Ermənistan "Arsax"dan imtina edərək "Qarabağa" keçdi - postmüharibə reallıqlarının qəbulu...
Ermənistan parlamenti müxalifətin Azərbaycan Milli Məclisinə ünvanladığı bəyanatı qəbul etməyib. Müxalif “Hayastan” fraksiyasının təşəbbüsü ilə hazırlanan sənəd layihəsini səsvermədə iştirak edən 97 deputatdan cəmi 29 nəfər dəstəkləyib.
Səsvermədən əvvəl iqtidar və müxalifət arasında üç saatlıq danışıqlar prosesi baş tutub və gərgin müzakirələr aparılıb.
Bəyanatın mətnində olan “Dağlıq Qarabağ Respublikası”, “Artsax Respublikası”, “Dağlıq Qarabağın öz müqəddəratını təyinetmə hüququ” və bir sıra başqa ifadələr hakim fraksiyanın xoşuna gəlməyib.
Qeyd edək ki, Ermənistan parlamentinin növbədənkənar iclası çağırılıb. İclasda müxalif “Hayastan” blokunun təklifi ilə noyabrın əvvəllərində Azərbaycan parlamentinin qəbul etdiyi sənədə cavab olaraq bəyanatın qəbul edilməsi təklif olunub.
Bu, belə bir qənaətə gəlməyə əsas verirmi ki, müharibədən sonra yaranan reallıqları və Azərbaycanın tətbiq etdiyi yeni inzibati-ərazi bölgüsünü artıq Ermənistan da qəbul edir?
Azərbaycan Milli İstiqlal Partiyası Mırkəzi Şurasının sədri, politoloq Rəşad Bayramov “Bakı-Xəbər”ə açıqlamasında bildirdi ki, Ermənistan parlamentinin belə bir qərar verəcəyi gözlənilən idi: “Hələ bir həftə əvvəl “Ermənistan” blokunun deputatı, “Daşnaksütyun” partiyasının üzvü İşxan Saqatelyan bildirdi ki, “Vətəndaş” fraksiyası parlamentdə Qarabağ və Ermənistanla bağlı bəyanatın qəbuluna səs verməyəcək.
Müxalifətin hazırladığı bəyanat layihəsində “Qarabağın (separatçı, qondarma rejimin.) öz müqəddəratını təyin etməsi”ndən, “Qarabağın statusu”ndan, eləcə də Ermənistanın öhdəliklərindən bəhs edilir.
Hakim partiyanın “Mülki müqavilə” fraksiyası bəyanatın mətnindən “Artsax Respublikası” ifadəsinin çıxarılmasını və onun “Qarabağ erməniləri” ifadəsi ilə əvəz edilməsini təklif edib. Bundan əlavə, onlar mətndən öz müqəddəratını təyinetmə hüququnun həyata keçirilməsi və Ermənistanın öhdəlikləri ilə bağlı bəndləri çıxarıblar.
Biz görürük ki, müharibədən sonrakı reallıqları Ermənistan yavaş-yavaş qəbul edir. Bunu öz xoşu ilə deyil, məcburən edir. Artıq onların ritorikasında “ikinci erməni dövləti” kimi ifadələrə rast gəlinmir. Daha çox Qarabağdakı ermənilərin hüquq və təhlükəsizliyindən danışırlar. Onlar bilir ki, yenidən “Artsax dövləti” tələbini qabartsalar, Azərbaycan ümumuyyətlə danışıqlardan imtina edər. Çünki bu bizim üçün müzakirə mövzusu deyil. Dəfələrlə demişik ki, status mövzusu bizim üçün bitib. Ancaq ərazimizdə yaşayan hər bir erməni vətəndaşımızın təhlükəsizliyi və hüquqlarının təmin edilməsinə söz veririk. Çünki Azərbaycan dövləti bu öhdəliyi bütün vətəndaşlarına şamil edir. Ermənistan bu tələbdən əl çəksə də, öz qoşunlarını tam olaraq Qarabağdan çıxarmır. Bununla da üçtərəfli bəyanatla üzərinə götürdüyü öhdəliyi həm bizim, həm də Rusiyanın qarşısında pozmuş olur. Çox təəssüflər olsun ki, bölgədəki Rusiya sülhməramlıları da onlara separatçılıq etmək üçün geniş imkanlar yaradır. Paşinyan “Qarabağ Ermənistandır” dedi və nəticəni gördü. İndi anlayırlar ki, daşnakların layihəsini qəbul etməklə Azərbaycanın antiterror əməliyyatının vaxtını tezləşdirmiş olarlar. Buna görə də, reallıqları qəbul etməyə məcburdurlar”.
Məhəmmədəli QƏRİBLİ
