“Avroparlament” erməni “quyruğuna” çevrildiyini yanvarın 18-də bir daha göstərəcək...
Erməni mediasının verdiyi məlumata görə, Avropa Parlamentinin yanvarın 18-də keçiriləcək plenar iclasının gündəliyinə “Dağlıq Qarabağdakı blokadanın humanitar nəticələri” mövzusunda təxirəsalınmaz debat-müzakirələr daxil edilib. Bu barədə Avropa Parlamentinin rəsmi saytında məlumat verilib.
Aİ-nin icra orqanları ilə planlaşdırılan debatda Avropa Parlamentinin deputatları çıxış edəcək və eyni mövzuda təcili qətnamənin qəbul edilib-edilməməsi ilə bağlı səs verəcəklər.
Qeyd edək ki, azərbaycanlı ekoloqlar bir aydan artıqdır Laçın yolunda ekoloji tələblərlə aksiya keçirirlər. Ermənilər saxta təbliğatla bütün dünyaya bunu “blokada” kimi təqdim etməyə çalışırlar.
Avroparlamentin erməni təsirlərinə bu qədər uymasının səbəbi nədir? Bu cür təsisat niyə belə yalan ittihama qoşulub?
Politoloq Yeganə Hacıyeva “Bakı-Xəbər”ə açıqlamasında bildirdi ki, Avropa Parlamentinin erməni yalanlarına bu qədər qucaq açmasını sadəcə oradakı erməni lobbisinin güclü olması ilə izah etmək olmaz: “Burada da başqa nüanslar var. Avropa institutlarında Azərbaycana qarşı kampaniya məhz elə ölkəmizin onlara yaxınlaşmaq istədiyi dönəmlərdə bsş verib. Görünən budur ki, Avropa Birliyi Azərbaycanla yaxınlaşmaqda maraqlıdır, ancaq Avropa Parlamenti yox. Bunun özü olduqca maraqlı bir məqamdır. Təbiidir ki, bunun da izahı var. Keçmiş sosialist coğrafiyasına aid ölkələrdən olan siyasətçilərin çoxi Kremldən maliyyələşir. Onlar həlledici məqamda öz fəaliyyətlərini göstərir ki, AB ilə Azərbaycan eyni orbitdə olmasın. Təbiidir ki, bunu Moskvanın göstərişi ilə edirlər. Mane olanlardan biri də erməni lobbisidir. Bir də üçüncü bir xətt var. Bəllidir ki, Avropa Birliyinin enerji bazarına yeni oyunçu girib. Bizim orada yer almağımız çoxlarını qıcıqlandırır. İqtisadi lobbi qrupları da burada öz addımlarını atır. Onlar bütün mümkün təsir alətlərini işə salırlar. Göründüyü kimi, Avropa Parlamentində bizə qarşı 3 əsas qrup fəaliyyət göstərir. Bu 3 qrupun ümumi sayı kifayət edir ki, Azərbaycan əleyhinə çirkin ksmpaniyalar apara bilsinlər”.
Politoloqun sözlərinə görə, son illər Azərbaycanla Avropa İttifaqı arasındakı əməkdaşlıqda əldə edilən uğurlar Avropa Parlamentində Azərbaycanı istəməyən qüvvələri ciddi şəkildə narahat edir: “Azərbaycanın Avropa Parlamenti ilə mövcud olan həm iqtisadi, həm siyasi konstruktiv əlaqələri, yəni münasibətlərin yüksələn xətlə inkişafı Azərbaycanı istəməyən qüvvələri ciddi narahat etməyə başlayıb və onlar Azərbaycana qarşı növbəti dəfə ikili standartlar mövqeyindən, reallıqdan uzaq çıxışlar ediblər. Ancaq bu müzakirələrə baxarkən gördük ki, Avropa Parlamentinin deputatları tərəfindən aparılan müzakirələr bir istiqamətdə təşkil olunub. Azərbaycan-Avropa İttifaqı münasibətlərinə əngəl törədilməsinə nail olmaq istəyirlər. Bu, Azərbaycana qarşı açıq-aşkar qeyri-obyektiv münasibətin göstəricisidir. Halbuki, Avropa Parlamentinin özünün müzakirəsini gözləyən xeyli problemləri var. Misal üçün, Fransada gedən proseslər. Avropa Parlamenti Avropa İttifaqı daxilində olan problemləri müzakirə etsin. Ancaq görürük ki, bu dərəcədə ciddi məsələlər kənara qoyulub və heç bir əsası olmayan, reallığı əks etdirməyən məsələlərlə bağlı müzakirələr təşkil edilir. Ancaq əminəm ki, bu cəhd heç bir nəticə verməyəcək. Azərbaycanla Avropa İttifaqı arasındakı konstruktiv əməkdaşlıq davam etdiriləcək. Bir neçə il bundan əvvəl də Azərbaycanla Avropa Parlamenti arasında gərgin bir dövr yaşanıb. Həmin dövrdə Avropa Parlamenti tərəfindən Azərbaycanla bağlı qərəzli qətnamə qəbul olundu. Azərbaycan da öz növbəsində, hətta Avronest Parlament Assambleyasından çıxdı. Bu proses 2017-ci ildə - Azərbaycanla Avropa İttifaqı arasında hərtərəfli əməkdaşlığa dair sazişin hazırlanmasına və bu istiqamətdə danışıqların aparılmasına başlanıldığı dövrdə gedirdi. Avropa Parlamentindəki anti-Azərbaycan qüvvələrin ölkəmizlə bağlı qəbul etdirdikləri qətnamələr real vəziyyəti əks etdirmədiyinə və ikili standartlara əsaslandığına görə onların heç bir nəticəsi olmadı”.
Məhəmmədəli QƏRİBLİ
