Baş nazir Nikol Paşinyanla müxalif “Hayastan” fraksiyasının rəhbəri Seyran Ohanyan arasında baş verən səs-küylü insidentdən bir həftə keçməmiş Baş Prokurorluq Ohanyanın oğluna qarşı cinayət işinin məhkəməyə göndərildiyini açıqlayıb. İş “Lələ Təpə əməliyyatı” kimi tanınan 44 günlük müharibənin epizodlarından birinə aiddir və əsas təqsirləndirilən şəxs Seyran Ohanyanın oğlu Artur Ohanyandır.
Prokurorluğun məlumatına görə, keçmiş müdafiə nazirinin oğlu “Lələ Təpə əməliyyatı”nda uğursuzluqla üzləşib. Polkovnik Ohanyana müharibə zamanı Müdafiə Ordusu komandanı tərəfindən Horadizin qərb kənarında hücuma keçmək və pozulmuş xətti bərpa etmək tapşırığı verilmişdi. Ohanyan, hüquq-mühafizə orqanlarının məlumatına görə, əks-hücum zamanı hərbi xidmət qaydasına əməl etməyib və hərbi vəzifələri yerinə yetirməkdən imtina edib. Prokurorluğun məlumatında deyilir: “Artur Ohanyanın döyüş əməliyyatlarının aparılması qaydasını düzgün yerinə yetirməməsi, zəif rəhbərlik etməsi, tabeliyində olan bölmələr arasında əlaqənin təmin olunmaması, döyüş qaydasının pozulması, qüvvə və vasitələrin nizamsız bölgüsü, qarşı tərəflə döyüşlərdə gələcək hərəkətlərin miqyasını planlaşdırmaması müəyyən olunub. Bölmələr onun əmri ilə döyüşə cəlb olunduqdan sonra və əməliyyat nöqtəsinə çatdıqdan sonra bu problemlər üzə çıxıb”. Polkovnikin atası, keçmiş müdafiə naziri Seyran Ohanyan bildirib ki, nəinki bunu, ümumiyyətlə, hər hansı hərbi əməliyyatı açıq şəkildə şərh etmir. O, həm də oğlunun əmri yerinə yetirdiyini vurğulayıb: “Oğlum rəhbərlik etmədiyi əməliyyatlarda iştirak edib, o, sadəcə olaraq həmin əks-hücumda iştirak edib, rəhbərliyi, məncə, “Müdafiə Ordusu”nun komandanı həyata keçirib”. 44 günlük müharibənin həmin mərhələsində Qarabağdakı separatçı rejimin “ordusunun” komandiri Cəlal Arutyunyan olub. Lakin təxminən il yarım əvvəl Lələ Təpə yüksəkliyini geri almaq cəhdi epizodunda ona bəraət verilib və məlum olub ki, əməliyyatı aparan Arutyunyan olmayıb. Seyran Ohanyan bununla arzılaşmır və o, hərbi-siyasi rəhbərliyin məsuliyyət daşıdığını bildirir: “İlk növbədə yuxarıdan, hərbi-siyasi vəziyyətin qiymətləndirilməsi nəticəsində qərarlar qəbul edən və orduya dəstək verən, orduya baxan, ölkənin dərinliklərində də müxtəlif növ kompleks dəstək tədbirləri həyata keçirən səviyyədən araşdırma başlamalıdır. Müdafiə siyasətində problemləri olan bütün icra strukturları araşdırmaya cəlb olunmalıdır”.
Xatırladaq ki, baş nazir Nikol Paşinyan hələ 2021-ci ildə parlamentdə Lələ Təpə məsələsindən danışıb. Nikol Paşinyan bununla bağlı müzakirələrdə iştirak etdiyini inkar etməyib, lakin təpənin içğalı ilə bağlı göstəriş vermədiyini bildirib: “İndi deyirlər ki, Serj Sarkisyanın Lələ Təpəni təhvil verməsi ilə bağlı səhvinin düzəldilməsi üçün qərarı mən verdim. Guya dedim ki, gedin, oranı ələ keçirin, o kontekstdə də 700 itki oldu. Mən belə əmr verməmişəm,bununla bağlı iddialar tam cəfəngiyyatdır. O əməliyyat təklifinin müəllifi general idi, general o təklifi məqbul saydı, general o təklifi məqbul hesab etdi, baş nazir həmin təklifin həyata keçirilməsi imkanını dəyərləndirdi”. Paşinyan o zaman ittiham oxlarını Cəlal Arutyunyana tuşlayırdı. Cəlal Arutyunyan 44 günlük müharibədən sonra susqunluq nümayiş etdirərək, hakimiyyətin müharibənin məğlubiyyətində hərbçilərə ünvanladığı müxtəlif ittihamları cavabsız qoyub. Paşinyanın ötən həftə MTN zirzəməsinə göndərməklə hədələdiyi Seyran Ohanyan isə təkid edir ki, oğlunun başına gələnlər onu sıradan çıxarmaq üçün edilir: “Şəxsiyyətimlə müəyyənləşən çox şeylər görürəm, amma çoxlarından fərqli olaraq, heç vaxt bu məsuliyyətdən qaçmıram. Gördüyünüz kimi, mən əvvəllər məmur olmuşam, indi Ermənistandayam, müxtəlif məhkəmə proseslərində, dindirmələrdə intensiv iştirak edirəm və heç vaxt bundan qaçmıram. Oğlumla mənim vətənimizdən başqa gedəcək yerimiz yoxdur”. Seyran Ohanyanın oğlu Artur Ohanyanın barəsində çıxarılan ilk qərar isə onun ölkədən çıxışına qadağa qoyulmasıdır. Artur Ohanyana qarşı “hərbi vəziyyət, müharibə və ya döyüş şəraitində xidmətə səhlənkar münasibət” maddəsi ilə cinayət işi başlanıb. Qeyd edək ki, hələ 4 il əvvəl erməni politoloq, “Nəsillər üçün həqiqət” vətəndaş təşəbbüsü qrupunun rəhbəri Qeqam Nazaryan 44 günlük Vətən müharibəsi barədə mühüm faktlar açıqlayıb. Nazaryan 2020-ci il oktyabrın əvvəllərində Ermənistan ordusunun Cəbrayıl rayonu istiqamətində keçirdiyi “Lələ Təpə” əməliyyatının uğursuzluğa düçar olmasından danışıb: “Lələ Təpə” əməliyyatı əsl soyqırımı idi. Bizim 650 ölümüz var idi, 44 tankdan 42-si döyüş meydanında qaldı”. 2020-ci ilin payızında 44 günlük müharibə zamanı erməni hərbçilərin eyniadlı yüksəkliyi nəzarətə götürmək cəhdi düşmən üçün böyük uğursuzluqla nəticələnib. Məlumatlara görə, erməni ordusuna hücum əmrini respublikanın baş naziri Nikol Paşinyan verib. Bununla, o Serj Sarkisyanın Ermənistan prezidenti olduğu 2016-cı ilin aprelində Azərbaycan Silahlı Qüvvələri tərəfindən azad edilmiş ərazini yenidən işğal edə biləcəyinə ümid edirdi. Amma düşmən üçün tamam əks mənzərə yaşandı.
Nahid SALAYEV
