük əldə etsə, Moskva tərəflər arasında sülhə imkan verməyəcək. Çünki Rusiyaya sülh yox, qarşıdurma lazımdır ki, regionu nəzarətində saxlasın. Hiss olunur ki, sülh sazişi müqabilində Vaşinqton Ermənistana investisiya vəd edib. Senator Deynsin İrəvanda investisiya ilə bağlı açıqlaması təsadüfü deyil. Çünki Azərbaycandan fərqli olaraq Ermənistan xarici investisiyaya möhtacdır. Ola bilər ki, Azərbaycana işğaldan azad edilən ərazilərin bərpası ilə bağlı söz verilib. Bu isə 907-ci düzəliş ləğv edilmədən mümkün deyil”.
Vidadi ORDAHALLI
