Müsavat Partiyasının başqanı Arif Hacılının təşəbbüsü ilə radikal müxalifəti təmsil edən şəxslərdən ibarət “dəyirmi masa” keçirilib. Hələ bu təşəbbüs irəli sürüləndə birmənalı qarşılanmamışdı. Çünki A.Hacılının “dəyirmi masa”da görmək istədiyi şəxslərin sırasında Əli İnsanovun adını birinci yazması onu tənqid hədəfinə gətirmişdi.
Nəhayət, oktyabrın 5-də belə bir görüş baş tutdu. AXCP sədri Əli Kərimli, Müsavat lideri İsa Qəmbər, keçmiş səhiyyə naziri Əli İnsanov, AXP sədri Pənah Hüseyn, Müsavat başqanı Arif Hacılı, politoloq Hikmət Hacızadə və “Turan” İnformasiya Agentliyinin rəhbəri Mehman Əliyevin qatıldığı tədbir Müsavat Partiyasının qərargahında keçirilib. Maraqlıdır ki, “dəyirmi masa”dan sonra sosial şəbəkələrdə tədbirlə bağlı olduqca mənfi rəylər yazılıb. Xüsusilə də müxalif mövqeli insanlar İsa Qəmbəri və Əli Kərimlini sərt tənqid atəşinə tutublar ki, vaxtilə onları təhqir edən Əli İnsanovla bir masa arxasında oturmağı necə öz mənəviyyatlarına sığışdırblar? Sosial şəbəkələrdə Ə.İnsanovun vaxtilə İsa Qəmbər və digər müxalifət liderləri ilə bağlı səsləndirdiyi mənfi fikirləri sübut edən videokadrlar paylaşılıb. Bütün bunlar göstərir ki, məhz Ə.İnsanov faktoruna görə müxalifət kəskin tənqid edilir, amma bunlar da sabiq səhiyyə nazirindən əl çəkmək istəmirlər. Radikal müxalifətdə olan Ə.İnsanov sevgisi nə ilə izah oluna bilər? Və ya sualı başqa cür qoyaq: Ə.İnsanovun hansı göstəriciləri müxalifəti belə cəzb edir? Bununla bağlı müxtəlif versiyalar irəli sürülür. Məsələn, deyirlər ki, müxalifət Əli İnsanovun vaxtilə topladığı varidatından yararlanmaq, yəni onun pulundan istifadə etmək istəyir. Başqa bir versiyaya görə isə, Ə.İnsanovun ətrafında olan qərbi azərbaycanlıları prosesə cəlb etmək istəyirlər. Belə qənaətlər var ki, Ə.İnsanov böyük elektorata malikdir. Ə.İnsanovda bu keyfiyyətlər həqiqətən varmı və bundan radikallar nə dərəcədə yararlana bilər?
Rəfail Becanov: “Birlik formatı eyni əqidədə olan adamlarla mümkündür”
Məhəmmədəli QƏRİBLİ
