Sərhəddə Azərbaycanla üz-üzə dayanan Ermənistan ordusunun tam rəzil vəziyyəti üzə çıxdı
Ermənistan ordusunun Azərbaycan qarşısında duruş gətirməsinin mümkünsüzlüyü bu ölkənin özündə indi daha açıq etiraf edilir. Ermənistanda ona da diqqət çəkilir ki, İkinci Qarabağ müharibəsindən sonra Azərbaycan ordusunu daha da gücləndirib və bu proses uğurla davam etdirilir. Ancaq Ermənistanda tamamilə bunun əksi müşahidə edilir.
Məsələ ilə bağlı “Azatutyun” radiosunun hazırladığı reportajda qeyd edilir ki, Ermənistanın Azərbaycanla sərhəd zonalarında yerləşən hərbi hissələrində də vəziyyət acınacaqlıdır: “44 günlük müharibədən sonra ikinci ildir ki, Ermənistan hakimiyyəti Azərbaycanla sərhədi möhkəmləndirmək, lazımi səngərlər və istehkamlar tikmək iddiasındadır, lakin cəbhə xəttində xidmət edənlərin çoxu bunun əksini iddia edir. Sosial şəbəkələrdə son günlər bununla bağlı çoxlu yazılar yayılıb. Cəbhə xəttində adını açıqlamaq istəməyən əsgərlərdən biri “Azatutyun” radiosuna bildirib ki, mövqelərin düzgün yerləşdirilməsi, məsələn, dəmir-beton istehkamlar çoxlu əsgərin həyatını xilas edə bilər: “Dron aviasiya kimi böyük həcmli mərmiləri daşıya bilməz, onun imkanları çox məhduddur, 10-15 kiloqram partlayıcı ilə məhdudlaşır. Və məsələn, aviasiya bir neçə tona qədər partlayıcı daşıya bilər. Və belə olan halda səngərlər betonlaşdırılıb düzgün qurulubsa, dronların rolu sıfıra enir. Açıq səma altında səngərdə hərbçinin xilas şansı yoxdur. Ermənistanda vəziyyət bu gün belədir”. Bir neçə gün əvvəl Azərbaycanla sərhəddə baş vermiş döyüş əməliyyatlarından sonra internetdə erməni tərəfinin mövqelərinin İkinci Qarabağ müharibəsindən əvvəlki qaydada qaldığına dair videolar yayılıb. Halbuki, bununla bağlı Azərbaycan tərəfi daha sistemli fəaliyyət göstərir . “Azatutyun”a danışan əsgər bu xüsusda bildirir: “Əgər bizim vəziyyətimizdə bu işləri bütün növbətçilik boyu yatmayan və mühəndis işlərini yerinə yetirən növbətçi əsgərlər yerinə yetirirsə, düşmənin vəziyyətində onların yaxşı inkişaf etmiş, yaxşı qurulmuş infrastrukturu var”. “Hayastan” müxalifət parlament fraksiyasının rəhbəri, Ermənistanın keçmiş müdafiə naziri Seyran Ohanyan da bu yaxınlarda bildirib ki, son toqquşmalarda ən çox itki Ermənistan ordusunun sərhəd mövqelərində düzgün təchiz olunmaması ilə bağlıdır: “İndi biz Ermənistan rəhbərliyinə birbaşa sual verə bilərik: niyə asfaltlama işləri aparılır, niyə müxtəlif şərab festivallarına pul xərclənir, niyə Ermənistan daxilində, şəhərlərdə müvafiq tədbirlər keçirilir, amma cəbhə xəttində, səngərlərdə heç bir iş görülmür? Ən azı, şərti düşmənin atəşindən və pilotsuz təyyarələrdən qorunmaq üçün əsgərlər müvafiq qaydada təchiz edilmir”. “Şərəf duyuram” müxalifət fraksiyasının katibi Tiqran Abramyan qeyd edib ki, 44 günlük müharibədən sonra Ermənistan-Azərbaycan sərhədi çox genişlənib. Müxalifətçi deputat iddia edir ki, hökumət yeni sərhədlərdə adekvat müdafiə infrastrukturu yaratmayıb, baxmayaraq ki, bunun üçün onun iki ilə yaxın vaxtı olub: “Baxın, bizim faktiki aqressiyamız olub, təxminən bir gün və ya bir az da çox davam edib. Azərbaycan deyir ki, 8-9 saat döyüş olub, amma gəlin bu müddəti bir gün yarımı götürək. Belə olan halda deyim ki, intensivlik, istifadə olunan vasitələr 2016-cı ilin aprelində baş verən və dörd gün davam edən hərbi əməliyyatlardan xeyli aşağı idi. Amma bir gündə qeydə alınmış insan itkilərini müqayisə etsək, fərq çox böyükdür. Bu həm də onu göstərir ki, cəbhə xətti Azərbaycanın zərbələrinə hazır deyildi və bu çox böyük insan itkilərinə səbəb oldu”.
2016-cı ilin aprelində Qarabağda dörd günlük hərbi əməliyyatlar nəticəsində Ermənistan tərəfi 100-ə yaxın itki verib ki, bu da cari ilin sentyabrında baş verən döyüşlərdəki itkilərdən iki dəfə azdır. Hökumətyönlü deputat, Milli Məclisin Müdafiə və Təhlükəsizlik Məsələləri Daimi Komitəsinin sədr müavini Armen Xaçatryan etiraf edir ki, hələ görüləcək çox iş var, eyni zamanda təkid edir ki, yeni sərhədlər üzərində çox böyük işlər görülüb: “Bəli, məsələn, daha min traktorumuz, daha min ədəd xüsusi texnikamız olsa və bütün bunları çox tez təşkil etsəydik, çox yaxşı olardı. Amma edilənlər bizim imkanlarımız daxilindədir. Bütün texniki imkanlardan istifadə edilir və bəli, bu ordudur, bəzən adi kürək lazım olur. Bu barədə danışmaq kifayətdir. Bütün sərhəd boyu dəmir-beton bunkerlərin tikilməsi bir neçə il çəkəcək. Bir neçə yüz kilometrlik dəmir bunkerləri təsəvvür edə bilərsinizmi? Amma mən bunları deyəcəyəm: dəmir bunkerlərin istehsalı ilə bağlı kifayət qədər böyük işlər görülüb və biz bir çox sahələri dəmir bunkerləri təchiz edib möhkəmləndirmişik. Dəmir bunkerlərin sayını deyə bilmərəm, lakin onların sayı kifayət qədər çoxdur və hazırda tikinti gedir”. 44 günlük müharibədən sonra Ermənistan-Azərbaycan sərhədi artıb. Keçən ilin mayında parlamentdə bu yeni cəbhə xəttinin necə təchiz olunması ilə bağlı sualı cavablandıran Paşinyan əmin etdi ki, mövqelər düzgün qurulur, lakin işlərin çoxu gizlidir”. Beləliklə, radionun bu reportajından görünür ki, Azərbaycanla sərhəddə erməni bölmələrinin vəziyyəti yaxşı deyil. Buna görə də Ermənistan yeni sərhəd təxribatlarına getsə, Azərbaycan ordusu düşmənin müdafiə xətlərini asanlıqla darmadağın edib, qarşı tərəfin dərinliklərinə nüfuz etmək gücündədir.
Tahir TAĞIYEV
