Azərbaycanda tələbə sayının bu qədər az olması necə izah edilir...
Bir xalq üçün ən böyük sərvət təhsildir. Təhsilsiz cəmiyyət isə məhvə məhkumdur. Təhsil şəxsiyyətin və cəmiyyətin inkişafı üçün əvəzsiz əsasdır. Təhsil təkcə oxumaq və yazmaqdan ibarət deyil, bu, bilikdən öz mənfəəti üçün istifadə etmək və şəxsi inkişafa töhfə verməkdir.
Təhsilin məqsədi təkcə insanları savadlı etmək deyil. Təhsil həm də insanlara başqalarından asılı olmadan öz həyatlarını sərbəst şəkildə idarə etmək bacarığı verir.
Təhsil təkcə kitab biliklərinin praktiki öyrənilməsi deyil. Təhsil o demək deyil ki, məktəblərə və kolleclərə gedib hər gün imtahan verək. O, həyatımıza dair lazımi məlumatları öyrənməyə yönəlib. Təhsil dünyagörüşüdür. Günümüzdə kifayət qədər təhsilsiz, amma böyük dünyagörüşünə sahib olan insanlar var. Bu səbəbdən də ölkəmizdə ali təhsilə xüsusi önəm verilir. Ancaq buna baxmayaraq, ölkədə ali təhsilli şəxslərin sayı azdır.
Azərbaycanda son illərdə tələbələrin sayında sürətli artım qeydə alınsa da, ölkəmiz hələ də MDB-də ən az tələbəyə sahib respublikadır. Məlumat üçün bildirək ki, Azərbaycanda tələbələrin sayı son bir ildə 12 min nəfər artaraq 211 minə çatıb. Tələbə sayı 5 il ərzində 43 min, on il ərzində 55 min artıb.
Qeyd edilən artımlardan sonra digər MDB ölkələri ilə müqayisədə Azərbaycanda tələbələrin sayı hələ də azdır.
Əhalisinin sayı Azərbaycandan az olan Qırğızıstanda 355 min, Belarusda 276 min, Ermənistanda 265 min, Takicistanda 244 min, Moldavada 229 min tələbə təhsil alır.
Maraqlıdır, MDB ölkələri arasında ən az tələbə niyə məhz Azərbaycandadır?
- “Azərbaycanda bir sıra sahələr üzrə kadr çatışmazlığı yaşanır, bu hal daha çox həkimlik sahəsində qeydə alınır”
Təhsil eksperti Elşən Qafarov bildirdi ki, MDB ölkələri ilə müqayisədə Azərbaycanda ali təhsillilərin sayı azdır. Azərbaycanda hər 100 nəfərdən 17-si ali təhsillidir: “10 milyon əhali üçün isə bu olduqca aşağı göstəricidir. Əhali sayı Azərbaycandan iki dəfə az olan ölkələrdə bu göstərici iki-üç dəfə çoxdur. Qırğızıstan, Moldova və digər əhalisi az olan ölkələrdə ali təhsilli şəxslərin sayı çoxdur. Azərbaycanda ali təhsilli şəxslərin sayının az olmasının müəyyən səbəbləri var. Təəssüf ki, bu problemin yaranmasının əsas səbəbi ali təhsil ocaqları ilə bağlıdır. İlk olaraq bildirim ki, ölkəmizdə ali təhsil müəssisələrinin sayı azdır. Ali təhsil müəssisələrinin sayının artırılmasına ehtiyac var. Həmçinin, universitetlərdə tələbə qəbulu ilə bağlı yerlərin sayının artması da vacib məsələlərdən biridir. Onsuz da universitetlərdə yüksək səviyyədə təhsil verilmir və əmək bazarının tələbinə cavab verən kadr hazırlığı həyata keçirilmir, o zaman bilik və bacarıqları aşağı olanları universitetə qəbul etmək ancaq kəmiyyət artımına gətirib çıxaracaq. Burada heç bir keyfiyyət artımı ola bilməz”.
Həmsöhbətimiz onu da əlavə etdi ki, Azərbaycanda bir sıra sahələr üzrə kadr çatışmazlığı yaşanır. Bu hal daha çox həkimlik sahəsində qeydə alınır. Ölkədə ixtisaslı həkim qıtlığı yaşanır. Ali təhsil ocaqları və qurumlar bu məsələyə xüsusi həssaslıqla yanaşmalıdır.
Günel CƏLİLOVA
