Əli Orucov: "Erməni lobbisinin pulu hesabına öz ölkəsinin maraqlarını satan parlamentarilərin olması haqqında da fikirlər səsləndirilib"
Türkiyənin tanınmış nəşrlərindən olan “Turkiye gazetesi” və Observer Online-ın açıqladığı sənədlərə görə, Fransa Prezidentinin Mühafizə Xidmətinin rəhbəri Aleksandr Benalla və Fransanın “Saur” şirkətinin Azərbaycanda istintaq altında olan vitse-prezidenti Anass Derrazın milyarderlərin aktivlərinə qarşı sanksiyaların ləğvi müqabilində külli miqdarda rüşvət aldıqları üzə çıxıb.
Sənədlərə görə, 2018-ci ildə Fransa rəsmiləri Azərbaycan əsilli rusiyalı milyarder Fərhad Əhmədovdan rüşvət tələb ediblər. Bunun müqabilində onlar Əhmədovun dəbdəbəli “Luna” yaxtasının beynəlxalq həbsdən azad edilməsini təmin edəcəklərini vəd ediblər.
Əhmədov milyonlarla dollarlıq bu rüşvətin bir hissəsini Aleksandr Benallanın BANK OF AFRICA UNITED KINGDOM PLC SC PAR-dakı hesabına və Anass Derrazın AL HILAL BANK-dakı hesabına köçürüb.
Özlərini demokratik, öncül, supergüc adlandiran, dunyaya ağıl verən dövlətlərin hökuməti nədən belə korrupsiyada boğulur? Özü də öz blokunun əleyhinə? Sanksiyalari axı ABŞ və Avropa tətbiq edir...
Baki-xeber.com saytınin sualını cavablandıran politoloq Əli Orucov bildirdi ki, Fransada yüksək dövlət adamlarının korrupsiyada adlarının keçməsi barədə qalmaqal yaradan məlumatlar zaman-zaman mətbuata sızıb: "Hətta keçmiş prezident Sarkozi barədə qaldırılan korrupsiya iddiaları məhkəmədə öz təsdiqini tapdı. Korrupsiya Fransanın parlamentinə də ayaq açıb. Erməni lobbisinin pulu hesabına öz ölkəsinin maraqlarını satan parlamentarilərin olması haqqında da fikirlər səsləndirilib. Hazırkı prezident Makronun ən yaxın adamlarından biri hesab edilən keçmiş Mühafizə Xidmətinin rəhbərinin də adı korrupsiya qalmaqalında hallandırılır. Məlum olur ki, o həm də çirkli pulların yuyulmasında fəal iştirak edib. Ayrı-ayrı şəxslərdən külli miqdarda pul qopara bilib. Bunun müqabilində onlara qanunsuz əməllərinin
ört-basdır edilməsində köməklik göstərib. Həmin himayədarlıqlar da külli miqdarda rüşvət alınması hesabına başa gəlib. Göründüyü kimi, Fransada rüşvət və korrupsiya ən yüksək səviyyələrə yol açıb və bu barədə danışan da yoxdur. Ancaq başqalarında nöqsan axtarırlar. Məhz bu yürüdülən qərəz və qeyri-obyektivlik səbəbindən Fransa öz beynəlxalq nüfuzunu sürətlə itirir"
Dəniz NƏSİRLİ
