Ermənistanın Baş nazirinin Azərbaycanın işğal olunmuş ərazilərinə qanunsuz səfər edərək Xankəndi şəhərində “Qarabağ Ermənistandır”, “miatsum” kimi sərsəm bəyanatlarla çıxış etməsi Azərbaycanda ciddi rezonans doğurub. Paşinyanın həmin addımına rəsmi dairələr sərt reaksiya verib.
Azərbaycan Respublikası Prezidenti Administrasiyasının Xarici siyasət məsələləri şöbəsinin müdiri Hikmət Hacıyev qeyd edib ki, Dağlıq Qarabağ Azərbaycandır! Dağlıq Qarabağ Azərbaycanın tarixi torpağıdır və ayrılmaz hissəsidir. Beynəlxalq ictimaiyyət Dağlıq Qarabağ daxil olmaqla, Azərbaycanın ərazi bütövlüyü və suverenliyini tanıyır və dəstəkləyir. Azərbaycan dövləti və xalqı Ermənistanın işğalçılıq və qanlı etnik təmizləmə vasitəsilə ölkəmizin ərazi bütövlüyünü pozması ilə heç vaxt barışmayacaq və Dağlıq Qarabağın Ermənistana birləşdirilməsi cəhdlərinə imkan verməyəcək.
Ardınca Azərbaycan Respublikası Xarici İşlər Nazirliyi (XİN) bəyanat yayıb. Bəyanatda deyilir ki, Ermənistan Baş nazirinin 5 avqust tarixində Azərbaycanın hazırda Ermənistan silahlı qüvvələrinin işğalı altında saxlanan Dağlıq Qarabağ bölgəsinin Xankəndi şəhərində “ümumerməni oyunları”nın açılışında çıxış edərək, reallıqdan tamamən uzaq olan populist bəyanatlar səsləndirməsi onun bölgədə və ümumiyyətlə, dünyada baş verənlərdən xəbərsiz və nə dərəcədə aciz birisi olduğunu nümayiş etdirir.
Rəsmi reaksiya ilə yanaşı, müstəqil qurumlar, politoloqlar, siyasətçilər də Paşinyanın son addımlarına sərt reaksiya veriblər. Həmin reaksiyaların sırasında hətta Azərbaycanı radikal addımlar atmağa səsləyən də olub. Bu xüsusda tez bir zamanda Azərbaycanın hərbi əməliyyatlara başlamasının, danışıqlar prosesindən çıxmasının zəruri olduğu vurğulanıb. Ancaq Azərbaycanın verdiyi rəsmi reaksiyalardan görünür ki, yeri gəlsə, bütün həmin variantlar da nəzərdən keçirilə bilər. Bu baxımdan da maraqlıdır, Azərbaycanın Paşinyanın son “miatsum” sərsəmləməsinə verdiyi cavabı qənaətbəxş saymaq olarmı?
Politoloq Yeganə Hacıyeva qəzetimizə bildirdi ki, Azərbaycanın son davranışları çox doğrudur: “Qeyd edim ki, Ermənistanın siyasi səriştəsiz, təhlükəsizlik proseslərində təcrübəsiz, populist Baş naziri və komandası ölkəsində hər keçən gün daha çox nüfuz itirir.
Küçələrdən hakimiyyətə gəlmiş Nikol Paşınyan və komandasının dövlət aparatının idarəçiliyi elə küçədə etirazçı kütlə liderinin idarəçiliyidir. Kütlənin idarə olunmasına yarayan populizm dövlət idarəçiliyinə yaramır. Bu isə, yuxarıda qeyd etdiyim kimi, Paşinyana hər keçən gün daha çox nüfuz itkisi gətirir. Sosioloji araşdırmalar və sorğuların nəticəsi belədir ki, inqilabın əvvəlində Paşınyanın arxasınca gedən kütlə belə xəyal qırıqlığına uğrayıb və artıq sıravi erməni vətəndaşa aydındır ki, ölkəni səriştəsiz və boşboğaz bir Baş nazir idarə edir.
Belə olan halda, Paşınyan və komandasının, özündən əvvəlki sələflərinin də hər çətinliyə düşərkən istifadə etdikləri köhnə manevrə, Azərbaycanla müharibə mövzusuna əl atır”.
Ekspert hesab edir ki, birmənalı olaraq qeyd etmək lazımdır ki, hazırda Azərbaycanla müharibə bütün risqlərə rəğmən, Nikol Paşınyan üçün komandasını və daxili auditoriyanı sakitləşdirmək və gözünü qorxutmaq üçün arzu etdiyi bir məqamdır: “Bununla Baş nazir cəmiyyətdəki, komandadaxili etirazları sakitləşdirmək və beynəlxalq ictimaiyyəti fakt qarşısında qoymaq məqsədini güdür: “Bu üç - cəmiyyət, hakim komanda və beynəlxalq ictimaiyyət məqamından sonuncu ikisinin üzərində xüsusi dayanmaq istəyirəm.
Birincisi, hakim komanda - İnqilab sonrası formalaşdırdığı komandasında çoxluğun təmsilçiliyi və bu qruplar arasında balans manevri üzərində uzunmüddətli plan quran Paşınyanın son aylar komandasında balansa nəzarət edə bilməməsi sezilir. Qrup daxilində Baş nazirin həyat yoldaşının komandası adlandırılan qərbpərəst, Soros uşaqlarının oliqarxiya və rusiyayönümlü qüvvələrlə biznes mövqe və maraqlar üzərindən mübarizəsi aydın sezilməkdədir. Bu qrupdaxili gərginliyin aradan qaldırılması üçün bir neçə günlük müharibə Paşınyana müvazinətini saxlamağa kömək edəcək.
Beynəlxalq ictimaiyyət adlandırdığımız qrup üçün isə Qərb ölkələri, USAİD, OSCE, Avropa Birliyi, ŞT və s. kimi təşkilatlarda son illər aktiv, Paşınyan hökuməti ilə isə astronomik sürətlə mövqe itirən Ermənistan üçün bu təşkilatlarda Azərbaycanın bu uğurlu fəaliyyətinin dayandırılması üçün şantaj məqsədli müharibə göydəndüşmə bir məqam olacaq və bu üzdən Paşınyan torpaq itkiləri hesabına olsa belə, müharibə etməkdə maraqlıdır. Məsələn, keçən il may ayının 20-28-i tarixlərində Naxçıvanın Günnüt ərazilərində Azərbaycan Ordusunun qələbəsi ilə nəticələnən döyüşləri və s. xatırlatmaq kifayətdir.
Gəlirik Azərbaycanın reaksiyası, daxili müharibə çağırışları və bunu edən dairələrin məqsədləri və s. Öncəliklə Paşınyanın sərsəmləmələrinə Azərbaycan hökuməti ən yüksək səviyyədə cavab verir və bu proses davam edir. Azərbaycan XİN-i və Prezident Administrasiyasının Xarici məsələlər üzrə şöbəsi Azərbaycan Prezidentinin və hökumətinin Dağlıq Qarabağ konfliktinin həlli strategiyasına uyğun olaraq mövqe sərgiləyirlər. Bu proses beynəlxalq hüquqa, ərazi bütövlüyümüzün bərpası və milli maraqlara uyğun olaraq, sistemli şəkildə regiondaxili digər siyasi, iqtisadi təhlükəsizlik maraqlarının müşayiətilə diplomatik riçaqlarla həll mərhələsindədir. Bu o demək deyil ki, Azərbaycan prosesi ancaq diplomatik rıçaqlarla davam etməkdə maraqlıdır. Azərbaycanın konfliktin hərbi yolla həlli seçimi mövcuddur, bunun üçün onun hərbi potensialı və siyasi nüfuzu kifayət edir. 2016, 2018-ci illərdə olduğu kimi, Ermənistanin daxili auditoriyasını sakitləşdirmək üçün atdığı təxribatlara Azərbaycan Ordusunun qətiyyətli cavabı buna nümunədir.
Gəlirik Azərbayandaxili müxalif siyasi və radikal qrupların, hibrid alətlər kimi tanıdığımız müxalif səhifələr və ya xarici kəşfiyyatlara bağlılığı şübhə doğurmayan blogerlərin bu mövzu ətrafında spekulyasiyası mövzusuna. 2016-cı ildə erməni mediasının xəbərlərini tirajlayan, Cocuq Mərcanlı və Günnüt əməliyyatlarının uğuruna şübhə salmağa çalışan qüvvələrin Paşinyanın sərsəmləmələrinin ətrafındakı psevdovətənpərvərliyi anlaşılandır. Xüsusilə 90-cı illərdə sərhəddə müharibə zamanı öz hakimiyyətini qorumaq üçün ordunu sərhəddən ölkənin digər hissələrinə çəkən hökumətdə təmsil olunan müxalifətçilərin bu mövzuda canfəşanlığı səmimi deyil. Paşinyan və ya digər erməni hökumətləri bu qüvvələrin hakimiyyəti dövründə Dağlıq Qarabağda möhkəmlənmiş və işğal siyasətini uğurla yürütmüşlər. Azərbaycan cəmiyyəti də, biz də bu "psevdopatriot" və "psevdoqəhrəmanların" “şücaətinə” bələdik”.
Məhəmmədəli QƏRİBLİ
.jpg)
.jpg)
