Mayın 22-də "Kəpənəkçi" Xeyriyyə Cəmiyyətinin və Azərbaycan Yazıçılar Birliyinin (AYB) təşkilatçılığı iləşair, yazıçı, jurnalist, tərcüməçi, pedaqoq, siyasi xadim Abbas Abdullanın 85 illik yubileyinə həsr olunmuş tədbir keçirildi.
Milli Məclisin deputatı Aqil Abbas, sabiq xarici işlər naziri Həsən Həsənov, Azərbaycan ədəbiyyatının Türkiyədə yorulmaz təbliğatçısı, şair-tərcüməçi, “Türk ədəbiyyatı" dərgisinin baş redaktoru İmdad Avşar, millət vəkili Fazil Mustafa, Abbas Abdullanın nəvəsi Aişə, professor İzzət Rüstəmov, jurnalist İsmayıl Ömərov, Azad Vətən Partiyasının sədri Akif Nağı, Ukrayna səfirliyinin nümayəndəsi, şair Ziyadxan Budaq, şair Vəli Qaraçaylı, Abbas Abdullanın oğlu Abdulla və nəvəsi Aişə çıxış edərək ustad şairlə bağlı xatirələrini bölüşdülər. Tədbirdə həmçinin xanəndələrin və aşıqların ifaları təqdim olunub. Tədbirdə qeyd olunub ki, bu qədər titulu daşıyan, mənalı bir ömür yaşayan millətin bağrından qopduğunu bir an belə unutmayan Abbas Abdullanın adı da xüsusi hörmət və sevgi ilə anılır. Ustad şair haqqında verilən məlumatda bildirilib ki, 1940-cı ildə Borçalının Kəpənəkçi kəndində dünyaya göz açan, sonra ömrü boyu Bakıda yaşayan, “dünyanın hər yerinə yol Bakıdan başlayır, o dünyaya da”, - deyən Abbas Abdulla harada olursa-olsun – istər Kiyevdə, istər Moskvada, istərsə də İstanbulda, həmişə öz yurdunun, el-obasının, mənsub olduğu xalqın dilinin, ədəbiyyatının, mədəniyyətinin carçısına çevrilmiş, əhatəsində olduğu adamlara dilimizi, adət-ənənələrimizi sevdirməyi bacarmışdır. Abbas Abdulla zəngin yaradıcılıq yolu keçən, istər ədəbiyyatda, istərsə də xalqımızın ictimai-siyasi həyatında özünəməxsus izi olan dəyərli bir ziyalı idi. Uzun illər ədəbi mətbuatda məsul vəzifələrdə çalışmış, Azərbaycanın İstanbuldakı baş konsulu vəzifəsində işləmişdir. Yorulmaz qələm sahibi olan Abbas Abdullaya 1984-cü ildə “Əməkdar mədəniyyət işçisi” fəxri adı verilmiş və həmin il o, Ukraynada Maksim Rılski adına ədəbi mükafata layiq görülmüşdü. 1957-ci ildə “Öyün, Vətənim” adlı ilk şeiri Tiflisdə nəşr edilən “Şərqin şəfəqi” qəzetində çap olunandan sonra Abbas Abdulla şeir-sənət yolunu seçmiş, bu yolda xeyli uğurlar qazanmışdı. Ali filoloji təhsil alan Abbas Abdulla Nizami Gəncəvi adına Ədəbiyyat İnstitutunun aspirantı olmuş, ədəbi əlaqələrlə bağlı tədqiqat işi üzərində işləmiş, Kiyevdə Şevçenko adına Ədəbiyyat İnstitutunda təcrübə keçmişdir. Abbas Abdulla bütün ömrü boyu yaradıcılıqla məşğul olmuş, bir çox tərcümələri, çoxsaylı şeir kitabları - “Ata yurdu”, “Ağlı-qaralı dünya”, “Üzü dan yerinə”, “Sonsuzluğa gedən karvan” və s. nəşr olunmuşdur. “Azərbaycan-Ukrayna ədəbi əlaqələri” elmi monoqrafiyası Abbas müəllimin gərgin elmi axtarışları nəticəsində ərsəyə gələn maraqlı, faktlarla zəngin bir tədqiqat əsəridir. Abbas Abdulla həm də zəhmətkeş, səriştəli bir tərcüməçi idi. O, İ.Draçın “Könlümün harayı”, V.Leqkobitin“Hərə bir şəkil çəkir, İ.Kotlyarevskinin “Natalka Poltavka”, M.Rılskinin “Yanğı”, M.Şapovalın “Son görüş”, T.Şevçenkonun “Fikirlərim, düşüncələrim”, Lesya Ukrainkanın “Su pərisi” kitablarını böyük ustalıqla dilimizə çevirmişdir. Bu kitablarda toplanan şeir və poemalar orijinalda olan əsərlər təsiri bağışlayırdı. Bundan başqa, A.Abdulla Ukrayna şairlərinin şeirlərindən ibarət “Bayraq və günəş ”, “Körpülər” adlı şeir kitablarının da tərcüməçisi idi. Azərbaycan oxucusu məhz A.Abdullanın tərcümələri vasitəsi ilə müasir Ukrayna şairlərinin əsərləri ilə tanış olurdu. Ümumiyyətlə, Azərbaycan - Ukrayna ədəbi əlaqələrinin həm yaranmasında, həm də tədqiqində Abbas Abdullanın müstəsna xidmətləri var idi. Abbas Abdulla şair publisistliliyi ilə yanaşı, həm də ölkəmizin ictimai siyasi həyatında fəal rol oynamış, o, Azərbaycanda Milli azadlıq hərəkatının öncüllərindən biri olmuşdur. Bütün fəaliyyəti boyu müstəqil Azərbaycan dövlətinin yaranması, qurulması və möhkəmlənməsində fədakar əməyi və şəxsi keyfiyyətləri ilə seçilmişdir. O, Azərbaycanın, eləcə də Türkiyənin, Ukraynanın, Gürcüstanın və türk dünyasının şairidir. Azərbaycan xalqına, Azərbaycan dövlətinə xidmət Abbas Abdullanın həyat amal idi. İradə SARIYEVA
