Yunanıstan, yunan Kipri və Ermənistanın xüsusi təyinatlı qüvvələri təlim keçirib. Erməni mediasının yaydığı məlumata görə, 2021-ci il noyabrın 22-dən 26-dək Yunanıstan-Kipr-Ermənistan üçtərəfli əməkdaşlıq proqramı çərçivəsində “Yaxın Döyüş 2021” təlimləri baş tutub. Təlimin məqsədi birləşmiş xüsusi təyinatlı qüvvələrin döyüş qabiliyyətinin və döyüş şəraitində qarşılıqlı fəaliyyətinin artırılması olub. Bunlara canlı atəş, hərəkət edən obyektlərə atəş, gecə və səhər şəraitində atışma, yaşayış məntəqələrində yaralıların müalicəsi daxildir.
Kipr Müdafiə Nazirliyi bildirib ki, Yunanıstan, Kipr və Ermənistan arasında üçtərəfli əməkdaşlıq proqramı ilə birlikdə bu cür təlimlər üç ölkənin silahlı qüvvələri arasında mükəmməl əməkdaşlığı əks etdirir. Bundan aylar əvvəl Azərbaycan, Türkiyə və Pakistan xüsusi təyinatlılarının birgə təlimləri olub. Ermənistan öz aləmində analoji təlimlər keçirdiyini nümayiş etdirmək istəyir.
Azərbaycanın yunan Kipri ilə hansısa əlaqəsi, münasibətləri yoxdur. Məsələnin təəccüb doğuran tərəfi Yunanıstanın hərbi müstəvidə Ermənistanla belə əməkdaşlığa can atmasıdır. Çünki təkcə bu ilin 10 ayında Azərbaycan Yunanıstana 501 milyon kubmetr qaz ixrac edib. Üstəlik, Yunanıstan TAP çərçivəsində daha çox qaz idxal etmək istəyir və bunu dəfələrlə bəyan edib.
O baxımdan Azərbaycandan qaz idxal etmək hara, Ermənistanla hərbi müstəvidə bu cür birgə əməkdaşlıq hara? Hər halda, Yunanıstanın belə xoşagəlməz davranışı cavabsız qoyulmamalıdır.
“Rəsmi Afinaya diplomatik kanallarla bunun Azərbaycanın mənafeyinə uyğun olmadığı deyilməlidir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı Yunanıstanın Ermənistanla hərbi əməkdaşlığa meyl etməsini bir sıra amillərlə əlaqələndirdi: “Əvvəla, Yunanıstan tarixən Türkiyəyə qarşı düşmən mövqeyindən çıxış edib, necə ki, ermənilər. Ancaq məsələ ondadır ki, Türkiyə ilə Yunanıstan NATO-nun üzvüdür. Ermənistan isə bilavasitə Rusiyanın himayəsində olan Kollektiv Təhlükəsizlik Müqaviləsi Təşkilatının (KTMT) üzvüdür. Ona görə də Yunanıstanın bu təlimlərdə iştirakı bir-biri ilə uzlaşmır. Bütün bunlara baxmayaraq, sözügedən ölkələr Türkiyəyə qarşı birləşməyə can atır. Hərbi təlimlər keçirib güc göstərmək istəyirlər. Ancaq bu o demək deyil ki, Yunanıstanda bütün vətəndaşlar belə fikirləşir. Yunan cəmiyyətində Türkiyə və Azərbaycanla münasibətlərin yaxşılaşdırılmasını istəyənlər var. Ona görə də yunan xalqı elə hakimiyyət seçməlidir ki, bu cür meyillərdən uzaq olsun. Əməkdaşlığa, tərəfdaşlığa meyl göstərsin. Təbii ki, Yunanıstanın bu addımı Azərbaycanın maraqlarına ziddir. Rəsmi Afina nəzərə almalıdır ki, Azərbayvan Avropanın və o cümlədən Yunanıstanın enerji təchizatına töhfə verməyə çalışır. Azərbaycan qazının alıcılarından biri Yunanıstandır. Biz buna görə Yunanıstana qaz ixracını dayandıra bilmərik. Ona görə ki, TAP kəməri Türkiyədən sonra Yunanıstandan keçməklə İtaliyaya daxil olur. Ancaq rəsmi Afinaya diplomatik knallarla bunun Azərbaycanın mənafeyinə uyğun olmadığı deyilməlidir. Belə olarsa, o zaman Yunanıstan bu kimi məsələlərdə daha diqqətli davrana bilər”.
Professor onu da qeyd etdi ki, bu kimi məsələlərə həssas yanaşmaq lazımdır.
Vidadi ORDAHALLI
