“Dövlətin ahıllara bu cür qayğı göstərməsi Azərbaycan insanının sabaha inamını artırır”
Azərbaycan dövlətinin həyata keçirdiyi sosial siyasət cəmiyyətin bütün sferalarını əhatə edir. Prezident İlham Əliyevin “Xüsusi qayğıya ehtiyacı olan uşaqlara və digər şəxslərə göstərilən sosial xidmətlərin genişləndirilməsi üçün əlavə tədbirlər haqqında” bu il iyunun 1-də imzaladığı Sərəncam bu sahədə atılan mühüm addımlardan biridir. Məlum olduğu kimi, Sərəncam sosial xidmətlər sistemində yeni bir istiqamət kimi, ahıllar üçün də günərzi xidmətlərin təşkilinə şərait yaradıb.
Artıq Sərəncamın icrası işləri çərçivəsində Əmək və Əhalinin Sosial Müdafiəsi Nazirliyinin sosial xidmət sifarişləri əsasında ilk mərhələdə 10 rayonda ahıllar üçün günərzi xidmət mərkəzlərinin yaradılması nəzərdə tutulub. Məlumatlara görə, mərkəzlərin 4-ü Bakı şəhərində, 6-sı Sumqayıt, Gəncə, Mingəçevir, Abşeron, Xaçmaz, Lənkəran şəhər və rayonlarında yaradılacaq.
Bu mərkəzlərdə tənha ahıllar yarımstasionar şəkildə, yəni günərzi formasında sosial-məişət xidmətləri ilə təmin olunacaq, onların asudə vaxtlarının mənalı təşkili və s. istiqamətlərdə işlər aparılacaq.
Qeyd edilənə görə, hazırda nazirlik yanında Dövlət Sosial Müdafiə Fondunun pensiya yaşına çatmış şəxslər üçün sosial xidmət müəssisəsi fəaliyyət göstərir. Burada özünəqulluq qabiliyyəti, habelə onlara qulluq və köməklik göstərə biləcək əmək qabiliyyətli qohumları və ya qanuni nümayəndələri olmayan pensiya yaşına çatmış şəxslər daimi dövlət təminatında yaşamaqla, stasionar şəraitdə sosial xidmətlərlə təmin edilirlər.
- Əhməd Qəşəmoğlu: “Azərbaycan dövləti tərəfindən ahıllar üçün də günərzi xidmətlərin təşkilinə şərait yaradılması, bunun üçün xüsusi mərkəzlərin açılması çox müsbət haldır”
Tanınmış sosioloq, professor Əhməd Qəşəmoğlu mövzu ilə bağlı “Bakı-Xəbər”ə bildirdi ki, ahıllara günərzi qayğı mərkəzlərinin yaradılması dövlətin sosial siyasətinin düzgün istiqamətdə qurulmasının nəticəsidir. Ə.Qəşəmoğlu hesab edir ki, ahıl insanlara qayğı və diqqət məsələsi, onların sosial xidmətlərlə təmin edilməsi dövlətin hər zaman diqqətində olub. Ahıllara bu şəkildə qayğı göstərilməsinin Azərbaycan insanının sabaha ümidinin daha da artmasına böyük təkan verdiyini deyən Ə.Qəşəmoğlunun sözlərinə görə, bu gün qayğıya ehtiyacı olan təbəqə sırasında ahıllar öndə dayanır. “Azərbaycan dövləti tərəfindən ahıllar üçün də günərzi xidmətlərin təşkilinə şərait yaradılması, bunun üçün xüsusi mərkəzlərin açılması çox müsbət haldır. Mən bunu sosial xidmət sahəsində atılan addım kimi dəyərləndirirəm. Hesab edirəm ki, bu mərkəzlərin fəaliyyəti normal səviyyədə qurularsa bunun ahıllara çox böyük faydası dəyəcək. Təbii ki, belə xidmət mərkəzlərinin açılmasına böyük ehtiyac var. Çünki hazırkı vəziyyətdə bizim ahılların bir çoxunun günərzi xidmətlərdən istifadə etməsinə ciddi zərurət var. Əvvəla həkimə getmək, müayinə olunmaq, analiz vermək, dərmanlar almaq ahılların çoxunun maddi imkanı xaricindədir. Bu səbəbdən də bir çox ahıl həkimə gedə bilmir, evdə qalır və xəstəliklərini daha da dərinləşdirir. Bu mərkəzlərdə isə ahılların sağlamlıq durumu da nəzarətdə saxlanacaq. Bu mərkəzlərin açılması və burada ahıllara xidmət göstərilməsi məsələsi ictimai rəyin də müsbət mənada formalaşmasına ciddi təsir göstərəcək. İctimaiyyət dövlətin yaşlı nəslə göstərdiyi qayğıdan məmnun qalacaq. Bunun da çox böyük əhəmiyyəti var”.
Ə.Qəşəmoğlu vurğuladı ki, bütün dövlətlərdə yaşlı nəslə münasibət müsbətdir. Bu mərkəzlərin yaradılmasının sosial tərəfi olmaqla yanaşı, mənəvi-tərbiyəvi əhəmiyyəti də olduğunu vurğulayan ekspert hesab edir ki, ölkədə ahıllara göstərilən bu cür münasibət bu sahədə maarifçiliyin genişlənməsinə də səbəb olacaq. “Dövlətin ahıllara bu cür qayğı göstərməsi Azərbaycan insanının sabaha inamını artırır. Bu xidmət mərkəzlərinin yaradılması həm humanist bir addımdır, həm də dövlətin sosial siyasətinin inkişafının göstəricisidir” - deyə Ə.Qəşəmoğlu qeyd etdi ki, bu mərkəzlər ahılların psixoloji cəhətdən qayğı ilə əhatə olunmasına da xidmət edəcək.
İradə SARIYEVA
