Arzuxan Əlizadə: “Nikol çıxışında ad çəkməsə də işarəni Rusiyaya edir”
Ermənistanın Baş naziri Nikol Paşinyan BMT Baş Assambleyasında çıxış edib. Belə ki, Paşinyan 20 dəqiqəlik çıxışında əsasən Ermənistanın Azərbaycanla münasibətlərindən danışıb.
Paşinyan iddia edib ki, Azərbaycandan Ermənistana yeni təcavüz təhdidi azalmayıb. O, rəsmi Bakının Ermənistanda yeni ərazilər ələ keçirmək niyyətində olduğunu iddia edib. Sülh sazişindən danışan Paşinyan bir daha qeyd edib ki, Azərbaycanın ərazi bütövlüyünü tanımağa hazırdır. Ancaq bir şərtlə ki, Bakı da Ermənistanı beynəlxalq səviyyədə qəbul edilmiş sərhədləri çərçivəsində tanısın. Bu dəfə diqqəti çəkən məqam o oldu ki, Paşinyan çıxışında təkcə Azərbaycanı deyil, onun müttəfiqlərini də tənqid edib, amma ad çəkməyə cəsarət etmədi. Onun sözlərinə görə, regional təhlükəsizlik təşkilatları gərəkən reaksiyanı vermədiyi üçün vəziyyət kəskinləşə bilər: “Bu vəziyyət erməni cəmiyyətində çoxsaylı suallar yaratdı. Ötən ilin mayında Azərbaycan 40 kvadrat kilometrdən çox ərazini işğal etdi. Onda Azərbaycan bunu onunla əsaslandırdı ki, guya Ermənistan delimitasiya komissiyası yaratmaqdan imtina edir. Biz imtina etmirdik, yalnız təkid edirdik ki, onunla yanaşı sərhədin təhlükəsizliyi mexanizmi də işə salınsın. Nəhayət beynəlxalq müttəfiqlərimizin xahişi ilə biz işə başlamağa razılaşdıq. Onlar elə sərhəd komissiyasının işinin sərhəd təhlükəsizliyi üçün etibarlı faktor olacağını deyirdilər. İndi komissiya yaradılıb və işləyir, Azərbaycan isə təcavüzün yeni mərhələsini başladıb, bu beynəlxalq müttəfiqlərin bəziləri isə susurlar”.
Görünən odur ki, Azərbaycana gen-bol iftira atan Paşinyan müttəfiqləri barədə bir kəlmə belə danışmağa cürət etmədi.
Məsələyə münasibət bildirən AMİP sədri Arzuxan Əlizadənin fikrincə, Paşinyanın müttəfiqləri ilə bağlı məyusedici açıqlamaları bir sıra səbəblərdən irəli gəlir: “Ermənistan tərəfi hələ 2021-ci ilin mayında Azərbaycanla sərhəddə təxribatlar törətməklə qarşıdurmanı beynəlxalq müstəviyə keçirmək istəyirdi. Hesab edirdilər ki, bu minvalla Kollektiv Təhlükəsizlik Müqaviləsi Təşkilatı (KTMT) prosesə müdaxilə edəcək və bir növ Azərbaycanı cəzalandıracaq. Ancaq onların bu cəhdi baş tutmadı. Nəticədə Ermənistanda Rusiyaya yönəlik tənqidlər kəskin formada artdı. Bənzər təxribatlara bu ilin sentyabrın 13-də də əl atdılar. Bu dəfə əvvəlkindən daha çox vay-şüvən saldılar. Fransanın yardımı ilə məsələni BMT Təhlükəsizlik Şurası müstəvisinə çıxardılar. Ancaq bunun da bir faydası olmadı. Yəni, Fransanın təşəbbüsü TŞ-də dəstək qazanmadı. Hətta xarici işlər naziri Ararat Mirzoyan açıq bəyan etdi ki, bir sıra dost dövlətlərdən gözləntiləri özünü doğrultmadı. Paşinyan çıxışında ad çəkməsə də işarəni Rusiyaya edir. Çünki Rusiya hərbi nöqteyi-nəzərdən regionda təmsil olunur. Onları ən çox məyus edən məqam KTMT-nin son toqquşmalara neytral mövqedən yanaşmasıdır. Üstəlik, dünya əvvəlki dövrlərdən fərqli olaraq həqiqəti bildiyi üçün artıq ermənilərin yalanlarına inanmır”.
Partiya sədri onu da əlavə etdi ki, Ermənistan destruktiv mövqe sərgiləməkdə davam etdikcə, beynəlxalq dəstəkdən məhrum olacaq.
Vidadi ORDAHALLI
