20/11/2019 17:57
728 x 90

ABŞ və Rusiya Azərbaycanın təhlükəsizlik orqanlarının işinə eyni vaxtda yüksək qiymət verdi...

img

Rusiya Federal Təhlükəsizlik Xidmətinin (FTX) direktoru Aleksandr Bortnikov MDB dövlətlərinin Təhlükəsizlik və Xüsusi Xidmət Orqanları Rəhbərləri Şurasının Daşkənddə keçirilən 47-ci iclasında deyib ki, MDB ölkələrinin cənub sərhədlərinin təhlükəsizliyini təmin etmək xüsusi xidmət orqanlarının əsas vəzifələrindən biridir.

Onun sözlərinə görə, Əfqanıstanda möhkəmlənmiş İŞİD terror qruplaşması və "əl-Qaidə" tərəfindən təhdidləri zərərsizləşdirmək üçün birgə fəaliyyətin intensivliyini artırmaq vacibdir.

FTX rəhbəri Azərbaycanın da xüsusi xidmət orqanlarının terrorla mücadilədə aktiv və səmərəli fəaliyyət göstərdiyini qeyd edib. O əlavə edib ki, bu il Rusiya Azərbaycan, Tacikistan, Qırğızıstan və Özbəkistanla birlikdə 13 beynəlxalq terrorçu yuvasını aşkarlayıb, onların fəaliyyətinin qarşısı alınıb, 138 yaraqlı tutulub: "2019-cu il may-oktyabr aylarında terrorçu və dini ekstremist təşkilatlarla əlaqədə şübhəli bilinən 200-dən çox MDB ölkələri vətəndaşı sərhəd nəzarəti altına alınıb".

Qeyd edək ki, bundan bir neçə gün əvvəl ABŞ da Azərbaycanın xüsusi xidmət orqanlarının fəaliyyətinə əla qiyməti vermişdi. ABŞ Dövlət Departamentinin müxtəlif ölkələrin terrorçuluq əleyhinə apardığı mübarizə barədə 2018-ci il üzrə açıqladığı hesabatda bildirilir ki, Azərbaycan 2018-ci ildə terrorçuluqla mübarizədə fəal iştirak edib. Hesabatda qeyd olunub ki, Azərbaycan hökuməti ötən il öz ərazisindən və dəniz sərhədlərindən, eləcə də bütünlüklə Cənubi Qafqazda insan, pul və material daşınması ilə məşğul olan terror qruplaşmalarının səylərinin qarşısının alınması üzərində fəal işləyib. Həmçinin, Azərbaycanın hüquq-mühafizə orqanlarının terror aktlarının qarşısının alınması üzrə əməliyyatlar keçirdiyi bildirilib.

Qeyd olunub ki, Azərbaycanda hüquq-mühafizə orqanları və təhlükəsizlik xidmətləri terror hücumlarının qarşısını alıb, şübhəlilər həbs olunaraq mühakimə edilib. Bildirilib ki, terrorçu qruplaşmalara qoşulmaqda və ya onları maliyyələşdirməkdə şübhəli bilinən azərbaycanlıların geri qaytarılması ilə əlaqədar cinayət işi açılıb. Hesabatda o da xatırladılıb ki, 2018-ci ildə Azərbaycanda terror aktı qeydə alınmayıb.

Göründüyü kimi, dünyanın hər iki superdövləti Azərbaycanın xüsusi xidmət orqanlarının fəaliyyətindən razıdır. Azərbaycanın əlaqədar qurumları bu gücü nədən alır ki, onların fəaliyyətinə belə qiymət verilir?

  • Elşən Həsənov: “Hələ SSRİ vaxtında bir neçə ölkə üzrə ixtisaslaşmış Azərbaycan DTK-sının Yaxın Şərq üzrə böyük təcrübəyə malik olan professional kadrları vardı”

Təhlükəsizlik orqanlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, belə qiymətləndirmə konkret faktlara əsaslanır və təsədüfən meydana çıxmır: “İstər ABŞ Dövlət Departamentinin, istərsə də Rusiya FTX-nin Azərbaycan təhlükəsizlik orqanlarıının fəaliyyəti barədə müsbət rəyləri qürurverici və sevindirici faktdır. Əlbəttə ki, bütün bunlar boş yerdən qaynaqlanmır.

Azərbaycan təhlükəsilik qüvvələri müasir dövrümüzə qədər böyük və şanlı bir yol keçiblər. SSRİ DTK-sının bir strukturu olaraq Azərbaycan DTK-sı irimiqyaslı bir çox əməliyyatın planlaşdırılmasında və həyata keçirilməsində müstəsna rol alıb ki, burada Azərbaycan çekistlərinin iştirakı və uğurları xüsusi xidmət orqanlarının dərs vəsaitlərində işıqlandırıla biləcək dərəcədə tarixə düşüb. Heç kəsə sirr deyil ki, hələ SSRİ vaxtında da Yaxın Şərqin bir neçə ölkəsi üzrə ixtisaslaşmış Azərbaycan DTK-sının Yaxın Şərq üzrə böyük təcrübəyə malik olan professional kadrları vardı.

Bundan əlavə, müstəqillik dövründə digər ölkələrin analoji strukturları ilə sıx əməkdaşlıq, təcrübə mübadiləsi də bu işdə öz sözünü deyir.

Çox təəssüflər olsun ki, bu orqanların fəaliyyəti və iş prinsipləri məxfi xarakterli olduğundan, mövzunu daha əhatəli şəkildə işıqlandıra bilmirik. Amma qətiyyətlə deyə bilərəm ki, son dövrlər regionda və eləcə də Yaxın Şərqdə vəziyyətin qeyri-stabil inkişafının, ələlxüsus da terror hərəkətlərinin qarşısının alınmasında Azərbaycan təhlükəsizlik orqanlarının fəaliyyəti diqqəti cəlb edir.

Düşünürəm ki, indiki halda dediklərimdən artıq faktları sadalamaq imkanlarımın dövlət sirri baxımından məhdud olduğunu nəzərə alaraq, yuxarıda söylədiklərimlə kifayətlənmək olar”.

Məhəmmədəli QƏRİBLİ

Son xəbərlər