İbtidai sinif şagirdlərinə əlavə yaz tətili, müəllimlərinə məcburi tapşırıq...
Məlum olduğu kimi, mayın 1-dən Azərbaycandakı ümumi təhsil pilləsinin məktəbəhazırlıq qrupları və ibtidai sinifləri üçün əlavə yaz tətili günləri başlayıb. Nazirlər Kabinetinin müvafiq Qərarına əsasən, məktəbəhazırlıq qrupları və ibtidailər üçün mayın 8-də ilk dərs günü başlayacaq.
Tətil günlərində məktəbəhazırlıq qrupları və ibtidai siniflərdə təhsil alan şagirdlər evdə dincəlsələr də, onların müəllimlərindən məktəbə gəlmək tələb olunur. Bu isə müəllimlərin narazılığına səbəb olur.
Maraqlıdır, niyə həmin müəllimlərə də tətil günlərində evdə qalmağa icazə verilmir? Axı Nazirlər Kabinetinin Qərarında, eləcə də Elm və təhsil nazirinin müvafiq əmrində müəllimlərin tətil günləri məcburən məktəbə gəlməsi barədə heç bir qeyd yoxdur.
- “Tətil müddəti olsa belə, ibtidai sinif müəllimlərinin məktəbə gəlməsi zəruridir, bu, əmək qanunvericiliyinə tam uyğundur”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, tətil günlərində müəllimləri məktəbə çağırılması ilə bağlı müxtəlif fikirlər səslənir. Müəllimlər məktəblilər kimi tətil günlərində məktəbə gəlməməyin mümkün olduğunu düşünür. Ancaq nəzərə almaq lazımdır ki, Azərbaycan Respublikasında əmək münasibətləri əmək qanunvericiliyi ilə tənzimlənir: “Müəllimlər üçün tətil anlayışı yoxdur. Müəllim və işçilər üçün iş günü olmayan günlər əmək məzuniyyəti dövrü, istirahət günləri, iş günü sayılmayan bayram günləri, ümumxalq hüzn günü və seçki günləridir. Tətil günlərində müəllimlərin iş saatının uçotu aparılır. 6 günlük iş rejimi ilə işləyən müəllimlər tətil günlərində 6 saat, 5 günlük iş rejimi ilə işləyən müəllimlər gündə 7 saat məktəbdə iş yerində olmalıdırlar. Həmçinin, onların vəzifəsi təkcə dərs deməklə kifayətlənmir. Müəllimlər həm də dərs prosesi üçün müəyyən materialların hazırlanması və müxtəlif məsələlərlə bağlı məşğul olurlar. Düşünürəm ki, tətil müddəti olsa belə, ibtidai sinif müəllimlərinin məktəbə gəlməsi zəruridir. Bu, əmək qanunvericiliyinə tam uyğundur”.
Həmsöhbətimiz hesab edir ki, məktəb rəhbərləri tətil günlərindən daha səmərəli istifadə etmək üçün məktəbdə məktəbdaxili təlimlər təşkil edə bilər. Belə olarsa müəllimlərin qeyri-iş günlərində tədris müəssisəsində keçirdiyi vaxt daha maraqlı və yararlı olar.
Günel CƏLİLOVA
