Hüseyn İbrahimov: “İsrail ABŞ hərbi yardımından imtina edə bilməz”
İsrailin baş naziri Benyamin Netanyahu ölkəsinin ABŞ-dan hər il aldığı Amerika hərbi yardımı məsələsinə yenidən baxılmasının vacibliyini bəyan edib. Bu barədə İsrailin “Maariv” qəzeti məlumat yayıb.
Məlumatda qeyd edilir ki, Nazirlər Kabinetinin rəhbəri belə bir bəyanatla parlamentin xarici işlər və təhlükəsizlik komitəsinin qapalı iclasında çıxış edib. Nəşr Netanyahudan sitat gətirib: “Silahlara görə təxminən 4 milyard dollar alırıq. Düşünürəm ki, bir vaxtlar iqtisadi yardımdan yorulduğumuz kimi, nə vaxtsa bundan da yorulacağıq”.
Oxşar məlumatı KAN telekanalı da yayıb. “Düşünürəm ki, biz Amerikadan təhlükəsizlik sahəsində yardım almağı dayandırmalı olacağıq”, - dövlət televiziyası bildirib.
Məsələnin maraqlı tərəfi odur ki, ABŞ prezidenti Donald Tramp Ər-Riyadda səfərdə olarkən Səudiyyə Ərəbistanı ilə 142 milyard dollarlıq silah sazişi imzaladıqdan sonra İsrailin hərbi yardımdan imtina etmək istəməsi barədə məlumatlar yayılır. Maraqlıdır, nədir bu reaksiya və İsrail nədən narahatdır? Doğrudanmı İsrail ABŞ hərbi yardımından imtina edə bilər? Ümumiyyətlə, Yaxın Şərqdə proseslər necə gedəcək?
“Təl-Əviv bütün bunların Yaxın Şərqdə onun əleyhinə geosiyasi vəziyyəti nə vaxtsa dəyişəcəyindən narahatdır”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimov buna birmənalı yanaşmadı: “Əvvəla, İsrail ABŞ hərbi yardımından imtina edə bilməz. Praktiki olaraq bu mümkün deyil. Buna getsələr, bu, İsrail üçün fəlakətli ola bilər. Çünki ABŞ-ın İsrailə hərbi yardımı bu ölkə üçün önəmli əhəmiyyət kəsb edir. Bununla yanaşı, İsrailin hərbi sənayesi ABŞ-la çox bağlıdır. Bir sıra silah komponentləri, detallar məhz ABŞ-dan gəlir. Bu, məsələnin birinci tərəfi. Məsələnin ikinci tərəfinə gəldikdə isə, bəli, Netanyahu hakimiyyəti ABŞ-la Səudiyyə Ərəbistanında imzalanan böyük məbləğdə silah sazişindən ciddi narahatdır. Düzdür, Tramp əsasən iqtisadi maraqlardan çıxış edərək Səudiyyə kimi varlı ölkə ilə belə bir saziş imzalayıb. Ancaq İsrail ərəb ölkələrini özünə düşmən hesab etdiyindən, bunu özü üçün təhlükə kimi görür. İsrail istəmir ki, hansısa ərəb ölkəsi ABŞ istehsalı olan müasir hərbi təyyarələrə və havadan müdafiə sistemlərinə malik olsun. Söhbət təkcə Səudiyyə Ərəbistanından getmir. Söhbət həm də Qətər və Birləşmiş Ərəb Əmirlikləri ilə imzalanan silah sazişlərindən gedir. İsrail bütün bunların Yaxın Şərqdə onun əleyhinə geosiyasi vəziyyəti nə vaxtsa dəyişəcəyindən narahatdır. Üstəlik, Tramp Səudiyyədə Suriya prezidenti əş-Şaraanı da qəbul etdi. Halbuki, ara-sıra İsrail Suriyanı bombalayır. Bundan başqa, ABŞ və İran arasında danışıqların başlanması, milli təhlükəsizlik üzrə müşaviri Mayk Uolsun vəzifəsindən azad edilməsi, həmçinin Vaşinqtonun Yəmən husiləri ilə atəşkəs rejiminə dəstək verməsi də İsraili narahat edir. Kiminsə ağlına gəlməzdi ki, İsrailin maraqlarından çıxış edən Tramp qısa müddət ərzində belə addımlar atacaq”.
Vidadi ORDAHALLI
