Ermənistan siyasiləri, deputatları Qarabağa qanunsuz səfər etməkdə sanki yarışa giriblər. Müvəqqəti olaraq Rusiya sülhməramlılarının nəzarətində olan ərazilərimizi ermənilər “su yoluna” döndərib. Azərbaycanın rəsmi etirazlarına, narazılıqlarına baxmayaraq, Ermənistan siyasiləri, parlamentariləri, QHT təmsilçiləri gah aşkar, gah da gizlin şəkildə Azərbaycan ərazisinə qanunsuz səfər edirlər.
Ermənistan parlamentinin deputatları qanunsuz olaraq Xankəndiyə səfərə gəlib. Bu barədə Ermənistan parlamentinin mətbuat xidməti məlumat yayıb. Bununla bağlı spiker Alen Simonyan sərəncam imzalayıb. Nümayəndə heyəti Xankəndiyə gəlib. Dekabrın 3-5 tarixlərində burada separatçı qrupla birgə dinləmələrdə iştirak edəcək. Deputatların sırasına komissiya sədri Sisak Qabrielyan, deputatlar Taqui Kazaryan, Lilit Qalstyan, Asmik Akopyan, Narek Babayan, Elinar Vardanyan, Akop Aslanyan, Knyaz Həsənov və ekspertlər daxildir.
Erməni parlamentarilər Xankəndiydə niyə gəlib? Məqsəd nədir? Rus sülhməramlılari niyə onların qanunsuz səfərinə imkan yaradır?
“Azərbaycan XİN öz kəskin reaksiyasını göstərəcək”
Siyasi ekspert Rövşən Rəsulov baki-xeber.com-a bildirdi ki, Ermənistan parlamentinin sədri Alen Simonyanın və deputatlar qrupunun 44 günlük Qarabağ müharibəsindən sonra ilk dəfə Xankəndiyə səfərləri və qondarma rejimin “parlamentində” saxta “dinləmələrdə” iştirak etməsi xəbəri həqiqətən də Azərbaycan cəmiyyətində hiddət və qıcıq doğuracaq bir haldır. “Özü də bu informasiyanın erməni mediasında az qala “qəhrəmanlıq”, “şücaət” kimi təqdim edilməsi artıq belə bir qənaətə gəlməyə zəmin yaradır ki, Ermənistan rəhbərliyi heç nəyə məhəl qoymadan Qarabağa qarşı ərazi iddialarından əl çəkməyib və yenidən gərginliyin yaradılması üçün cəhdlər göstərir. Baxmayaraq ki, ötən ilin noyabrında imzalanmış üçtərəfli bəyanatda, həmçinin, bu ilin yanvarında qəbul edilmiş qərarlarda, eləcə də Soçi görüşündə qarşıda dayanan problemlərin həll edilməsi istiqamətində gəlinən ortaq məxrəcdə, o cümlədən, komissiyaların yaradılması və işçi qrupun fəaliyyəti ətrafında müəyyən fikirlərlə bağlı razılaşmalar mövcuddur, İrəvan yenidən öz kirli siyasətindən əl çəkməyəcəyini məhz bu cür davranışları ilə nümayiş etdirir”.
R.Rəsulovun sözlərinə görə, xüsusilə Brüssel görüşü ərəfəsində Ermənistan hakimiyyətinin belə bir addıma getməsinin arxasında daha bir marağın dayanması da şübhə doğurmur – bugünə qədər Rusiyanın təşəbbüsü ilə keçirilmiş bütün görüşlərdə əldə olunmuş razılaşmaları kölgədə qoymaq və istiqaməti Qərbə tərəf yönəltmək. “Çünki bildiyimiz kimi, Nikol Paşinyan bilavasitə Qərbin uşağıdır və sirr deyil ki, Ermənistanın əvvəlki cinayətkar Serj Sarqsyan rejiminin taxtdan salınması üçün ona dəstək göstərən də Qərbin siyasi dairələri, eləcə də Soros fondu olub. Hazırda Qərb, xüsusilə ABŞ-ın və Avropanın siyasi məkanı Qarabağ münaqişəsinin başa çatması yönündə regional güclərin, Türkiyənin, ələxüsus Rusiyanın fəaliyyətini həzm edə bilmir, çünki Cənubi Qafqaz kimi mühüm siyasi-iqtisadi regionundakı nəzarətləri itirilir. Ona görə də, Soçi və ondan əvvəlki mühüm təşəbbüsləri silməkdən ötrü Brüssel görüşünü qabardaraq orada nəticələr əldə etmək planlaşdırılır. Lakin bəri başdan daha bir faktoru da vurğulamalıyıq: sadaladığımız faktlar belə bir proqnozlar səsləndirməyə imkan verir ki, Brüsseldəki görüş əsnasında Ermənistanın maraqları öndə tutulacaq. Yəni Qərb öz uşağının ayağını bada verməyəcək.
Daha bir faktı da xatırlatmaq istərdim. Bir müddət əvvəl məhz həmin Alen Simonyan keçirdiyi mətbuat konfransında Rusiyanın “Moskovski Komsomolets” qəzetinin jurnalistinin suallarını cavablandırarkən birbaşa Rusiyanı, Kremli ittiham atəşinə tutdu, Qarabağın itirilməsində Moskvanı, hətta Vladimir Putini günahlandırdı. Dedi ki, Ermənistan KTMT-nin üzvü kimi Rusiyadan böyük dəstək gözləyirdi və həmin dəstəyi ala bilmədi, nəticədə işğal altında saxladıqları Azərbaycan əraziləri öz sahiblərinə qayıtdı. Halbuki, Alen Simonyan da yaxşı bilirdi ki, 44 günlük İkinci Qarabağ müharibəsində Rusiya öz hərbi müttəfiqinə qucaq-qucaq silah-sursat göndərirdi, Rusiyadan qalxan hərbi-yük təyyarələri gecə-gündüz Zvartnots və Erebuni hava limanlarına enirdi. Bütün bunlardan sonra onun Rusiyanın siyasi hakimiyyətini hədəfə almasını isə Kreml əsla bağışlamayacaq. Artıq Rusiya XİN-i Simonyanın həyasız ittihamlarına müvafiq cavabını verib və bildirilib ki, Ermənistan sülh yolu ilə nizamlanma üzrə xeyli sayda imkanlarını əldən verib və bu, Rusiya Federasiyasının günahı üzündən baş verməyib. Yəni İrəvan bugünə qədər onun üçün yaradılmış imkanları istifadə edə bilməyib və nəticədə Azərbaycanın tükənmiş səbri qarşısında diz çöküb”.
Ekspertin sözlərinə görə, qaldı ki, Rusiya sülhməramlılarının Ermənistanın nümayəndə heyətinin səfərlərinə müdaxilə etməmələrinə və Azərbaycanın ərazisinə qanunsuz səfərlərinə göz yummalarına, bu məsələdə ilk növbədə rəsmi Bakı sərt münasibətini açıqlayacaq və açıqlamalıdır da. “Azərbaycan XİN öz kəskin reaksiyasını göstərəcək. Unutmamalıyıq ki, Ermənistanın sabiq müdafiə naziri Xankəndiyə səfərini gerçəkləşdirdikdən sonra Azərbaycan Ordusu öz sözünü dedi və əməli şəkildə də sübuta yetirdi. Görünür, İrəvan artıq sadomazoxizm siyasəti yürütməsindən xoşlanır və Bakı hər dəfə ona qarşı sərt addımlar atdıqca o daha da azğınlaşır.
Lakin hər şeyə rəğmən, Azərbaycanın mövqeyi yalnız Ermənistanın qanunsuz və həyasız davranışlarına qarşı deyil, həm də Rusiyanın bu kimi məsələlərə etinasız yanaşmalarına qarşı da istifadə olunmalıdır. Hazırkı dövrə qədər Qarabağda, Rusiya sülhməramlıları kontingentinin nəzarəti altındakı ərazilərdə erməni silahlılarının qalması, təxribatların baş verməsi kimi hadisələrə birdəfəlik son qoyulması üçün Moskva üzərinə götürdüyü öhdəliklərə əməli qaydada riayət etməlidir. Əks halda, Azərbaycan Silahlı Qüvvələrinin Xankəndi və ətraf bölgələrdə, öz suveren ərazilərində antiterror əməliyyatları keçirməsi tələbi daha da artmağa başlayır. Moskva bunları nəzərə almazsa, Qərb qarşısındakı mövqeyini itirməli olacaq. Bu isə Cənubi Qafqaz regionundakı situasiyaya öz mənfi təsirlərini göstərə bilər. Hesab edirəm ki, Rusiya bir əldə iki qarpız tutma siyasətini kənara qoymalı və mövcud problemlərin birdəfəlik aradan qaldırılması üçün Bakı ilə müntəzəm və birgə iş aparmalıdır. Əlbəttə ki, Türkiyə faktorunu da unutmamalıyıq”- deyə R.Rəsulov bildirdi.
İradə SARIYEVA
