Tbilisidə oxuyan tələbələrimizlə bundan sonra müşavir məşğul olacaq...
Prezident İlham Əliyevin Sərəncamı ilə Azərbaycanın Gürcüstandakı səfirliyində təhsil məsələləri üzrə müşavir vəzifəsi təsis edilib.
Sərəncama əsasən, Azərbaycan Respublikasında təhsilalma imkanlarının təbliğini və xarici dövlətlərlə təhsil sahəsində əməkdaşlığın inkişaf etdirilməsini, Azərbaycan Respublikası vətəndaşlarının xarici dövlətlərin təhsil müəssisələrində təhsil almasına və təhsil hüquqlarının müdafiəsinə dəstək verilməsini, eləcə də bu istiqamətdə müvafiq əlaqələndirməni təmin etmək məqsədilə Azərbaycan Respublikasının Gürcüstandakı səfirliyində təhsil məsələləri üzrə müşavir vəzifəsi təsis edilir.
Gürcüstan və Azərbaycan arasında müxtəlif sahələrdə əməkdaşlığın dərinləşdiyi bir dövrdə təhsil sahəsində də bu prosesin getməsini ekspertlər müsbət dəyərləndirir. Prezidentin bu yöndə Sərəncamını Gürcüstanda yaşayan soydaşlarımız çox müsbət qarşılayırlar.
Bilirik ki, soydaşlarımız təhsil sahədə müəyyən problemlərlə üzləşirlər, ana dilinin tədris saatlarının azaldılması, habelə dərsliklərin hazırlanmasındakı çətinliklər aktual olaraq qalır. Soydaşlarımız hesab edirlər ki, Azərbaycanın Gürcüstandakı səfirliyində təhsil məsələləri üzrə müşavir vəzifəsi təsis edilməsi onların da xeyrinədir.
Qeyd edək ki, sosial şəbəkələrdə Gürcüstanda yaşayan azərbaycanlı ziyalılar, fikir adamları səfirlikdə bu vəzifənin təsis edilməsini yüksək dəyərləndirirlər.
Aygül İsayeva: “Gürcüstan azərbaycanlılarının təhsil problemlərinin həll edilməsində ciddi rol oynayacağını düşünürəm”
İqtisadiyyat üzrə fəlsəfə doktoru, ictimai fəal Aygül İsayeva “Bakı-Xəbər”ə bildirdi ki, bu çox mühüm sərəncamdır: “Gürcüstan azərbaycanlılarının təhsil problemlərinin həll edilməsində ciddi rol oynayacağını düşünürəm. Prezidentin bu sərəncamı Gürcüstandakı soydaşların təhsil problemlərinə önəm verməsini və tezliklə həll olunması üçün real addımların atılacağını göstərir. Gürcüstanda azərbaycandilli məktəblərin sayında azalma müşahidə edilir, kadr çatışmazlığı var, ana dili üzrə dərs saatları azaldılıbdır, Azərbaycan dili və ədəbiyyat üzrə yeni kadrlar hazırlanmır, dərsliklərin tərcüməsində ciddi səhvlər mövcuddur. Bu problemlərin həll edilməsində verilən sərəncamın ciddi rol oynayacağını düşünürəm. Gürcüstan azərbaycanlılarının əsas istəklərindən biri də Azərbaycan-Gürcüstan Universitetinin təsis edilməsi ilə bağlıdır. İnşallah, bundan sonra bu yöndə də əməli işlər aparılar. Biz də öz növbəmizdə lazımı dəstəyi göstərməyə hazırıq”.
Dəyanət Osmanlı: “Sərəncam soydaşlarımızın təhsil hüquqları ilə bağlı bir sıra həllini gözləyən vacib məsələlərin gündəmə gəlməsini qaçılmaz edir”
“Borçalı” İctimai Birliyinin İdarə Heyətinin sədri Dəyanət Osmanlı da “Bakı-Xəbər”ə bildirdi ki, Azərbaycan Prezidentinin müvafiq sərəncamı ilə ölkəmizin Gürcüstandakı səfirliyində təhsil məsələləri üzrə müşavir vəzifəsi təsis edilməsi milli maraqlarımıza xidmət edən mühüm qərardır: “Əlbəttə ki, insan hüquq və azadlıqları timsalında Gürcüstandakı tarixi yurdlarında yaşayan yüz minlərlə soydaşmızın təhsil haqlarının müadfiəsini ön planda nəzərdə tutur.
Hesab edirəm ki, sərəncamla oradakı Azərbaycan orta məktəblərinin ölkəmizin təhsil sistemi ilə əlaqələndirilməsi, tədris keyfiyyətinin yüksəldilməsi, eləcə də ali məktəblərdə təhsil almaq istəyən soydaşlarımız üçün imkanların genişləndirilməsi məsələləri rəsmi qaydada həllini tapacaqdır. Məlumdur ki, Borçalıda orta məktəblərdə Azərbaycan dili və tarixi üzrə kadr çatışmazlığı kritik həddədir və bu da birbaşa milli-mənəvi, vətənpərvərlik dəyərlərimizin aşınmasına, sıradan çıxmasına səbəb olası faktlardandır.
Gürcüstanda Azərbaycan dili və tarixinin tədrisinə dövlət səviyyəsində ciddi dəstək verilməlidir. Bu, soydaşlarımızın gələcək həyatının milli təməli deməkdir. Və sözsüz, milli dil, milli kimliik, vətənpərvərlik duyğularının möhkəmlənməsinə, torpağa bağlılıqlarına, ictimai aktual məsələlərdə həmrəylik göstərmələrinə qoyulan investisiyadır.
Sərəncam soydaşlarımızın təhsil hüquqları ilə bağlı bir sıra həllini gözləyən vacib məsələlərin gündəmə gəlməsini qaçılmaz edir. Bu mənada, Tbilisi Dövlət Pedaqoji Universitetində öncələrdə uğurla fəaliyyət göstərən Azərbaycan dili və ədəbiyyatı fakültəsinin bərpası, Marneulidə, yaxud Tbilisidə Bakı Dövlət Universitetinin filialının açılması, eyni zamanda Azərbaycandakı ali məktəblərdə Borçalı türklərinin güzəştli təhsil almaları üçün kvotalar ayrılması kimi məsələlərin yaxın prioritetlərin ön sırasında yer alması və gerçəkləşdirlməsi əhəmiyyətli addım olar”.
İradə SARIYEVA
