Qulamhüseyn Əlibəyli: “Onların Qarabağla bağlı bir sıra məkrli planları fiaskoya uğradı”
Laçın yolunda nəzarət buraxılış məntəqəsinin quraşdırılmasını qəbul edə bilməyən ermənilər hay-həşir salmaqda davam edirlər. Öz suveren ərazisində sərhədlərinə nəzarət edən müstəqil ölkənin daxili işlərinə qarışmaq və onlara zərrə qədər də aidiyyəti olmayan məsələlərə burnunu soxmaqdan utanmayan erməni tərəfi yenə Beynəlxalq Məhkəməyə üz tutub.
Yeni şikayət Laçın yoluunda sərhəd-buraxılış məntəqəsi ilə bağlıdır. Guya Laçın yolunda vəziyyət dözülməzdir və Qarabağda yaşayan ermənilərin hüquqları pozulur. Qeyd edək ki, bu ilin fevralında Ermənistan Azərbaycan əlehinə Beynəlxalq Məhkəmədə qərar çıxarılmasına nail olub. Ancaq bu, nəyisə dəyişə bilmədi. Ermənilərin Laçın yolu ilə bağlı yenidən belə şou yaratmalarının səbəbi bəllidir. Məsələ ondadır ki, Laçın yolunun başlanğıcında aprelin 23-də Azərbaycanın qurduğu nəzarət-buraxılış məntəqəsi, yaratdığı rejim rəvan şəkildə işləməyə başlayıb. Artıq oradan keçən ermənilər də buna alışıb və bu rejim oturuşub. Oradan yayılan videolardan da aydın şəkildə görünür ki, ermənilər rahat formada gedib-gəlir, heç bir problem yaranmır. Bir sözlə, aprelin 23-dən sonra Azərbaycanın Laçın yolunda yaratdığı yeni rejimin artıq rəvan işləməyə başlaması Ermənistanı qorxuya salıb. Ona görə də başlayıblar prosesə böhtan atmağa.
- “Ermənilər elə bilirdilər ki, NBM qurulsa, beynəlxalq birlik, o cümlədən Rusiya buna kəskin müqavimət göstərəcək”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəyli də hesab edir ki, Ermənistan Laçın yolunun normal işləməsindən narahat olduğu üçün bu yolla vəziyyəti dramatikləşdirməyə çalışır: “Hesab edirəm ki, bu, növbəti erməni həyasızlığının təzahürlərindən biridir. Ermənilər daim belə həyasız işlərlə məşğul olurlar. Bununla Azərbaycanı beynəlxalq aləmdə sıxmaq istəyirlər. Ancaq istənilən halda, bu cür səylər, Beynəlxalq Məhkəməyə müraciətlər yersizdir. Ona görə ki, hər bir dövlət öz ərazisində istənilən nəzarət-buraxılış məntəqələri qurmaq, gedib-gələnlərə nəzarət etmək imkanına malikdir. Çünki bütün bunlar dövlətin suveren hüququdur. Bir dövlətin ərazisindən başqa dövlətin ərazisinə keçmək istəyən şəxslər qanun və qaydalara tabe olmalıdılar. Ona görə də Ermənistandan Qarabağa gələn və əks istiqamətdə gedən ermənilər yoxlamadan keçməlidilər. Nəzərə almaq lazımdır ki, Ermənistan 86,6 min kvadrat kilometrlik Azərbaycan ərazisini tanıyıb. Ancaq reallıq ondan ibarətdir ki, Ermənistan Laçın yolunun başlanğıcında nəzarət-buraxılış məntəqəsinin normal işləməsindən narahatdır. Çünki onların Qarabağla bağlı bir sıra məkirli planları fiaskoya uğradı. Onlar həmin yolla qanunsuz olaraq silah daşıyırdılar. Bunun qarşısı alındı. Ermənilər elə bilirdilər ki, nəzarət-buraxılış məntəqəsi qurulsa, beynəlxalq birlik, o cümlədən Rusiya buna kəskin müqavibət göstərəcək. Bəzi növbətçi və formal xarakterli bəyanatlar xaric gözləntilərin heç biri baş vermədi. Erməni tərəfi gözləyirdi ki, sərhəddə ermənilərlə Azərbaycan sərhədçiləri arasında ciddi insidentlər, qarşıdurmalar yaşanacaq. Ancaq bu da baş vermədi. Etnik ermənilər normal şəkildə oradan yoxlamadan keçir. Ona görə də dəliyə dönən ermənilər Beynəlxalq Məhkəməyə müraciət etməklə gərginlik yaratmağa cəhd edirlər. Ancaq bu da nəyəsə yaramayacaq. Bu ilin fevralında Beynəlxalq Məhkəmənin çıxardığı qərar birmənalı olaraq Azərbaycanın ziyanına deyildi. Qərarda deyilirdi ki, daxili qaydalara əməl olunmaqla sərbəst gediş-gəlişə riayət olunmalıdır. Ona görə də ermənilərin indi tuta biləcəyi bir saman çöpü qalıb. O üzdən, yenidən Beynəlxalq Məhkəməyə müraciət ediblər, amma bunun bir faydası olmayacaq”.
Vidadi ORDAHALLI
