“İyirmi il rəhbər vəzifədə mürgüləyənlər, yarım milyona akt zalı təmir edənlər...”

Son dövrlər bəzi kütləvi informasiya vasitələrində ADPU-ya qarşı aparılan qərəzli, məqsədli, bir mənbədən idarə edilən çirkin kampaniya məni təkcə ADPU-nun müəllimi kimi deyil, həm də bir vətəndaş olaraq narahat edir.

Bu mənada istərdim ki, əməkdaşı olduğum universitetə, rektorumuz professor Cəfər Cəfərova ünvanlanan qarayaxmaya münasibət bildirim. Bəri başdan qeyd edim ki, söylədiyim fikirlər sifarişli deyil, hür iradəmin ifadəsidir...

Hər şey 2016-cı ildən başladı...

Səhər tezdən sadə geyimli bir müəllim ADPU-nun əsas girişindən əmin addımlarla universitetə daxil oldu. Ətrafında uzun qalstuklu, hər kəsə nifrətlə baxan, əlahəzrət rəhbəri “mühafizə” edən qorxulu adamlar yox idi...Hər kəs təəccüblənmişdi...Axı  ADPU-nun müəllim və tələbələri uzun illər idi ki,  rəhbərin “ordu” ilə gəzişinə, nadir hallarda görünməsinə alışmışdı...

• Gələn ADPU-nun yeni rektoru, professor Cəfər Cəfərov idi...

Yeni rektorun gəlişi bəziləri üçün bir ümid, kimiləri üçün faciə,biriləri üçün isə fürsət idi..

Professor Cəfər Cəfərovun ADPU-ya təyinatı, elmi işini uğurla müdafiə edib müəllim işləmək istəyən lakin, “adamı” və “pulu” olmayanlar, rüşvətsiz imtahan verib müəllim olmağı arzulayanlar, rektoru görüb ona dərdini demək istəyənlər üçün bir ümid işığı idi...

Həqiqətən də, çox keçmədi ki, ADPU-da müəllim, laborant və digər vəzifələrdə çalışmaq istəyənlərə adalətli şərtlərlə-müsabiqə yolu ilə seçilmək, tələbələrə rüşvətsiz imtahan vermək imkanı yaradıldı.

• Tədrisin keyfiyyətinin yaxşılaşdırılması, idarəçiliyin optimallaşdırılması, elmi mühitin canlandırılması naminə asaslı addımlar atılmağa başlanıldı...

Bütün bunlara rəğmən əli pulla oynayanlar, xalaoğlu baş dispetçerlər, bircə ilə test cavablarını satıb son model maşın alanlar, “yuxarıdan” gəlmiş telefon zənginə görə universitetin koridorları ilə rəhbərin otağına qaça-qaça gedən ahıl dekanlar,  iyirmi il rəhbər vəzifədə mürgüləyənlər,yarım milyona akt zalı təmir edənlər, yüz yaşı olan bir universiteti ailə müəssisəsinə çevirənlər, bankomatik işçilər, ölü canlar, on il test oyunundan millətin gələcəyini məhv edib “qazanan”lar yaza-yaza bitirə bilmədiyim kimsələr üçün isə yeni rəhbərin gəlişi əsil faciə idi..

• İndi onların bir qismi “bəlkə də qaytardılar”, bir qismi də “ötən günlərimi qaytaraydılar, gələn günlərimi qurban verərdim” havasını çalırlar...

Yalanlarınız  o qədər ağdır ki, deməyə söz tapmıram..

Yazırsınız: “Doğrudur, bəzi obyektiv səbəblərlə əlaqədar olaraq universitetdə rüşvət problemi nisbətən həll olunub.Amma bu, heç də rektorun uğru hesab oluna bilməz.Çünki hazırda imtahanlar kompüter vasitəsilə götürüldüyündən,respublikamızın əksər ali təhsil müəssisələrində tələbə-müəllim təmasının qarşısı alınıb.” Üç cümlə qurmusunuz, üçü də köməkçi nitq hissəsi ilə başlayır.Üçü də yanlışdır. Birinci cümləniz ona görə yanlışdır ki, ADPU-da tələbə ilə müəllim arasında rüşvət anlayışı nisbətən yox, tamamilə aradan qaldırılıb, cəhd edənlər universitetdən qovulur.  İkinci cümləniz ona görə yanlışdır ki, universitetdə kök salmış rüşvətə məhz son üç ildə son qoyulub. Nəhayət, üçüncü cümləniz ona görə yanlışdır ki, son üç ildə ADPU-da imtahanlar yazılı qaydada aparılır.Əsas mənbədən,əsas nitq hissələri ilə başlayan, əsaslandırılmış xəbərlər qurun!

Yazırsınız ki, ADPU-da müəllimlər dünyasını dəyişdi. ADPU-da yüzlərlə insan çalışır,əməkdaşlarımızın müəyyən bir hissəsinin yaşı 70-dən yuxarıdır. Arasında elminə, şəxsiyyətinə hörmət etdiyim qocaman müəllimlərimin də olduğu bu insanların bir qismi təqaüdə çıxmış,bir qismi dünyasını dəyişmiş, bir qismi fəaliyyətini davam etdirməkdədir.Belə insanların yaşaması və ya dünyasını dəyişməsi ilə rəhbər arasında əlaqə qura bilmə fantaziyanıza məəttəl qalmamaq mümkün deyil.

ADPU-da gedən ciddi kadr islahatları sizi əsassız yerə narahat edir. Ötən on il ərzində əyri yollarla başı pul qazanmağa qarışan, elmi, tədrisi unudan, yalnız rəhbərə baş əyməyi bacaran” baş”larla işləmək, islahat aparmaq, universitetin kadr hazlığında əsaslı dönüş etmək mümkün deyil. İndi o “baş”lar baş qaldırıb deyir ki, ADPU-da müəllim işləmək, saathesabı dərs demək, ailəmi dolandırmaq istəyirəm. Xub, yaxşı fikirdir. O zaman sizə bir neçə sualım var. Ey bir zamanlar adının, kabinetinin qarşısında “baş” yazılanlar, siz ötən illər ərzində elmlə məşğul oldunuzmu, elmi nəşrlərdə məqaləniz çap olundumu, elmi iş götürüb müdafiə etdinizmi? Saathesabı dərs demək istədinizmi? İstəmədiniz,çünki üç il öncə başınız “baş” olmağa qarışmışdı, işləriniz əyri yollarla “düz” gedirdi. İndi haqsız yerə döymədiyiniz qapı, atmadığınız iftira qalmayıbdır. Gah əsassız yerə milli kimliyinizi gözə soxur, gah da keçmişinizdən bixəbər sadə insanların hislərini istismar edirsiniz. Keçməyəcək!

Yazırsınız ki, rektor ADPU-nu dünya səviyyəsində təmsil edən nüfuzlu elm adamının əvəzinə həyat yoldaşının xalasıoğlunu, heç bir elmi dərəcəsi olmayan Arzu Daşdəmirov adlı birini dekan təyin edib. Mənbəniz kimi özünüz də məlumatsızsınız.Əvvəla, Azu Daşdəmirov fizika-riyaziyyat üzrə fəlsəfə doktorudur,dosentdir, gəncdir, yaradıcı və idarəçilik potensialına malik alimdir,ikincisi, o  nüfuzlu elm adamınızın dekan olmadan Azərbaycan elmini dünya səviyyəsində təmsil etməsinə mane olanmı var? İyirmi il dekan olmaqmı olar?Bəlkə,  ADPU-nun dekanı vəzifəsi o nüfuzlu elm adamının adına ömürlük bron edilib?

Məlumat üçün qeyd edim ki, son üç ildə ADPU-nun “Fizika və texnologiya”, “Filologiya”, “Tarix və coğrafiya” fakültlərində dekan seçkisi keçirilmiş, fakültənin professor-müəllim heyətinin etimadını qazanmış namizədlər dekan seçilmişdir və bu proses davam etməkdədir.

• Dəqiqləşdirilməmiş məlumatlarınız, ictimaiyyəti çaşdıran, qərəzli, iftiralarınız, birtərəfli “xəbərləriniz”, şou xarakterli informasiyalarınız bununla bitmir...

Bir neçə həftə öncə yazırsınız..”ADPU əməkdaşından qalmaqallı açıqlama”... xəbərinizi oxuyuram, məlum olur ki,gənc, subay  əməkdaşımız Nazir Nağıyev şəxsi facebook səhifəsində 2015-ci ildə Bakıda keçirilən I Avropa Oyunları zamanı çəkdirdiyi bir neçə fotoşəkli yayımlayıb və müəyyən fikirlərini bildirib. Siz ondan şou-xəbər düzəldibsiniz. İndi nə deyirsiniz, ADPU  əməkdaşının heç bir sosial həyatı, şəxsi düşüncəsi olmamalıdır? Halbuki  Azərbaycan Respublikasının Konstitusiyasının 47-ci maddəsinin 1-ci bəndində yazılıbdır:”Hər kəsin fikir və söz azadlığı vardır.Yenə həmin Konstitusiyanın 32-ci maddəsinin 2-ci bəndində yazılır ki, öz razılığı olmadan kimsənin şəxsi həyatı haqqında məlumatın toplanmasına,saxlanılmasına, istifadəsinə, yayılmasına yol verilmir. ADPU-da” qanunsuzluq” axtarışına çıxanlar, özünüzdən başlayın...

Professor Cəfər Cəfərovun sadəliyi,peşəkarlığı, universitetin müəllim və tələbə heyəti ilə birbaşa dialoqa girməsi, ünsiyyətdə olması, özü ilə əməkdaşları, tələbələri arasında sədd çəkməməsi, inanclı bir insan olması, dövlətinə,prezidentinə, Ümummilli lider Heydər Əliyev ideallarına sadiq olması, təhsilə qazanc gözü ilə baxanlarla mübarizəyə başlaması yeniliyə, inkişafa qarşı olan radikal qüvvələr, sözün hər mənasında üçüncü olanlar üçün isə suyu bulandırmağa fürsətə çevrildi...

Fikrimi Uca Türk xalqının ana kitabı olan “Kitabi-Dədə Qorqud” dastanında Dədə Qorqudun hikmətli sözləri ilə tamamlamaq istərdim..

Çalıb kəsər üz qılıncı müxənnətlər çalınca çalmasa yey..

Çala bilən igidə oxla qılıncdan bir çomaq yey..

Yalan söz bu dünyada olunca, olmasa yey...

Bəhram Cəfəroğu
ADPU-nun Azərbaycan dili və onun tədrisi metodikası kafedrasının baş müəllimi
Filologiya üzrə fəlsəfə doktoru