Fərqanə Nağıyeva: “Bəzi istehsalçılar köhnəlmiş və ya yararlılıq tarixi keçmiş məhsulları yenidən bazara çıxarırlar ki, bu da…”
Təhlükəli qida məhsullarını istehsal edənlər, satışını təşkil edənlər və ya satış məqsədilə saxlayanların 10 ilədək müddətə azadlıqdan məhrum edilməsi təsdiqlənib. Prezident İlham Əliyev bununla bağlı Cinayət Məcəlləsi və İnzibati Xətalar Məcəlləsində dəyişiklik edilməsi haqqında qanunu imzalayıb.
Dəyişikliyə əsasən, bilə-bilə insan həyatı və sağlamlığı üçün təhlükəli qida məhsullarının istehsalı, satışı və ya satış məqsədilə saxlanması ilə məşğul olanlar, bu əməllər xeyli miqdarda törədildikdə, qanunvericiliyin tələbinə uyğun olaraq cəzalandırılacaq.
“Təhlükəli qida məhsullarını istehsal edənlər və ya satışını təşkil edənlərin 10 il müddətinə azadlıqdan məhrum edilməsi düzgün qərardır”
Qida eksperti Fərqanə Nağıyeva "Bakı-Xəbər"ə şərhində bildirdi ki, təhlükəli qida məhsullarını istehsal edənlər, satışını təşkil edənlər və ya satış məqsədilə saxlayanların 10 ilədək müddətə azadlıqdan məhrum edilmə cəzasına məhkum edilməsi müsbət qərardır: “Sərtləşmənin tərəfdarıyıq. Əsas məsələ bazardakı təhlükəli qidadan ziyan görən istehlakçının hüquqlarının qorunması, lazım gələndə ona dəymiş ziyanın ödənilməsidir. Təhlükəli qidalar dedikdə bir neçə seqmentə bölünmədən söhbət gedir. Azərbaycanda saxta alkoqollu içkilərdən nə qədər insan zəhərlənərək ölüb. Daha sonra saxta yumurta, saxta yağlar, saxta ət satanlar da cəzalandırılacaq. Ziyanlı qatqılar qatılmış məhsullar da buraya daxildir. Bu məhsullar laboratoriya şəraitində analizdən keçirilib ziyanlılığı təsdiq olunarsa, mütləq cəzası olacaq. Həmçinin qeyri-sanitar şəraitdə, laboratoriya analizləri olmadan qida məhsulunu bazara çıxarırlarsa, bunlar haqqında da ciddi ölçülər götürüləcək. Çünki burada insan həyatından söhbət gedir. İstehsal zamanı təmizləyici kimyəvi maddələrin düzgün istifadə edilməməsi və ya qida ilə təmas edilməsi ciddi zəhərlənmələrə səbəb olur. Həmçinin onu da nəzərə almaq lazımdır ki, kimyəvi maddələrin istifadəsi zamanı texniki təlimatlara tam riayət edilməlidir. Qida istehsalı sahələrində yalnız qida üçün təhlükəsiz təsdiqlənmiş kimyəvi maddələr istifadə olunmalıdır. Kimyəvi maddələr qida məhsullarından uzaqda saxlanılmalıdır. Bəzi istehsalçılar köhnəlmiş və ya yararlılıq tarixi keçmiş məhsulları yenidən bazara çıxarırlar ki, bu da istehlakçıların sağlamlığı üçün təhlükə yaradır. Yararlılıq tarixlərinə nəzarət üçün effektiv sistem qurulmalıdır. İstehsal müəssisələrində məhsulların izlənilməsi üçün kodlaşdırma sistemləri tətbiq edilməlidir”.
Ekspert hesab edir ki, təhlükəli qida məhsullarını istehsal edənlər və ya satışını təşkil edənlərin 10 il müddətinə azadlıqdan məhrum edilməsi düzgün qərardır. Bununla istehlakçılar məhsul istehsal edərkən onun keyfiyyətinə fikir verəcəklər. Çünki əhalinin sağlığı maddi gəlirdən önəmlidir.
Günel CƏLİLOVA
