İctimai-siyasi müstəvidə Ermənistanda vəziyyətin yenidən kəskinləşməsi müşahidə edilir. Bu fonda 44 günlük müharibədə Ermənistanın məğlubiyyəti səbəbindən Nikol Paşinyan hakimiyyətinin ciddi təzyiqlərə məruz qalması ilə paralel olaraq cinayətkar Köçəryan-Sarkisyan klanının hakimiyyəti ələ keçirmək üçün revanşist addımları da özünü qabarıq büruzə verir.
Artıq bəllidir ki, Ermənistanın eks-prezidenti, Qarabağdakı separatçı hərəkatın liderlərindən biri olmuş Robert Köçəryan yenidən siyasətə qayıdır. Eks-prezidentə yaxın mənbələrin bildirdiyinə görə, Köçəryan siyasətə qayıtmağa və gələcəkdə baş nazir postunu tutmağa razıdır. Mənbə bu xüsusda bildirib: “Köçəryan siyasi iddialarını xalqın onu dəstəklədiyini hiss etdikdən sonra göstərəcək. Hazırda o, həmin dəstəyin olmadığını söyləyib”. Yayılan digər məlumata görə, Nikol Paşinyana qarşı 17 partiyanın birgə başladığı mübarizə uğursuzluqla nəticələndiyi üçün müxalifət taktikanı dəyişmək qərarına gəlib. Belə ki, yanvarın 30-u “Qarabağ klanı”nın 2 əsas siması olan Serj Sarkisyan və Robert Köçəryan görüşəcək. Görüşdə, onlarla yanaşı, “Çiçəklənən Ermənistan” və “Daşnaksütyun” partiyalarının rəhbərliyi də iştirak edəcək. Əsas müzakirə mövzusu özünü doğrultmayan “Vətənin Xilası Naminə” hərəkatının yerinə yeni strukturun yaradılması və Paşinyanı istefaya vadar etmək üçün mübarizə formasının dəyişdirilməsi olacaq. Onlar bu məsələdə Rusiyadan da dəstək almağa cəhd edir. Bu fonda təsadüfi deyil ki, Ermənistanın Vatikandakı sabiq səfiri, keçmiş prezident Serj Sarkisyanın kürəkəni, mühacir diplomat Mikael Minasyan Paşinyanın Rusiya siyasətini yenidən sərt tənqid edib. Onun iddiasına görə, artıq Soros dairələrinə anti-Rusiya ritorikasını gücləndirmək və ABŞ-la təmasları daha da sıxlaşdırmaq tapşırılıb.
Bu xüsusda keçmiş diplomat Ermənistanın ABŞ-a təyin olunacaq yeni səfirinin adını açıqlayıb: “Nikol Paşinyan Lilit Makuntsu Ermənistanın ABŞ-dakı fövqəladə və səlahiyyətli səfiri təyin etmək qərarını verib. Makuntsun pis bir insan olmadığını düşünsək də, şübhəsiz ki, o, səriştəsiz siyasətçi, üstəlik, bacarıqsız diplomatdır. Ümumiyyətlə, diplomat belə deyil! Onun savadsızlığının sübutu olaraq, parlamentlərarası da daxil olmaqla, müxtəlif səviyyələrdə xarici siyasətdəki uğursuzluqları göstərmək olar. Ancaq Nikol Paşinyan məhz Makuntsa əvvəlcə mədəniyyət naziri vəzifəsini, sonra isə öz fraksiyasına rəhbərlik etməyi tapşırıb. Nikolun ingilis dili müəllimi kimi tanınan Makuntsun yalnız bir üstünlüyü var: Nikol ona qeyd-şərtsiz inanır. Bu səbəbdən də onu ABŞ-a göndərərək bir güllə ilə iki dovşan vurmağa qərar verdi: onu həm batan gəmidən xilas etmək, həm də iki supergüc arasındakı çirkli oyunda istifadə etmək”. Minasyan, həmçinin, bu təyinatın Ermənistana baha başa gələcəyini vurğulayıb: “Onun qarşıdakı təyinatı təkcə Ermənistan-Amerika, Ermənistan-Rusiya münasibətlərinə, Ermənistanın imicinə yox, həm də müstəqil bir ölkə olaraq varlığımıza zərbədir”. Qeyd edək ki, Minasyanın barəsində bəhs etdiyi Lilit Makunts Ermənistan parlamentindəki “Mənim addımım” fraksiyasının rəhbəridir. Makunts daha öncə ölkənin mədəniyyət naziri vəzifəsində çalışıb. Paşinyanın onu ABŞ-a səfir göndərmək niyyəti baş nazirin hələ də xarici siyasətdə ABŞ amilinə üstünlük verdiyini göstərir. Bu da Ermənistanda Rusiyaya rəğbətlə yanaşan qüvvələrin əlində Paşinyana qarşı əsas kozırlardan biri kimi istifadə olunur. Hesab edilir ki, indiki halda həqiqətən Paşinyan iqtidarı üçün ciddi təhdid yaranır.
“Joxovurd” qəzeti bu xüsusda yazır ki, indi Paşinyanın lideri olduğu “Mənim addımım” hakimiyyətdə qalma müddətini uzatmaq üçün vaxt qazanmağa çalışır. Qəzetdə hökumətin parlamentə özünü buraxma hüququ vermək niyyətinin bu məqsədə xidmət etdiyi qeyd olunur. Parlamentə veriləcək bu səlahiyyət Paşinyanın baş nazir olaraq qala bilməsi və erkən parlament seçkiləri keçirməsi zərurətindən irəli gəlir. Ancaq parlamentdə konstitusiya dəyişikliyi etmək üçün 88 səs almaq lazımdır. “Mənim addımım” fraksiyasında əvvəllər 88 millət vəkili var idi, ancaq müharibədən sonra 5 millət vəkili blokdan ayrıldı. Bu səbəbdən parlamentdə konstitusiyaya yalnız hakimiyyətin təşəbbüsü ilə dəyişiklik etmək praktiki olaraq mümkün deyil və Paşinyanın istefasını tələb etdiyi üçün parlament müxalifəti bu təşəbbüsə qoşulmayacaq. Mövcud hökumətin ömrünü uzatmaq üçün yeni fikirlər yaranana qədər yalnız layihə ilə cəmiyyətin və siyasi qüvvələrin diqqətini yayındırmaq, vaxt qazanmaq mümkündür ki, Paşinyan indi məhz bu takitadan istifadə edir. Lakin “Joxovurd” qəzeti yazır ki, Paşinyan təhdidlərin artdığını görsə, rəqiblərini yenidən həbsə atacaq. Bu da, qəzetin yazdığına görə, Ermənistanda vəziyyəti qarışdırıb, iqtidar-müxalifət qarşıdurmasının silahlı həddə qədər yüksəlməsinə kimi gətirib çıxara bilər.
Samirə SƏFƏROVA
