Bəhruz Quliyev: “Bu bəyanat bir mesaj deyil, xəbərdarlıqdır”
Prezident İlham Əliyev Laçın şəhərində 28 May – Müstəqillik Gününə həsr edilmiş konsertdən əvvəl çıxışı zamanı deyib ki, Azərbaycan, Türkiyə və Pakistan arasında üçtərəfli hərbi əməkdaşlıq geniş coğrafiyada sabitliyi gücləndirir:
“Müdafiə sahəsində əməkdaşlıq tərəfdaşlığımızın önəmli istiqamətlərindən biridir. Birgə hərbi təlimlər və hərbi-texniki sahədə layihələr silahlı qüvvələrimizin potensialını gücləndirib. Bizim hərbi əməkdaşlığımız geniş coğrafiyada sülhü və sabitliyi gücləndirir”.
“Yəni bölgədə sülh istəyənlər üçün ümid, təxribat istəyənlər üçün isə ciddi siqnaldır”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev buna bir neçə aspektdən yanaşdı: “Laçında, azad edilmiş torpaqlarımızın qürur zirvəsində baş tutan Azərbaycan–Türkiyə–Pakistan prezidentlərinin üçtərəfli görüşü sadəcə diplomatik hadisə deyil, yeni geosiyasi düzənin göstəricisidir. Məhz 28 May – Müstəqillik Günündə Laçında keçirilən bu yüksək səviyyəli görüş İlham Əliyevin siyasi iradəsinin və strategiyasının ifadəsidir. Prezident İlham Əliyev tədbirdəki çıxışında bir daha vurğuladı ki, Azərbaycan, Türkiyə və Pakistan arasında hərbi əməkdaşlıq yalnız üç dövlətin təhlükəsizlik maraqlarına xidmət etmir, eyni zamanda daha geniş bir coğrafiyada – Qafqazdan Orta Asiyaya, Yaxın Şərqdən Hind okeanı hövzəsinə qədər sülh və sabitliyin əsas dayağına çevrilir. Bu bəyanat bir mesaj deyil, bir xəbərdarlıqdır. Yəni bölgədə sülh istəyənlər üçün ümid, təxribat istəyənlər üçün isə ciddi siqnaldır. “Müdafiə sahəsində əməkdaşlıq tərəfdaşlığımızın önəmli istiqamətlərindən biridir. Birgə hərbi təlimlər və hərbi-texniki sahədə layihələr silahlı qüvvələrimizin potensialını gücləndirib,” – deyə Prezidentin vurğuladığı bu cümlə təkcə təhlükəsizlik konsepsiyası deyil, həm də strateji həmrəyliyin dövlətlər səviyyəsində təsdiqidir. Belə deyək ki, bu ittifaq dostluq və qardaşlıqdan əlavə, həm də ortaq gələcək üçün ortaq məsuliyyət daşımağın rəsmi bəyannaməsidir. Türkiyə ilə imzalanmış Şuşa Bəyannaməsi, Pakistanla formalaşan sarsılmaz siyasi etimad platforması bu üçlüyü yalnız diplomatik cəbhədə deyil, hərbi və texnoloji sahələrdə də yaxınlaşdırır. Bu gün Laçın zirvəsi həm də Azərbaycanın öz torpaqlarında suverenliyini tam bərpa etdiyini və artıq bölgənin aktoruna, qurucusuna çevrildiyini bütün dünyaya nümayiş etdirdi. Tarixə nəzər salsaq görərik ki, keçmişdə bölgənin taleyi yad mərkəzlərdə həll olunurdusa, bu gün Laçında, Şuşada, Bakıda yeni reallıqların konturları çəkilir. Bu reallıqların əsasını isə düzgün siyasət, güclü ordu, müstəqil dövlət və beynəlxalq dəstək təşkil edir. Bu dəstəklər arasında Pakistan və Türkiyə kimi əzəli dostların xüsusi çəkisi və mənəvi dayaq funksiyası vardır. Bu baxımdan hesab edirəm ki, Laçın Zirvəsi Azərbaycanın diplomatik və strateji zəfəridir. Bu, həm də Azərbaycanın regionda sülh, əməkdaşlıq və inkişaf yolunda liderlik missiyasının daha bir sübutudur. Və bu yolun başında cənab İlham Əliyev kimi siyasi uzaqgörən liderin dayanması xalqımız üçün böyük fəxr və güvən mənbəyidir”.
Vidadi ORDAHALLI
