Ermənistanda orduya çağırış müddəti uzadılıb. Bu barədə ölkənin “Jamanak” qəzeti məlumat yayıb. Sözügedən mətbuat orqanı yazır ki, hökumət orduya çağırışın, son illərdə olduğu kimi, 1 yanvar-31 yanvar 2020-ci il tarixlərində deyil, bu ilin 16 dekabrında başlayaraq, 31 yanvar 2020-ci ilə qədər davam edəcəyinə dair qərar verib.
Maraqlı məqam odur ki, orduya çağırış müddətinin artırılması səbəbinə Ermənistan hökuməti aydınlıq gətirmir. Nəşrin yazdığına görə, hərbi komissarlığa verilən tapşırıqları yerinə yetirmək üçün daha çox vaxt lazım olduğu güman edilə bilər.
O da məlumdur ki, Ermənistan hakimiyyəti nə qədər gizlətsə də, orduya çağırışla bağlı ciddi problemlər var. Erməni gəncləri orduda xidmət etmək istəmir və müxtəlif vasitələrlə çağırışdan yayınırlar. Dəfələrlə Ermənistanda müəyyən valideynlər aksiyalar keçirib bəyan ediblər ki, övladlarının Qarabağda ölməsini istəmirlər. Onu da qeyd edək ki, hazırda Ermənistanda hərbi xidmətdən yayınan gənclərin sayı 11 mindən çoxdur. Bu günlərdə o da məlum oldu ki, Ermənistanda hərbi xidmətdən yayınmaq üçün rüşvət halları kəskin artıb. Bununla əlaqədar bir neçə zabit cinayət məsuliyyətinə cəlb edilib.
Bütün bunların fonunda, belə güman etmək olarmı ki, çağırışda ciddi problemlər olduğundan, Ermənistanda çağırış müddət uzadılır?
İbrahim Rüstəmli: “Hakimiyyət problemin qismən həllini çağırış müddətinin uzadılmasında görür, amma...”
Məsələyə münasibət bildirən ehtiyatda olan polkovnik-leytenant, hərbi ekspert İbrahim Rüstəmlinin sözlərinə görə, müddətin uzadılması başlıca olaraq çağırışla bağlı mövcud olan ciddi problemlərlə əlaqədardır: “Ermənistanda orduya çağırışla bağlı problemlər yeni deyil. Müharibənin ilk illərində bununla bağlı Ermənistanda ciddi problemlər var idi. Bu gün də həmin problemlər qalmaqdadır. Təxminən 5 il əvvəl bununla bağlı Ermənistanda çox ciddi problem yaranmışdı. Bir nəfər də olsun çağırışçı hərbi komissarlığa müraciət etməmişdi. Hətta vəziyyət o yerə gəlib çatdı ki, prezident yanında bununla bağlı fövqəlada iclas keçirildi. Deməyim odur ki, Ermənistanda orduya çağırışla bağlı çox ciddi problemlər var. Orduya çağırış probleminin psixoloji, siyasi, hərbi və digər səbəbləri var. Psixoloji səbəbi odur ki, dinc erməni əhalisinin böyük bir hissəsi öz övladlarının Qarabağda xidmət etməsini istəmir. Çünki orada erməni silahlı qüvvələrində çox ciddi problemlərlə üzləşir. Bununla belə, ümumən erməni ordusunda ciddi mənəvi problemlər var. Məsələ ondadır ki, orduda xidmət edən əsgərlər kateqoriyaya bölünür. İrəvan erməniləri Qarabağ ermənilərinə ikinci sort adam kimi baxırlar. İrəvanda yaşayan əhali istəmir ki, övladları Qarabağa göndərilsin. Dinc erməni əhalisini düşündürən məsələ ac qarnını doydurmaqdır. Qarabağ məsələsi onlar üçün artıq yükdür. Erməni əhalisi üçün bu yükü daşımaq çox çətindir. Ermənistanda bəzi QHT-lər açıq şəkildə bəyan edirlər ki, bizim Qarabağ problemimiz yoxdur. Əslində, Ermənistan əhalisini Qarabağa bağlayan mənəvi, psixoloji, intellektual tellər çoxdan qırılıb. Sadəcə, hakimiyyət və onu təmsil edən qüvvələr bu kartı əldən vermək istəmirlər. Ermənistanda demoqrafik durum çox acınacaqlı vəziyyətdədir. Əhalinin sayı artmır, ölkəni tərk edənlər içində əmək qabiliyyətli əhali üstün çəkiyə malikdir. Bütün bunlar əlbəttə ki, orduya çağırışla bağlı ciddi problemlər yaradır. Ona görə də hakimiyyət orduya çağırış probleminin qismən həllini çağırış müddətinin uzadılmasında görür. Ancaq bu, sözügedən problemi həll edə bilməz”.
Vidadi ORDAHALLI
