Fərəc Quliyev: “Maduronun səfərini normal sayıram, ona bəslənən mənfi münasibəti isə adekvat saymıram”
Prezident İlham Əliyev iyunun 17-də ölkəmizdə işgüzar səfərdə olan Venesuela Bolivar Respublikasının Prezidenti Nikolas Maduro ilə videokonfrans formatında görüşüb. Görüşün videokonfrans formatında keçirilməsinə səbəb Venesuela nümayəndə heyətinin üzvlərində COVID-19 testinin nəticəsinin pozitiv çıxması olub.
Görüşdə Venesuela Bolivar Respublikasının Prezidenti Nikolas Maduronun regional səfər çərçivəsində Azərbaycana səfər etməsinin önəminə toxunulub və bu, siyasi münasibətlərimizin yüksək səviyyədə olmasının göstəricisi kimi dəyərləndirilib. Venesuela Prezidentinin bu səfərinin əlaqələrimizin inkişafına töhfə verəcəyinə əminlik ifadə olunub.
Nikolas Maduro Azərbaycana üçüncü dəfə səfər etməsindən məmnunluğunu bildirib və Venesuelanın ölkəmizlə əlaqələrə böyük önəm verdiyini vurğulayıb. Qonaq ikitərəfli münasibətlərimizin daha da inkişaf etdirilməsinin zəruriliyini bildirib, çoxtərəfli səviyyədə, o cümlədən Qoşulmama Hərəkatı çərçivəsində görülən işləri müsbət qiymətləndirib.
Söhbət zamanı beynəlxalq təşkilatlar çərçivəsində, o cümlədən Qoşulmama Hərəkatında ölkələrimizin birgə uğurlu fəaliyyət göstərdiyi qeyd edilib. Qoşulmama Hərəkatında Azərbaycanın sədrliyinin bir il də uzadılması məsələsində Venesuelanın dəstəyi vurğulanıb. Azərbaycanın Qoşulmama Hərəkatının təməl prinsipləri olan Bandunq prinsiplərinə sadiq olduğu bildirilib.
Maraqlıdır ki, Azərbaycandakı bəzi radikal müxalifət nümayəndələri Maduro kimi adamın Bakıya səfərini sərt tənqid edir. Onların qənaətincə, Maduronun dünyadakı reputasiyası mənfi olduğu üçün belə siyasətçinin ölkəmizdə səfərdə olması bizə hörmət gətirmir. Nəzərə alsaq ki, Maduro faktiki olaraq Venusuela adlı ölkənin prezidentidir, onda bu iradlar da yersiz görünür. Çünki Azərbaycanla diplomatik münasibətlər quran istənilən ölkə başçısı ölkəmizə rəsmi səfər edə bilər. Bunun əksini düşünmək siyasi təcrübəsizlik və savadsızlığa dəlalət edə bilərmi?
Milli Dirçəliş Hərəkatı Partiyasının sədri Fərəc Quliyev “ Bakı -Xəbər” ə açıqlamasında bildirdi ki, dövlətlərarası münasibətlərdə yanaşma bir qədər fərqlidir: “ Burada dövləti və milli maraqlar prioritet olur. Biz insan hüquqlarını qoruyan təşkilat deyilik, dövlətik. Hər hansı ölkə özünə başçı və parlament seçibsə, bu, artıq həmin xalqla seçilənlərin problemidir. Biz bütün xalqların iradəsinə hörmət etməliyik. Sabah başqasını seçəklərsə, biz onu da qəbul etməliyik. Bir sözlə, bütün dövlətlərlə münasibətimizi normal saxlamalıyıq. Siyasətin əlifbasıdır ki, düşmən ölkələri dosta çevirmək lazımdır. Ərzaq təhlükəsizliyi, humanitar fəlakətlərlə bağlı olaraq qarşıdan çətin dönəm gəlir. Bilmək olmur ki, yeni bloklaşmalar necə təsnifatlanacaq. Belə bir vəziyyətdə çalışıb hamı ilə dost olmalıyıq. Hansısa bir ölkənin başçısına kənarda nə münasibətin olması bizi niyə maraqlandırmalıdır? Səudiyyə Ərəbistanında uzun müddət normal seçki keçirilmədi. Demokratiyadan dəm vuran bütün ölkələrin başçıları onlarla münasibət qurdu, görüşlər keçirdi. Mən bunu normal qəbul edirəm. Dövlətlər üçün öz maraqları əsasdır. Siyasətin klassik formulu var ki, daimi dost və düşmən olmur, daimi maraqlar olur. Mən Azərbaycanın, xüsusilə də yeni açılımlarla bağlı diplomatik gedişlərini normal qəbul edirəm. Artıq yeni dünya düzəni tələb edir ki, hətta Afrika və Latın Amerikası ilə də normal əlaqələr qurulsun. Ona görə də, mən Maduronun səfərini tənqid edənləri diletant sayıram. Bəzi radikallar hakimiyyəti tənqidi bu mövzular üzərində qurmaqla uğursuz gediş edirlər. Ciddi siyasətçinin əsas istəyi hakimiyyətə gələrək dövlətə qulluq etmək olmalıdır. Dovlətdən istifadə edib hakimiyyətə gəlmək məqbul yol deyil. Maduronun səfərini normal sayıram, ona bəslənən mənfi münasibəti isə adekvat saymıram”.
Məhəmmədəli QƏRİBLİ
