Kamran Məmmdədli: “Kəlbəcər ərazisi həm şirin, həm də mineral su ehtiyatları ilə zəngindir”
Müqəddəslik baxımından Vətən torpağının hər qarışı eyni dərəcədə əzizdir. Ölkənin daşı da, qayası da, çayı da, bataqlığı da istənilən vətənpərvər üçün eyni anlam ifadə edir və etməlidir də. Bununla yanaşı, etiraf etməliyik ki, bəzi coğrafiyaların hərbi-strateji, iqtisadi potensialı digərlərindən fərqlənir.
Azərbaycan Ordusunun bu gün bir güllə belə atmadan işğaldan qurtardığı Kəlbəcər də hərbi-strateji baxımdan heç də Şuşadan geri qalmayan ərazilərimizdəndir. İşğaldan azad olunan Kəlbəcər rayonu gözəl təbiəti, əlverişli relyefi, zəngin yeraltı və yerüstü təbii ehtiyatları, böyük müalicəvi təsirə malik mineral su yataqları, çayları və gölləri ilə tanınır.
Azərbaycan Prezidenti İlham Əliyev noyabrın 25-də xalqa müraciətində deyib ki, Kəlbəcər füsunkar təbiətə, zəngin mədəni irsə malikdir: “Bizim bir neçə böyük çayımızın mənbəyi Kəlbəcər rayonundadır. Onların arasında ən böyüyü Tərtər çayıdır, uzunluğu 200 kilometrdir. Bazarçay, Xaçınçay. Onların uzunluğu təqribən 200 kilometrə yaxındır. Bu çaylar böyük ərazini qidalandırır. Ancaq mənfur düşmən bizi bu imkanlardan məhrum etdi. Çünki Tərtər çayı 1970-ci illərdə ulu öndər Heydər Əliyevin təşəbbüsü ilə inşa edilmiş Sərsəng su anbarına axıdılır. Sərsəng su anbarı o vaxt o məqsədlə tikilmişdi ki, Qarabağın Aran zonasında yerləşən 6-7 rayonda suvarma işləri təmin edilsin. O vaxt Sərsəng su anbarı inşa ediləndən sonra heç vaxt suvarılmayan 100 min hektar ərazi artıq suvarılmağa başlamışdı. Ağdam, Goranboy, Yevlax, Bərdə, Tərtər və digər rayonlar oradan qaynaqlanırdı. Mənfur düşmən suyumuzu kəsdi. Yayda suyu kəsirdi, qışda buraxırdı və su basırdı bütün torpaqları. Bax, bizə qarşı ekoloji terror təşkil edilirdi. Ermənistan terror dövlətidir, bu terrorun bir çox əlaməti var. Tarixi abidələrimizin dağıdılması, mülki əhaliyə qarşı törədilən soyqırımı, meşələrimizin qırılması, çaylarımızın məcrasının dəyişdirilməsi və digər əlamətlər var. Baxın, Kəlbəcərdən başlayan Tərtər çayının suyu Sərsəng su anbarında və ondan sonra Suqovuşan su anbarında yığılırdı, işğalçının maraqlarını təmin edirdi, bizə isə su gəlmirdi. Biz Suqovuşan qəsəbəsini alandan sonra indi artıq suyun verilməsi başlayıb və 100 min hektara suyun verilməsi nəzərdə tutulur”.
Artıq Kəlbəcərdə olan çaylara özümüz nəzarət edəcəyik və bu, ölkə iqtisadiyyatına və suvarma sahəsinə müsbət təsir göstərəcək.
- “Kəlbəcərin su ehtiyatı da Azərbaycanın kənd təsərrüfatına böyük imkanlar qazandıracaq”
İqtisadçı-ekspert Kamran Məmmədli qeyd etdi ki, Kəlbəcər ərazisi həm şirin, həm də mineral su ehtiyatları ilə zəngindir: “Tərtər çayı, Bazarçay, Xaçınçay, Böyük və Kiçik Alagöllərin Azərbaycanın nəzarətinə qaytarılması bizə su ehtiyatları məsələsində xeyli yeni imkan açır. Məlumdur ki, bu ilin yay aylarında su ehtiyatları ilə bağlı problemlər meydana çıxanda işğal olunmuş ərazilərdəki qondarma rejim və Ermənistan Azərbaycanı çayların qarşısının alınması ilə təhdid edirdi. Artıq bu təhdid aradan qalxmış oldu".
Həmsöhbətimiz onu da əlavə etdi ki, rayonun su ehtiyatı da Azərbaycanın kənd təsərrüfatına böyük imkanlar qazandıracaq. Ölkəmizin ən böyük çaylarından olan Tərtər öz suyunu Kəlbəcər dağlarından alır: “Azərbaycanın bir neçə böyük çayının mənbəyi Kəlbəcər rayonundadır. Onların arasında ən böyüyü Tərtər çayıdır, uzunluğu 200 kilometrdir. Bazarçay, Xaçınçay. Onların uzunluğu təqribən 200 kilometrə yaxındır. Bu çaylar böyük ərazini qidalandırırdı. İşğal dövründə Kəlbəcərdən başlayan Tərtər çayının suyu Sərsəng su anbarında və ondan sonra Suqovuşan su anbarında yığılırdı, işğalçının maraqlarını təmin edirdi. Suqovuşan qəsəbəsi azad edildikdən sonra artıq 100 min hektara suyun verilməsi nəzərdə tutulur”.
Günel CƏLİLOVA
