Abituriyentlər Azərbaycan dili imtahanının nəticələrinin ləğvini tələb edir...
Məlumdur ki, martın 5-də və 12-də buraxılış imtahanları keçirilib. Buraxılış imtahanı bitsə də abituriyentlər və müəllimlər imtahan suallarının çətin olmasından narazılıq edir. Hətta bir qrup abituriyent Dövlət İmtahan Mərkəzinin (DİM) qarşısında buraxılış imtahanına düşən suallarla bağlı etiraz edib.
Şagirdlər buraxılış imtahanına düşən sualların çətin olduğunu, bəzi test tapşırıqlarının həllinin çox vaxt apardığını deyir. Narazılığın isə əsasən Azərbaycan dili fənnindən olduğu deyilir. Eyni zamanda, test tapşırıqlarındakı səhv suallara da xeyli vaxt itiriblər. Abituriyentlər bildirir ki, imtahan nəticələri ləğv edilməli, yenidən imtahan keçirilməlidir. İmtahan yenidən keçirilmiyəcəksə, ballar aşağı enməlidir.
- “Orada elə suallar vardı ki, həlli 7 dəqiqə zaman apardı, belə olan halda şagird digər suallara zaman ayıra bilmir”
Elm və təhsil məsələləri üzrə tədqiqatçısı Elmin Nurizadə bildirdi ki, bu məsələdə abituriyent və repetitorlar haqlıdır: "Abituriyentləri haqlı saymaq olar. Qeyd edim ki, son səkkiz ildə heç vaxt builki kimi imtahanlardan narazılıq müşahidə olunmayıb. Sualların hazırlanma mexanizmi tamamilə dəyişdirilib və qəlizləşdirilib. Xüsusən də Azərbaycan dili və Riyaziyyatla bağlı daha çox narazılıqlar müşahidə edilir. Suallar çox çətin, dolaşıq olmaqla yanaşı, buna görə zaman limiti də nəzərə alınmayıb. Azərbaycan dili üzrə mətnin strukturu üzrə verilən suallar həddindən artıq qəliz olub. DİM abituriyent psixologiyasını nəzərə almalı idi. Qurum bir tərəfdən xüsusi psixoloji konsultasiyalardan danışır, digər tərəfdən isə belə suallarla birbaşa olaraq şagirdlərin psixologiyasına zərbə vurmuş olur. Nəticədə də şagirdlər ona verilən zamanda işləyə bilməyiblər. Çünki orada elə suallar vardı ki, onun həlli 7 dəqiqə zaman apardı. Belə olan halda şagird digər suallara zaman ayıra bilmir. Riyaziyyatdan düzbucaqlı paralelepipedlə bağlı verilən sualın həlli də çox zaman aparıb. Nöqsanlı sual olduğu üçün, nə etmək lazımdır, abituriyent bunu bilməyib. Əslində DİM tədris proqramı əsasında sualları tərtib etməli idi. Əsas meyar bu olmalı olduğu halda, qeyd edim ki, həmin nüans nəzərə alınmayıb. Bu meyar nəzərə alınsaydı, belə ciddi narazılıq olmazdı. Həm də təsəvvür edin ki, DİM bu sualları verərək qısa zamanda çevik düşünmə və həll tələb edir. DİM belə tez "çevik düşün, çevik həll et" prinsipinə keçməməli idi. Çünki hazırkı təhsil səviyyəsinə buna yol vermir. Biz hələ analitik həll tələb edən sualları həll etməyə yenicə başlamışıq. Lakin qeyd edim ki, buraxılış imtahanlarındakı suallar SAT tipli idi".
Ekspert hesab edir ki, bundan sonrakı buraxılış imtahanlarında da narazılıqlar olacaq.
Günel CƏLİLOVA
