Ramil Hüseynov: “Ermənistanın iddiaları ilə mövcud imkanları tamamilə tərs mütənasibdir və heç cür bir-biri ilə uzlaşmır”
“Bir tərəfdən beynəlxalq ictimaiyyətə müraciət edir və Ermənistan-Azərbaycan qoşunlarının təmas xəttində atəşkəs rejiminin möhkəmləndirilməsi üçün kömək xahiş edir. Digər tərəfdən, hərbi təxribatlar törədərək Azərbaycan ərazisinə basqın etmək istəyir, mövqelərimizi zəbt etmək istəyir, mülki əhalini, kəndlərimizi atəşə tutur”.
Bunu Prezident İlham Əliyev Təhlükəsizlik Şurasının iclasında çıxışı zamanı deyib.
Ölkə başçısının sözlərinə görə, bu siyasəti məntiqlə izah etmək mümkün deyil, çünki olduqca ziddiyyətlidir: “Bütün məsuliyyəti Ermənistanın hərbi-siyasi rəhbərliyi daşıyır. Çünki məhz Ermənistan rəhbərliyinin ikiüzlü və riyakar fəaliyyətinə görə belə hadisələr baş verir. Bu çirkin və məkrli siyasət Ermənistanı uçuruma aparacaq. Bütün məsuliyyət Ermənistanın rəhbərliyi üzərinə düşür. Azərbaycan öz ərazi bütövlüyünü bundan sonra da qoruyacaq, öz sərhədlərimizi qoruyacaq. Həlak olan hərbçilərimizin qisası alındı, onların qanı yerdə qalmayıb və qalmayacaq”.
Prezident onu da qeyd edib ki, bu çirkin əməllərə əl atmaq onların təcavüzkar siyasətinin təzahürüdür:“Bu siyasəti məntiqlə izah etmək mümkün deyil. Çünki bu siyasət olduqca ziddiyyətlidir və bu siyasət Ermənistan üçün böyük təhlükə mənbəyidir. Çünki mən dəfələrlə demişəm, bir daha demək istəyirəm ki, Azərbaycan heç vaxt işğal edilmiş torpaqlarının bu vəziyyətdə qalması ilə barışmayacaq, işğalla barışmayacaq və əlindən gələni edəcək ki, öz ərazi bütövlüyünü bərpa etsin”.
Bütün bu deyilənlərlə yanaşı, Prezident Ermənistanın dövlət siyasətində ziddiyyətlər deyəndə daha nələri nəzərdə tutdu?
- “Paşinyanın bu ağılsız yanaşmasını nə Azərbaycan, nə də həmsədrlərin qəbul etməməsinə rəğmən, qarşı tərəf bundan əl çəkmir”
Məsələyə münasibət bildirən siyasi ekspert Ramil Hüseynovun sözlərinə görə, Prezident İlham Əliyev tutarlı arqumentlərlə Ermənistanın dövlət siyasətinin ziddiyyətli olduğunu ifşa etdi:“Həqiqətən də Ermənistanda aparılan dövlət siyasəti ziddiyətlidir və bunu məntiqlə izah etmək mümkün deyil. Özü də maraqlısı odur ki, Ermənistanın dövlət siyasətinin ziddiyyətli olması məhz Paşinyan baş nazir olandan sonra daha çox özünü göstərir. Bunun təzahürləri ötən iki ildə özünü müxtəlif formada göstərdi. Hesab edirəm ki, Prezident İlham Əliyev bu barədə danışarkən digər məqamları da nəzərdə tutub. Məsələ ondadır ki, Paşinyan baş nazir olan kimi, separatçı qurumun danışıqlarda tərəf olmasına cəhd etdi. Onun bu ağılsız yanaşmasını nə Azərbaycan, nə də həmsədrlərin qəbul etməməsinə rəğmən, qarşı tərəf bundan əl çəkmir. Hər dəfə bunu gündəmə gətirməyə çalışırlar. Başqa bir tərəfdən, Ermənistan 30 ildən çoxdur bəyan edir ki, guya Qarabağdakı ermənilər öz “azadlığı” uğrunda döyüşür, bu onların haqqıdır və s. O biri tərəfdən Paşinyan çıxışlarında bəyan edir ki, “Qarabağ Ermənistandır”. Bütün bunlar ölkənin dövlət siyasətinin həqiqətən də ziddiyyətli olmasının təzahürləridir. Ən başlıcası, Ermənistanın iddiaları ilə mövcud imkanları tamamilə tərs mütənasibdir və heç cür bir-biri ilə uzlaşmır. Məsələyə hansı tərəfdən baxsaq görərik ki, Ermənistan forpost ölkə statusundan çıxmaq imkanına malik deyil. Belə olan halda, əlbəttə ki, bu siyasət iflasa məhkumdur”.
Belə məlum olur ki, Ermənistanın dövlət siyasətində ziddiyyətlər get-gedə daha da artır.
Vidadi ORDAHALLI
