Fərəc Quliyev: “Azərbaycan bir addım da olsun öz mövqeyindən geri çəkilməməlidir”
Birləşmiş Ştatlar ATƏT-in Minsk Qrupunun həmsədri olaraq Dağlıq Qarabağ münaqişəsinin hərtərəfli siyasi həllinə sadiqdir və münaqişənin yalnız hərtərəfli həllinin Ermənistanla Azərbaycan arasındakı münasibətləri normallaşdıra biləcəyinə inanır.
Ermənistan mətbuatı yazır ki, bu barədə ABŞ-ın Ermənistandakı səfirliyindən Azərbaycan Xarici İşlər Nazirliyinin mətbuat xidmətinin rəhbəri Leyla Abdullayevanın açıqlamasına münasibət olaraq bildirilib.
Daha sonra bunlar qeyd edilib: “Minsk Qrupunun həmsədri olaraq Dağlıq Qarabağ münaqişəsinin uzunmüddətli və siyasi həllinə sadiqik. Bu məqsədə çatmaq üçün Ermənistanı və Azərbaycanı ATƏT-in Minsk Qrupu həmsədrlərinin himayəsi altında ən qısa zamanda əsaslı müzakirələrə qayıtmağa çağırırıq. Yalnız həll edilməmiş bütün problemləri əhatə edən hərtərəfli bir həll iki ölkə arasındakı münasibətləri normallaşdıra və bölgə sakinlərinin sülh şəraitində birlikdə yaşamasına imkan verə bilər”.
Məlumat üçün qeyd edək ki, Leyla Abdullayeva mətbuata ABŞ-ın Ermənistandakı səfiri Linn Treysinin açıqlamasını belə şərh edib: “ABŞ səfirinin belə bir açıqlama ilə çıxış etməsi qəbuledilməzdir. Münaqişə keçmişdə qalıb, Azərbaycan ərazi bütövlüyünü təmin edib və Prezidentin 7 iyul 2021-ci il tarixli Sərəncamı ilə Şərqi Zəngəzur və Qarabağ iqtisadi rayonları yaradılıb. Bu ərazilər Azərbaycanın tərkib hissəsidir və hər hansı statusdan söhbət gedə bilməz”.
ABŞ-ın Ermənistandakı səfirliyinin növbəti açıqlaması o deməkdir ki, bununla əslində Azərbaycanın mövqeyini qəbul etmirlər. Belə olan halda indi biz nə etməliyik?
“Vaşinqtonun mövqeyi sadəcə olaraq Ermənistandan maşa kimi istifadə edib, yenidən proseslərə daxil olmaqdır”
Məsələyə münasibət bildirən Milli Dirçəliş Hərəkatı Partiyasının sədri Fərəc Quliyevin sözlərinə görə, Birləşmiş Ştatların nə deməsindən asılı olmayaraq, Azərbaycan bir addım da olsun öz mövqeyindən geri çəkilməməlidir: “ABŞ Azərbaycanın daxili işlərinə qarışa bilməz. Bir vaxtlar Azərbaycan özü ATƏT-ə müraciət etdi ki, Ermənistan ərazilərimizi işğal edib və məsələni danışıq yolu ilə həll edin. 30 il gözlədik, amma ATƏT-in Minsk Qrupu məsələni həll etmədi. Nəticədə biz məsələni güc yolu ilə həll etdik və Minsk Qrupuna heç bir ehtiyac yoxdur. Dəfələrlə bildirmişik ki, müharibə bitib və postmüharibə dövrü başlayıb. Böyük dövlətlər həqiqətən regionda sülh istəyirlərsə, o zaman postmüharibə dövrünün reallıqları ilə razılaşmalıdılar. İki dövlət arasında iqtisadi münasibətləri sahmana salmalıdılar. Etimad mühiti yaradılmalı, regional layihələrin inkişafına önəm verilməlidir. Ən başlıcası, Azərbaycanın dağılmış ərazilərinin bərpasına yardım etməlidilər. Bu kimi işlərlə məşğul olmalıdırlar. Ermənistan kimi təcavüzkar dövləti silahsızlaşdırmalıdırlar. Bunu etmək əvəzinə, heç bir əsas olmadan Minsk Qrupunu, status məsələsni gündəmə gətirməyə çalışırlar. BMT Təhlükəsizlik Şurasının Qarabağla bağlı 4 qətnaməsi var idi və onların qəbul olunmasına ABŞ imza atdı. Ancaq həmin qətnamələrdən irəli gələn məsələlərin həlli ilə bağlı ABŞ heç nə etmədi. Ona görə də Vaşinqtonun mövqeyi sadəcə olaraq Ermənistandan maşa kimi istifadə edib, yenidən proseslərə daxil olmaqdır. Əsas oyun bunun üstündə qurulub. Çünki ABŞ İkinci Qarabağ müharibəsi dövründə və ondan sonrakı proseslərdən kənarda qaldığı üçün bunu edir. İstəyirlər ki, regiondakı proseslərə nəzarət etsinlər. Azərbaycanın rəsmi və ictimaiyyətin mövqeyi kifayət qədər aydındır. Belə olan halda ABŞ-ın Minsk Qrupu məsələsində israr etməsinin heç bir əsası yoxdur”.
Partiya sədri yekun olaraq qeyd etdi ki, Azərbaycan öz işində olmalıdır.
Vidadi ORDAHALLI
