Sahil Kərimli: “İşğal dövründə Ermənistanın bizim ərazilərdə istehkamlar qurmasına Rusiya özü dəstək verib, bu istiqamətdə yaxından iştirak edib”
Ermənistanın işğal etdiyi Azərbaycan rayonlarında tikdiyi istehkamların xarakteri bu əraziləri uzun müddət nəzarət altında saxlamaq niyyətindən xəbər verirdi. Bunu İrəvanda işgüzar səfərdə olan Rusiyanın xarici işlər naziri Sergey Lavrov jurnalistlərin suallarını cavablandırarkən deyib.
Lavrov analitiklərin qiymətləndirmələrinə istinad edərək bildirib ki, Ermənistanın işğalı altında olan Azərbaycanın yeddi rayonunda mühəndis istehkamları bu əraziləri qaytarmaq niyyətinin olmadığını göstərirdi: “Rusiya silahlarından Ermənistanın heç vaxt rəsmi olaraq iddia etmədiyi yeddi mübahisəsiz Azərbaycan rayonunu işğal etmək üçün istifadə edilib. Orada istehkamlar və döyüş xətləri yaradılıb, bu da açıq şəkildə göstərirdi ki, həmin mövqeləri çox uzun müddət əldə saxlamaq planı var idi”.
Lavrov bu sözləri zamanında niyə demirdi ki, Ermənistan bu torpaqları heç vaxt tərk etməmək üçün istehkam qururdu? Niyə indi deyir?
“Rusiya da artıq Azərbaycanın yaratdığı yeni reallıqlarla barışmaq məcburiyyətində qaldı”
Siyasi ekspert Sahil Kərimli “Bakı-Xəbər”ə bildirdi ki, Rusiyanın xarici işlər naziri S.Lavrovun İrəvana səfəri və səfər çərçivəsində səsləndirdiyi bəyanatlar ilk növbədə Azərbaycanın Cənubi Qafqazda yaratdığı yeni reallıqlardan irəli gəlir: “Eyni zamanda Azərbaycanın bölgəmizdəki xüsusi çəkisindən və gücündən, tutduğu mövqedən qaynaqlanan məsələdir. Çünki işğal dövründə Rusiya daim Ermənistanı müxtəlif yollarla dəstəkləyirdi, işğalçı ölkənin silahlandırılmasında yaxından iştirak edirdi, bütün istiqamətlərdə siyasi dəstək verirdi. Hətta biz bu münasibətlərin Ermənistanla Rusiya arasında müttəfiqlik səviyyəsində olduğunu müşahidə edirdik. Lakin 44 günlük Vətən müharibəsində Azərbaycanın tarixi qələbəsindən və lokal antiterror tədbirlərindən, ölkəmizin ərazi bütövlüyünün, suverenliyinin tam bərpa edilməsindən sonra Rusiya da artıq Azərbaycanın yaratdığı yeni reallıqlarla barışmaq məcburiyyətində qaldı. Bu gün biz Lavrovun bu bəyanatının mövcud reallıqlardan irəli gəldiyini görürük.
Bəli, vaxtilə Rusiya Ermənistanı silahlandırırdı, ona ciddi dəstək verirdi, dolayısı ilə işğalın ömrünü uzatmağa çalışırdı. Ancaq biz indi Rusiyanın bunu etiraf etməsinin şahidi oluruq. Rusiya etiraf edir ki, Ermənistan Rusiya silahları ilə Azərbaycan ərazilərini işğal edib və uzun illər işğalda saxlayıb, Azərbaycanın ərazisində istehkamlar qurub. Təbii ki, işğal dövründə Ermənistanın bizim ərazilərdə istehkamlar qurmasına Rusiya özü dəstək verib, bu istiqamətdə yaxından iştirak edib. Amma bu gün proseslər tam fərqlidir, Azərbaycan öz gücü, hərbi arsenalının qüdrətilə böyük geosiyasi dəyişikliklər edib. Təbiidir ki, bu gün Rusiya artıq Cənubi Qafqaz siyasətinə də dəyişikliklər etmək məcburiyyətində qalıb. Amma məsələdə bir detalı xüsusi vurğulamalıyıq, Lavrov qeyd edir ki, Ermənistan Azərbaycanın 7 rayonunu qaytarmaq istəmirdi, istehkamlar qururdu. Biz burda Lavrovun yenə də səhvə yol verdiyini görürük. Çünki Ermənistan Azərbaycanın təkcə 7 rayonunu yox, digər rayonlarını da uzun illər işğal altında saxlayıb. Rusiya dəfələrlə 7 rayon dedikdə nəyi nəzərdə tutur? Təbii ki, bu anlaşılan deyil. Azərbaycanın digər bölgələri də, Qarabağın digər əraziləri də uzun illər Ermənistan tərəfindən işğalda saxlanılıb.
Biz bu gün Azərbaycanın bütün istiqamətlərdə qətiyyətli siyasətinin şahidi oluruq”.
S.Kərimlinin fikrincə, təbiidir ki, Lavrovun Ermənistana səfərinin bir çox pərdəarxası məqamları da var, çünki Azərbaycanla Ermənistan arasında sülh danışıqları prosesinin yubanması, uzanması, burda Ermənistan və onu dəstəkəyən qüvvələr tərəfindən süni maneələrin yaradılması da böyük təəssüf doğurur. “Görünən odur ki, Rusiya Ermənistan üzərində öz nüfuzunu, öz təsir imkanlarını, rıçaqlarını saxlamaq üçün bu gün bu cür səfərlər təşkil edir. Lavrovun Ermənistana səfəri çərçivəsində, heç şübhəsiz ki, Ermənistanın əldə və təsir altında saxlanılması cəhdləri də olub. Düşünürəm ki, bundan sonra da Rusiya bu istiqamətdə öz siyasətini birmənalı şəkildə davam etdirəcək. Burda son dövlərdə Ermənistanın Qərbmeylli siyasət yürütməsi, Qərbə üz tutması, Avropa İttifaqı ilə yaxınlığı, ABŞ-la yaxınlığa cəhd göstərməsi və Rusiyaya arxa çevirməsi niyyətləri də açıq-aydın görünür. Şübhəsiz ki, Lavrovun Ermənistana səfəri çərçivəsində bu məsələlər də əsas müzakirə mövzularından biri olacaqdır. Ermənistanın Qərbdən uzaqlaşdırılması, Avropa İttifaqına yaxınlaşmasının qarşısının alınması, Rusiya ilə əvvəki münasibətlərin bərpa olunması məsələsi də Rusiya tərəfindən əsas prioritet məsələ hesab olunur.
Hesab edirəm ki, Lavrov artıq reallıqlarını çılpaq şəkildə etiraf edib və işğal dövründə Rusiyanın Ermənistana birbaşa dəstək göstərdiyini dilə gətirib” - deyə S.Kərimli vurğuladı.
İradə SARIYEVA
