ABŞ kəşfiyyatının hesabatından sonra Rusiyanın Azərbaycana münasibəti dəyişəcək...
Xaqani Cəfərli: "Rusiya ilə Ermənistan arasında münasibətlərin gələcəyini Rusiya-Ukrayna müharibəsinin nəticələri həll edəcək"
ABŞ Müdafiə Kəşfiyyat Agentliyi (DİA) 2025-ci il üçün Qlobal Təhlükəsizlik və Ətraf Mühitin Qiymətləndirilməsi hesabatını açıqlayıb.
Hesabatda xüsusilə qeyd olunur ki, Rusiya ilə Ermənistan arasında münasibətlər ötən il Ermənistanın Kollektiv Təhlükəsizlik Müqaviləsi Təşkilatından çıxmaqla hədələməsi ilə pisləşib. Hesabatda qeyd olunur ki, Rusiya erməni demokratiyasını və onun daha çox qərbyönlü rəhbərliyini gözdən salmağa yönəlmiş informasiya fəaliyyətinə əl atıb.
"Gürcüstanda Rusiya, demək olar ki, ölkəni öz təsir dairəsinə qaytarmağa çalışır. Ötən ilin oktyabrında keçirilən parlament seçkilərindən sonra "Gürcü Arzusu" partiyasının rəhbərlik etdiyi hökumət ölkədə Rusiyanın təsirinin güclənməsinə şərait yaradıb", - hesabatda deyilir.
Umumiyyətlə, bu tip hesabatlar ABŞ siyasətinə hansısa formada təsir göstərə bilir, yoxsa sadəcə ictimai rəyə müəyyən təsirdən başqa heç bir effektə malik deyil?
Məsələyə münasibət bildirən politoloq Xaqani Cəfərli baki-xeber.com-a açıqlamasında bildirdi ki, ABŞ Müdafiə Kəşfiyyat Agentliyi (DİA) 2025-ci il üçün Qlobal Təhlükəsizlik və Ətraf Mühitin Qiymətləndirilməsi hesabatında Rusiyanın Gürcüstan üzərində nəzarətini gücləndirməsi, buna „Gürcü Arzusu“ hökumətinin şərait yaratması haqqında qənaətə təsirsiz qala bilməz: "Nəzərə almaq lazımdır ki, ABŞ nəhəng dövlət aparatına malikdir. Nəhəng dövlət aparatı siyasətini məhz belə hesabatların üzərində qurur. Belə hesabatlar Konqres, Dövlət Demaprtamenti və Pentaqon başda olmaqla ABŞ-ın nəhəng dövlət aparatının siyasət və qərarlarının müəyyən edilməsinə ən çox təsir edir. Bütün bunlara görə belə demək olar ki, ABŞ Müdafiə Kəşfiyyat Agentliyinin 2025-ci il üçün Qlobal Təhlükəsizlik və Ətraf Mühitin Qiymətləndirilməsi hesabatında Gürcüstanla bağlı qeydləri “Gürcü Arzusu“ hökuməti haqqında yaxın zamanlarda veriləcək qərarın əsasını təşkil edəcək.
Qənaətimcə, postsovet məkanında Putin rejimindən sonra ən təhlükəli vəziyyətdə olan iqtidar “Gürcü Arzusu“ hökumətidir".
Ekspert onu da əlavə etdi ki, ABŞ Müdafiə və Kəşfiyyat Agentliyinin hesabatında Ermənistanla bağlı hissədə Moskva ilə İrəvan arasında münasibətlərin vəziyyəti dəqiq göstərilib: "Ermənistanın KTMT-dən çıxmaq niyyətini ifadə etməsi Rusiyanın postsovet məkanını öz təsir dairəsində saxlamaq siyasətinə ağır zərbə olduğu üçün iki ölkə arasında münasibətlər pisləşib. Moskva Ermənistanın Rusiyanın təsir dairəsindən çıxmaq istəyini Paşinyan hökumətinin Avro-Atlantik strukturlara inteqrasiya siyasətinin bir parçası hesab edir. Buna görə də Paşinyan hökumətini gözdən salmaqla devirməyə çalışır. Hələlik Moskvanın bütün cəhdlərinə baxmayaraq, Paşinyan hökuməti mövqelərini qoruyub saxlaya bilir.
Rusiya ilə Ermənistan arasında münasibətlərin gələcəyini Rusiya-Ukrayna müharibəsinin nəticələri həll edəcək. Hərb meydanındakı vəziyyət Moskvanın postsovet məkanı ilə bağlı istək və arzularını gerçəkləşdirməsinə imkan vermir. Ona görə də hələlik informasiya müharibəsi aparılır. Qərb isə Ermənistanın Avro-Atlantik strukturlara inteqrasiyası, Rusiyanın təsir dairəsindən çıxmaq siyasətini qarşıdakı aylarda daha güclü dəstəkləyə bilər".
Akif NƏSİRLİ
