Bu yaxınlarda Bişkekdə keçirilən KTMT-nin tədbirində Ermənistan Baş naziri Nikol Paşinyan quruma üzv olan dövlətlərə müraciət edərək demişdi ki, onların Azərbaycana silah satmaları müttəfiqlik münasibətlərinə xələl gətirir.
Rusiyanın Xarici İşlər naziri Sergey Lavrovun Bakıda keçirdiyi son görüşlərin nəticəsi ilə bağlı verdiyi açıqlamadan görünür ki, iki ölkə arasında hərbi əməkdaşlıq bundan sonra da davam etdiriləcək: "Azərbaycan Prezidenti ilə çox məzmunlu görüş keçirdik. Görüşün yekunlarına görə çox əhəmiyyətli razılaşmalar əldə olunub. Beynəlxalq gündəlik haqqında, habelə beynəlxalq təşkilatlar çərçivəsində əməkdaşlıq haqqında danışdıq. Həmçinin, Xəzərdə əməkdaşlığı, əməkdaşlığın gücləndirilməsi üçün səylərin əlaqələndirilməsini müzakirə etdik. İqtisadiyyatla bağlı ilin yekunlarına görə 15%-ə yaxın artım gözlənir. Humanitar əməkdaşlığa gəlincə, burada da artım müşahidə olunur".
Daha sonra o, tərəflərin hərbi-texniki əməkdaşlığının əhəmiyyətini qeyd edib. "Yalnız onu qeyd edə bilərəm ki, hərbi-texniki əməkdaşlıq Moskva və Bakı arasında strateji tərəfdaşlığın mühüm sahələrindən biridir. Hərbi-texniki əməkdaşlığı beynəlxalq qanunvericiliyə tamamilə uyğun şəkildə inkişaf etdiririk".
Bunun ardınca Azərbaycanın Xarici İşlər naziri Elmar Məmmədyarov, öz növbəsində, əlavə edib ki, bu sahədə əməkdaşlıq həmişə gündəlikdə olub: "Müəyyən ideyalar var. Sövdələşmə olan kimi KİV-ə məlumat verəcəyik".
Göründüyü kimi, Azərbaycan rəsmisi Rusiyadan yeni silah tədarükünün anonsunu verib. Bu nəticəyə gəlmək olarmı ki, Paşinyanın KTMT-də etdiyi çağırışa Rusiya heç bir məhəl qoymadı?
Daşdəmir Əliyev: “Lavrovun son səfəri zamanı əldə olunan razılaşmalardan bir daha göründü ki, Paşinyanın dediklərinə heç əhəmiyyət verən yoxdur”
Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, Rusiyanın Azərbaycana silah satması hər hansı bir qanunla, Kollektiv Təhlükəsizlik Müqaviləsi Təşkilatının heç bir norma və qaydaları ilə qadağan edilmir: “Ermənistan hər zaman KTMT-ni birtərəfli qaydada bu prosesə qoşmaq istəyib, ancaq qurumun adından verilən bəyantlarda bunun mümkünsüzlüyü qeyd edilib. Ermənilər Rusiyanın və Belarusun KTMT üzvü kimi Azərbaycana silah satmasından narahatlıqlarını ifadə ediblər. Ancaq iş burasındadır ki, Ermənistanın özü də həmin ölkələrdən silah alır. Onların tələbu budur ki, İrəvana silah satılsın, ancaq Azərbaycana yox. Paşinyan bu tələbi dəfələrlə edib, hər dəfə də cavabını alıb. Erməni jurnalistlər bununla bağlı Putinə də sual ünvanladılar, o da konkret cavab verdi ki, bu, Rusiyanın öz işidir. Lukaşenko da dedi ki, həmin silahlar açıq satışdadır, istəsə, Ermənistan da ala bilər. Azərbaycan son illər büdcəsinin əhəmiyyətli hissəsini silah-sursat, hərbi təyinalı avadanlıqların alınmasına xərcləmək zorunda qalıb. Bunu xoşundan etmir. Çünki Ermənistanın işğalçı siyasəti bizi müharibə şəraitində yaşamağa vadar edir. Dünyada ən gəlirli bizneslərdən biri silah satışıdır. Bununla dünyada inkişaf etmiş ölkələr məşğul olurlar. Hər bir silah istehsalçısı istəyər ki, onun daimi müştərisi olsun. Yəni Rusiya bunu etməzsə, Azərbaycan başqa ölkələrin silah satışı təkliflərini nəzərdən keçirə bilər. Onsuz da Azərbaycan silah alışını şaxələnmiş şəkildə həyata keçirir. Yəni bir ölkədən almır. Lavrovun son səfəri zamanı əldə olunan razılaşmalardan bir daha göründü ki, Paşinyanın dediklərinə heç əhəmiyyət verən yoxdur”.
Məhəmmədəli QƏRİBLİ
