Nəsib Quliyev: “Prezidentimiz bunları əvvəlcədən görürdü və haqlı olaraq dünyanı vaksin ayrıseçkiliyindən əl çəkməyə çağırırdı”
"Pfizer-BioNTech" və "Moderna" şirkətləri koronavirus (COVID-19) əleyhinə istehsal edikləri vaksinlərin qiymətlərini artırıb. "Pfizer-BioNTech" şirkəti eyniadlı vaksininin bir dozasının qiymətini 15,5 avrodan 19,5 avroya (31.3 - 39.4 AZN) qaldırıb.
"Moderna" şirkəti isə bir doza vaksinin qiymətini 22,6 ABŞ dollarından 25,5 dollara (38,4-43,3 AZN) qaldırıb.
Qeyd ediənə görə, Avropa Dərman Agentliyi (EMA) hazırda Avropa İttifaqı ölkələrində yalnız "Pfizer-BioNTech", "Moderna", "AstraZeneca", "Johnson & Johnson" şirkətləri tərəfindən istehsal olunan peyvəndlərin istifadəsinə icazə verib.
Heç şübhəsiz, sözügedən vaksinlərin qiymətlərinin bahalanması kasıb ölkələrə mənfi təsir göstərəcək, bu ölkələr, insanlar üçün vaksinləri əlçatmaz edəcək. Azərbaycan Prezidenti İlham Əliyev dəfələrlə vaksin ayrıseçkiliyini tənqid edib və bəzi ölkələrin bunu qazanc mənbəyinə çevirmək, zəif və kiçik ölkələrin vaksinə əlçatımlığını məhdudlaşdırmaq istəyində olduğunu vurğulayıb.
Prezident qeyd etdiklərinin böyük həqiqət olduğu bir daha təsdiqlənir. Göründüyü kimi, bu gün problem özünü açıq şəkildə göstərir və artıq sosial-iqtisadi cəhətdən zəif, imkansız ölkələr üçün vaksin əlçatmazlığı məsələsi özünü biruzə verir.
Ekspertlər deyir ki, bəzi dövlətlər başdan vaksin məsələsində şovinizmə, ayrıseçkiliyə yol verib və bu gün də o yolu gedirlər. Vaksinin çoxdan bəridir ki, dövlətlərə və xalqlara qarşı təzyiq vasitəsi olaraq seçildiyini qeyd edən ekspertlər hesab edir ki, Avropa İttifaqı gərək buna yol verməsin. Məsələ burasındadır ki, Avropa İttifaqına üzv dövlətlər qiyməti bahalaşdırılan vaksinləri qəbul edir.
- “İndiki pandemiya dövründə şirkətlərin peyvəndin qiymətini qaldırması humanizmdən çox uzaq bir haldır”
Professor Nəsib Quliyev “Bakı-xəbər”ə şərhində bildirdi ki, "Pfizer-BioNTech" və "Moderna" şirkətlərinin koronavirus (COVID-19) əleyhinə istehsal etdikləri vaksinlərin qiymətlərini artırması olduqca mənfi haldır. N.Quliyevin sözlərinə görə, bəzi böyük dövlətlər bununla qeyri-humanist mahiyyətini ortaya qoyur. N.Quliyevin fikrincə, bəzi iri dövlətləri və şirkətləri bəşər insanının taleyi maraqlandırmır: “Çox təəssüflər olsun ki, dünyada həmişə ədalətsizliklər, ikiili standarlar olub, bu gün də var. Əslində, dünyanın inkişafı belə getməməlidir. Dünya insanı inkişaf etdikcə daha da müdrik olmalıdır, hümanist, həssas olmalıdır. Amma təəssüflər olsun ki, bu işlər bizim arzu etdiyimiz və təsəvvür etdiyimiz kimi deyil. Ona görə də, biz tibb işçiləri olaraq vaksin ayrıseçkiliyinin, bu sahədə qiymət artımının qəti əleyhinəyik. İstəyirik ki, haqq - ədalət təmin olunsun, peyvəndlə bağlı ayrıseçkilik olmasın. İndiki pandemiya dövründə şirkətlərin peyvəndin qiymətini qaldırması humanizmdən çox uzaq bir haldır. Biz peyvəndin qiymətini qaldıran şirkətlərin bu hərəkətini müsbət qəbul etmirik, onları dəstəkləmirik”.
N.Quliyevin sözlərinə görə, "Pfizer-BioNTech" və "Moderna" şirkətləri koronavirus (COVID-19) əleyhinə istehsal edikləri vaksinlərin qiymətlərini artırmaq əvəzinə insanlara, ehtiyacı olanlara pulsuz vaksin paylamalıdır. Amma onların bunu etmədiyini deyən ekspertin sözlərinə görə, bütün insanların sağlamlıq hüququ var: “Bunların hərəkətləri onu deməyə əsas verir ki, birinin pulu yoxdursa infeksiyadan ölməlidir, pulu çox olan isə vaksinasiya olunub sağ qalsın. Bu isə qətiyyən düzgün yanaşma deyil. Prezidentimiz bunları əvvəlcədən görürdü və haqlı olaraq dünyanı vaksin ayrıseçkiliyindən əl çəkməyə çağırırdı. Cənab Prezident onu yerində demişdi ki, bəli, hansı ölkə varlıdır əhalisinin sayından iki-üç dəfə çox vaksin alır. O ölkələrin məqsədi heç də təkcə vaksinasiya deyil, peyvəndi alıb sonra kiməsə satacaq. Elə hazırda proses ona gedir. Bu ölkələr gərək özlərinə lazım olan qədər vaksin alsın. Bəs kasıb ölkələr nə etsin, onlar bunu düşünmürlər. Onlar da insandı, hər kəsi allah yaradıb. Ona görə də, bu məsələlərə mənfi münaisbətimi bildirirəm” - deyə N.Quliyev qeyd etdi.
İradə SARIYEVA
