Əkrəm Həsənov: “Hindistanla Azərbaycan arasında iqtisadi əlaqələr elə də strateji əhəmiyyətli deyil”
Hindistanın qiymətli daşlar və zərgərlik sahəsini təmsil edən "Bütün Hindistan Qiymətli Daşlar və Zərgərlik Daxili Şurası" (GJC) sahə nümayəndələrinə Türkiyə və Azərbaycanla biznes əlaqələrini dayandırmaq çağırışı edib. Bu barədə Hindistanın "The Hindu" nəşri məlumat yayıb.
Məlumatda qeyd edilir ki, bu sərt addım Pahalgamda baş vermiş terror aktı nəticəsində 26 hindistanlı mülki vətəndaşın həlak olmasından sonra Türkiyənin Pakistana verdiyi açıq dəstəyə cavab olaraq atılıb: “Türkiyənin bu mövqeyi ölkəmizin milli təhlükəsizliyi və etik ticarət prinsipləri ilə bağlı ciddi narahatlıqlar yaradıb. Qiymətli daşlar və zərgərlik sektoru olaraq biz ölkəmizin yanındayıq və bütün zərgərləri Türkiyə və Azərbaycanla ticarəti dərhal dayandırmağa çağırırıq. Biz bu addımla həmrəyliyimizi və qərarlılığımızı nümayiş etdiririk. Bu, həm də bizim sahənin milli qürurumuzun dayaqlarından biri olduğunu göstərir”.
Görəsən, Hindistanın Azərbaycana və Türkiyəyə qarşı yeni sanksiyası hansı nəticəni verə bilər və bu addıma cavab olaraq ölkəmizdə təşkil olunan Hindistan günlərinə və sərgisinə qadağa qoyula bilərmi?
“Gündəlik tələbatda Hindistan malları, demək olar ki, yoxdur, Hindistanın Azərbaycana sanksiya tətbiq etməsi önəmli deyil”
Iqtisadçı Əkrəm Həsənov “Bakı-Xəbər”ə şərhində bildirdi ki, Hindistanla Azərbaycan arasında iqtisadi əlaqələr elə də strateji əhəmiyyətli deyil: “Qiymətli daşlar Hindistandan deyil, başqa yerdən də idxal oluna bilər. Etiraf edək ki, gündəlik tələbatda Hindistan malları, demək olar ki, yoxdur. Hindistanın Azərbaycana sanksiya tətbiq etməsi önəmli deyil. Məlum məsələdə ölkəmizin mövqeyi düzgündür. Xatırladaq ki, Pakistan hər zaman bizə dəstək olub, Hindistan isə əksinə. O da bəllidir ki, üç dövlət - Pakistan, Türkiyə və Səudiyyə Ərəbistanı Azərbaycanın yanında olub, Ermənistanla əlaqəsini kəsib. Bu ölkələr sözdə yox, əməldə Azərbaycanın yanında olub”.
Ekspert hesab edir ki, Hindistanın bu qərarı Türkiyəyə daha çox təsir edəcək: “Türkiyə kütləvi şəkildə ixracla məşğul olur. Bu qadağa Türkiyə iqtisadiyyatı, o cümlədən zərgərlik məmulatlarının istehsalı və ixracatına ciddi təsir göstərə bilər”.
Günel CƏLİLOVA
