Bakıda universitetlərə yaxın birotaqlı kirayə evlər azı 300 manat...

img

Ali məktəbə qəbul olan tələbələrin kirayə mənzil problemi hər zaman aktualdır. Ümumilikdə tələbə üçün yataqxana həm maddi, həm də vaxt itkisi baxımından əlverişlidir. Azərbaycanda isə yataqxanaların sayı az olduğundan, rayondan paytaxta oxumağa gələnlər kirayə mənzil axtarmalı olur.

Lakin tələbələr öz ciblərinə uyğun rahat şəraiti olan mənzil tapmaqda çətinlik çəkirlər. Universitetə yaxın 1 otaqlı kirayə evin qiyməti 250-300 manat arasında dəyişir. Bu məbləğ isə tələbələr üçün olduqca bahadır. Çarəsiz vəziyyətdə qalan tələbələr ya universitetdən kənarda  kirayə ev tutur, ya da təhsil müəssisəsinə yaxın ərazidə olan evdə 4-5 tələbə birlikdə yaşamalı olur.

  • Elnur Fərzəliyev: “Kirayə evlərin qiyməti tələbələrin cibinə uyğun deyil”

Əmlak eksperti Elnur Fərzəliyev bildirdi ki, kirayə evlərin qiyməti tələbələrin cibinə uyğun deyil: “Bu vəziyyət tələbələrə çətinliklər yaşatmaqla yanaşı, onların təhsillərini normal səviyyədə davam etdirməsinə də mane olur. Mərkəzə yaxın ərazilərdə 1 otaqlı mənzilin kirayə qiyməti 250-300 manatdır. Buna görə də bir otaqda iki tələbə yox, məcburən dörd və ya beş tələbə yaşayır. Bu cür sıxlıq isə onların təhsilinə mənfi təsir göstərir. Onu da nəzərə almaq lazımdır ki, tələbələr məcburən şəhər kənarında ev tutsalar da, bu onlara vaxt itkisi yaşadır”.

Həmsöhbətimizin sözlərinə görə, bu gün Sovet dövründən qalmış tələbə yataqxanaları artıq istismar müddətini çoxdan bitirib və yaşayış üçün yararsızdır. Onların yerləşdiyi ərazilər və yataqxanalara məxsus torpaq sahələrində tikinti normativlərinə uyğun yeni çoxmərtəbəli yataqxanaların tikilməsinə imkan var.

E.Fərzəliyev hesab edir ki, tələbələr üçün yeni çoxmərtəbəli, tam keyfiyyətli və müasir standartlara cavab verən yataqxanaların tikilməsi, şəhərciklərin salınması və minimal qiymətlə icarəyə verilməsi mövcud problemi aradan qaldıracaq.

  • Nizami Hüseynov: “Tələbələrin kirayə evlərdə yaşaması həm təhsil, həm maddi, həm də təhlükəsizlik baxımından uyğun deyil”

Təhsil eksperti Nizami Hüseynov bildirdi ki, bu məsələ artıq bir neçə ildir gündəmdədir: “Tələbələrin kirayə evlərdə yaşaması həm təhsil, həm maddi, həm də təhlükəsizlik baxımından uyğun deyil. Kirayə mənzillər bir çox hallarda sakinlərin sıx yaşadığı və təhsil mühitinin olmadığı yerlərdə yerləşir. Bu zaman yerli sakinlərlə tələbələr arasında xoşagəlməz hadisələr, hətta fiziki zorakılıq halları da baş verir. Kirayə mənzillərdə tələbələr gigiyenik qaydalara da riayət etmirlər və bu səbəbdən onların arasında yoluxucu və mövsümi xəstəliklər də çox yayılır. Problemdən çıxış yolu isə hər bir ali təhsil müəssisəsində tələbələr üçün yaxşı şəraiti olan yataqxanaların olmasıdır”.

Günel CƏLİLOVA

Son xəbərlər