Lənkəranda kütləvi onkoloji xəstə diaqnozları - həbslər var, saxta pensiya təyinatları faş edilir...
Azərbaycanın cənub bölgəsində yaşayan onlarla adam onkoloji xəstə olmadığı halda, bu xəstəliklə təqaüdə çıxarılıb. Bu məsələ ilə əlaqədar xeyli adam həbs olunub.
Həbs olunanlar arasında Lənkəran Rayonlararası Onkoloji Xəstəxanasının baş həkimi Əli Əliyev, bu xəstəxananın həkim-onkoloqları İlyas Səmədov, Muştaba Dədəcanov, xadimə Sələmə Mirzəyeva, Lənkəran Rayonlararası Psixiatriya Xəstəxanasının həkimləri Hüsaməddin Əlicanov və Fərid Məmmədov, Lənkəranın Aşağı Nüvədi və Masallının Xırmandalı kəndlərində yaşayan İsrafil Tağıyev, Musa Əliyev də var.
İttihama görə, Sələmə Mirzəyevanın rəsmi işi xadiməlik olsa da, əslində, kompyuter mütəxəssisi kimi fəaliyyət göstərib. Əlillik dərəcəsi almaq və ya dərəcəni dəyişmək, bu məqsədlə pul vermək istəyən adamları da o tapıb, sənədləri özü hazırlayıb. Söhbət adamlara onkoloji xəstəlikdən əziyyət çəkmələri, onlara təqaüd verilməsi üçün əsas yaradan sənədlərdən gedir.
Psixiatriya Xəstəxanasının həkimləri də belə “müştərilər” tapıb vasitəçilik etməkdə ittiham olunurlar.
Sələmə Mirzəyeva istintaqda əvvəlcə baş həkimin bundan xəbərsiz olduğunu desə də, sonradan Əli Əliyevin əleyhinə ifadə verib. S.Mirzəyevanın sözlərinə görə, pensiya almaq istəyənlərdən təxminən 2-3 min pul, yaxud da o dəyərdə əşya, əmlak (torpaq sahəsi) alıb, gətirib baş həkimə çatdırıb. Baş həkim də pulun əsas hissəsini özü götürüb, hər adama görə 100-200 manat da ona verib. Bu pulun müqabilində əlillik dərəcəsi almaq istəyən şəxs üçün 088 №li forma üzrə saxta göndərişləri kompyuterdə çap edib, Tibbi-Sosial Ekspert Komissiyasına göndəriblər.
Göründüyü kimi, bu işlərin kökündə vətəndaşlara saxta yollarla pensiya düzəltmək niyyətləri durub və həmin əməllər hüquq-mühafizə orqanları tərəfindən ifşa olunub.
Başqa xəstəliklərlə üzrə də qoyulan saxta diaqnozlarla bağlı belə halların qarşısını necə almaq olar?
- Adil Qeybulla: “Həkimlə təqaüd və ya başqa güzəştləri təyin edən qurum arasında vasitəçi təsisat olmamalıdır”
Tibb elmləri doktoru Adil Qeybulla “Bakı-Xəbər”ə bildirdi ki, birinci növbədə müvafiq qurum ləğv edilməlidir: “Saxta pensiyaların düzəldilməsi ilə bağlı son rəyi də həmin qurum verir. Təxminən 25 il bundan öncə, Azərbaycan yeni müstəqilliyə qovuşanda biz həmin qurumlarda yoxlama apardıq. Tibbi komissiyaya mən rəhbərlik edirdim. Orada dəhşətli neqativliklərin şahidi olduq. Dünyanın hər yerində bu məsələ necə həl edilirsə, bizdə də elə olmalıdır. Həkim xəstəyə diaqnozu qoyur, həmin xəstəyə təqaüd düşürsə, elə həmin sənədlə əlaqədar quruma müraciət edir. Həkimin rəyi başqa bir qurum tərəfindən təkrar dəyərləndirilmir. Bütün məsuliyyəti də diaqnozu qoyan həkim daşıyır. Bəs belə ağır diaqnozla xəstə təqaüdə çıxarılırsa, onda qurum hara baxıb? Çünki onkoloji xəstəliklərə elə-belə baxıb diaqnoz qoymurlar. Bu bir sıra mərhələlərdən keçən prosesdir. Orada mütləq psixoloqun da rəyi olmalıdır. Yaxşı olardı ki, həmin sənədlər ictimailəşəydi. Onda daha ətraflı şərh etmək olardı. Burada, mütləq mənada, korporativ maraqlar rol oynayıb. Sistemli dəyişiklik edilməlidir. Həkimlə təqaüd və ya başqa güzəştləri təyin edən qurum arasında vasitəçi təsisat olmamalıdır. Belə olarsa, məsuliyyət dəqiq müəyyənləşər”.
Məhəmmədəli QƏRİBLİ
