25/05/2019 13:47
728 x 90

Valideynlərin hər fakta görə məktəblərə “kameramanlı hücumları” artır...

“Jurnalistləri götürüb zorla içəri girmək, məktəbə hücum çəkmək, mərtəbələri gəzmək, sinif otaqlarına soxulmaq, bu artıq birbaşa qanun pozuntusudur”

img

Bu gün təəssüf ki, bəzi valideynlər tərəfindən məktəbin və müəllimin nüfuzuna xələl gətirən addımların atılmasının şahidi oluruq. Müəyyən valideynlərlə məktəblər arasında müxtəlif qarşıdurmalar, söz-söhbətlər yaşanır. Hətta həmin valdeynlər övladı ilə bağlı baş verən hansısa bir xoşagəlməz hadisəni araşdırmaq, onu məktəbin özü ilə həll etmək əvəzinə, başqa vasitələrə əl atırlar. Valideynlər son zamanlar məktəblilərin intihara cəhd göstərməsinin, eləcə də intihar etməsinin əsas günahkarı kimi məktəbi hədəfə alırlar. Bir qayda olaraq, belə valideynlər iddia edirlər ki, bu halın baş verməsinin bir günahkarı var, o da məktəb və müəllimdir.

Məktəbləri hədəfə alan bəzi valideynlər uşağının müəllim tərəfindən danlanmasına, yaxud ona bildirilən hansısa bir irada görə məktəblərə hücum edir, şagirdlərin gözləri qarşısında müəllimləri, məktəbi, məktəb rəhbərliyini söyür, təhqir edir, onlarla bağlı çox ağır ittihamlar səsləndirirlər. Özü də bütün bu səhnələri kamera vasitəsilə lentə aldırır və sosial şəbəkələrdə yayırlar.

Bu günlərdə paytaxt məktəblərindən birində analoji hadisə baş verib. Hadisənin baş verdiyi məktəbin adı qeyd edilmir. Belə ki, valideyn çox kəskin ittihamlarla özünü jurnalist kimi təqdim edən insanların müşayiəti ilə məktəbə hücum çəkib və burada məktəbin, müəllimin ünvanına ağır ittihamlar, söyüşlər səsləndirib. Həmin valideyn icazəsiz şəkildə içəri daxil olur, bütün mərtəbələri gəzir, otaqları videoya çəkdirir. Valideyn iddia edir ki, onun övladını məktəb intihara cəhd etməyə vadar edib. Məktəbdən isə bildirirlər ki, o uşaq anasına aid dərmanları içərək zəhərlənib, yəni bu məsələnin məktəblə heç bir əlaqəsi yoxdur.

Bəzi valideynlərin məktəblərə kamaremanlı hücumları sosial şəbəkələrdə geniş yayılıb. Qeyd etdiyimiz kimi, müəllim şagirdə bir söz deyəndə bəzi valideynlər məktəblərə hücum çəkir və bu səhnələri də lentə aldırıb yayırlar.

  • Azər Həsrət: “Müəllimin, məktəbin nüfuzunu düşünməsək, hər yerindən duran “müəllim uşağımın üstünə qışqırdı, mən məktəbə hücum edim, video çəkim və bunu sosial mediada yayım” deyəcək”

Əməkdar jurnalist, tanınmış media eksperti Azər Həsrət “Bakı-Xəbər”ə bildirdi ki, həmin videogörüntünü əvvəldən sona qədər izləyib. O qeyd etdi ki, istənilən valideyn övladının qayğısına qalmalı və onun problemləri ilə məşğul olmalıdır, ortada bir problem varsa, valideynin əsəbləşməyə də haqqı var: “Amma jurnalistləri götürüb zorla içəri girmək, məktəbə hücum etmək, mərtəbələri gəzmək, sinif otaqlarına soxulmaq, bu artıq birbaşa qanun pozuntusudur. Üstəlik də məktəbin normal iş rejimini pozmaqdan başqa bir şey deyil. Digər tərəfdən, bu hal pedaqoji cəhətdən də anormaldır. Çünki məktəbdə müəllimlərin, xüsusən də şagirdlərin qarşısında bu cür davranış sərgiləmək olmaz, bu yolverilməzdir. Mənim etirazım, narazılığım bunadır. Qaldı ki, əgər doğrudan da məktəbdə övladı ilə bağlı problem baş veribsə, bunu araşdırmaq valideynin borcudur, haqqıdır. O bunu istərsə məktəb rəhbərliyi ilə araşdıra, istərsə də müvafiq dövlət qurumlarına müraciət edərək bu halın araşdırılmasını tələb edə bilər. Yəni bunun sivil, mədəni, normal yolu budur. Yoxsa ki, sən bir neçə kameralı adamı götürüb birbaşa icazəsiz məktəbə daxil ol, çığır-bağır sal, təhqiramiz ifadələr işlət, bununla da dərs ritmini poz və iddia et ki, məktəb mənim övladımı intihara sürükləyib, bu cür davranış yolverilməzdir. Hər şagirdə müəllim bir söz deyirsə və o uşaq bundan intihara əl atırsa, onda bu o deməkdir ki, ailədə də problem var. Bəyəm ailədə problem olmur? Bu kimi hallarda bəlkə ailəni də araşdıraq. Məsələnin bu cür tərəfləri var”.

A.Həsrət qeyd etdi ki, məktəblər jurnalistlərdən qorxur və onlarla əlaqə yaratmaq istəmir, bu da analoji hadisələrin səhv istiqamətdə mətbuatda yayılması ilə nəticələnir. A.Həsrətin sözlərinə görə, bəzi valideynlərin məktəblərə bu cür hücumları məktəbin, müəllimin nüfuzdan salınmasına xidmət edir. O hesab edir ki, müəllimin, məktəbin nüfuzunu qaldırmaq lazımdır. “Məktəbdə baş verən kiçik bir fakta görə valideynin əli kameralı şəxslərlə məktəbə hücum çəkməsi, məktəbin, dərsin ritmini pozması qətiyyən düzgün deyil. Müəllim uşağa bir söz deyən kimi valideynlər heç bir araşdırma aparmadan, müəllimlə söhbət etmədən, hadisəni araşdırmadan məktəbə hücum edir və məktəbi şagirdlərin gözləri qarşısında ittiham edirlər. Hamımız şagird olmuşuq. Biz evdə gəlib valideynə deməyə qorxurduq ki, müəllim üstümüzə qışqırdı, bizi danladı, küncə qoydu. Desəydik, valideyn deyəcəkdi ki, sənin nə təqsirin olub ki, müəllim bu addımı atıb. İndi isə belə deyil. Valideynlər bu hərəkətlərlə məktəbi şagirdlərin gözündən salır. Məktəbin, müəllimin nüfuzunu qaytarmaq lazımdır. Biz çalışmalıyıq ki, müəllim adına xələl gəlməsin. Müəllim uşağın üstünə niyə qışqırır? Ona görə qışqırır ki, bizim uşaqlar oxusunlar, savadlı olsunlar, cəmiyyətdə normal bir insan kimi öz yerini tutsunlar. Biz müəllimin, məktəbin nüfuzunun qayğısına qalmalıyıq. Müəllimin, məktəbin nüfuzunu düşünməsək, hər yerindən duran “müəllim uşağımın üstünə qışqırdı, mən məktəbə hücum edim, video çəkim və bunu sosial mediada yayım” deyəcək. Biz məktəbin, müəllimin nüfuzunu ayaq altına atmaqla cəmiyyətimizə, Azərbaycana nə qazandırırıq? Bununla məktəbi, müəllimi məhv edirik, bu da gələcəyimiz olan uşaqların sabahının məhv edilməsi deməkdir” - deyə bildirən A.Həsrət qeyd etdi ki, məktəblər və media arasında əlaqələr gücləndirilməlidir. O hesab edir ki, tez-tez məktəblərlə media qurumları arasında görüşlər keçirilməli, bu sahədə maarifçilik işləri aparılmalıdır.

İradə SARIYEVA

Son xəbərlər