ABŞ Rusiyasız “Bakı-İrəvan sazişi” iddiasını açıq ortaya qoydu...

ABŞ-ın ATƏT-dəki səfiri Maykl Karpenter bəyan edib ki, ABŞ Qarabağ məsələsində Rusiya ilə dialoq apara bilməz, lakin rusların tərəfləri müzakirəyə dəvət etdiyini bilirlər:

“Ukraynaya qarşı müharibə Rusiyanın iştirak etdiyi çoxsaylı formatlara təsir edib, çünki Moskva beynəlxalq sistemin normalarını o dərəcədə pozub ki, onunla əməkdaşlıq yollarını tapmaq çətindir. Lakin eyni zamanda ABŞ Ermənistanla Azərbaycan arasında münasibətlərin, sərhədlərin həllinə, ədalətli və davamlı sülh axtarışına diqqət yetirib. Məhz buna görə də biz Ermənistan və Azərbaycanla ikitərəfli, üçtərəfli görüşlərdə iştirak edirik və Avropa İttifaqının, xüsusən də Avropa Şurasının rəhbəri Şarl Mişelin səylərini yüksək qiymətləndiririk. Hazırda biz rusların hərəkətləri ətrafında dialoq apara bilmərik”.

Diplomat onu da bildirib ki, Qarabağdakı vəziyyəti son dərəcə ciddi hesab edir.

Maraqlıdır, Rusiya prosesdə olmadığı halda imkan verəcəkmi Azərbaycanla Ermənistan arasında sülh əldə olunsun?

• “ABŞ bir tərəfdən vasitəçilik mövqeyindən çıxış edir, o biri tərəfdən Dövlət Departamenti...”

Məsələ ilə bağlı “Bakı-Xəbər”ə açıqlama verən media eksperti Yadigar Məmmədli hesab edir ki, Rusiyanın iştirakı olmadan məsələnin həlli real görünmür: “Əvvəla,  bu cəhdlər çoxdan var. 44 günlük müharibəni Rusiya dayandırdı. Daha sonra Rusiyanın vasitəçiliyi ilə 2021-ci ilin yanvarında Moskvada və ondan sonra bır sıra şəhərlərdə görüşlər keçirildi. Bir sıra sənədlər qəbul olunub. Ancaq çox təəssüflər olsun ki, ötən 3 il ərzində Qarabağ məsələsinin nizamlanması ilə əlaqədar ortada ciddi nəticə yoxdur. Ermənistan öhdəliklərini yerinə yetirmir. Ancaq o da var ki, ABŞ və Avropa İttifaqı prosesdən kənarda qalmalarını həzm edə bilmirlər. Onlar vasitəçilik missiyasının təkcə Rusiya tərəfindən aparılmasını qəbul etmədilər. Bu səbəbdən həm Avropa İttifaqı, həm də ABŞ tərəflər arasında vasitəçilik edir. Bir neçə dəfə Brüsseldə və Vaşinqtonda tərəflər arasında danışıqlar keçirilib. ABŞ bir tərəfdən vasitəçilik mövqeyindən çıxış edir, o biri tərəfdən Dövlət Departamentin Avropa və Avrasiya məsələləri üzrə Bürosunun köməkçisi Yuri Kim Senatda Azərbaycan əleyhinə qərəzli mövqe sərgiləyir. Təbii ki, bütün bunlar bir-biri ilə uzlaşmır. Tam əksinə, erməni separatçılarını ruhlandırır. İndi də ABŞ-ın ATƏT-dəki səfiri Maykl Karpenter Qarabağ məsələsində Rusiya ilə dialoqun mümkünsüzlüyündən danışır. Düzdür, Ukrayna müharibəsi səbəbindən Vaşinqton-Moskva münasibətləri gərgindir. Ancaq onu da nəzərə almalıyıq ki, Rusiya Qarabağda mövcuddur. Üstəlik, Ermənistan Rusiyanın müttəfiqidir. Belə olan halda bütün bunları necə inkar etmək olar?”.

Vidadi ORDAHALLI