Tofiq Abbasov: "Bu gün terrorla əlaqə böyük qəbahət sayılmalıdır, nəinki ABŞ kimi ölkənin yetkilisi durub deyir ki, terrorçular bizə kömək edib..."
ABŞ-ın Türkiyədəki yeni səfiri maraqlı bir açıqlama ilə çıxış edib - PKK-nın uzantısı sayılan Suriyadakı YPG və PYD-nin taleyi ilə bağlı müzakirələr aparırıq, onlar bizə Suriyada çox kömək etdilər. Necə olacaq? ABŞ PKK-nın Suriya qollarını tərksilah edəcəkmi?
Məsələ ilə bağlı baki-xeber.com saytına açıqlamasında politoloq Tofiq Abbasov bildirdi ki, müasir mərhələdə terror təskilatları keçmişin qalıqları sayılır: "Soyuq müharibə dövründən qalan bu dəhşətli miras insanlara öz nəfəsini hələ də duyura bilir. Bəzi ölkələrdə isə dözülməz şərait yaradır. Artıq bu dəhşətli kabusun tarixin səhnəsindən getməsi də mübahisələrə səbəb olur.
Müasir mərhələdə terrorçu ilə danışıqlara getmək, nədəsə onlarla razılaşmaq yasaq sayılmalıdır.
Əgər ağlı başında, rasional düşüncə sahibi olan dövlət terrorçu ilə danışıqlara gedirsə, onları tanımış olur.
Amma bəzi ölkələr terrorçu təşkilatlarla öz mənafeləri uğrunda pərdəarxası əməkdaşliq edirlər.
Bu xüsusda biz erməni qolunun da iştirakının dəfələrlə şahidi olmuşuq.
Turkiyədə artıq terrorizm sıfırlanmağa doğru gedir. Bu çox önəmli və ümidverici məsələdir. Bir halda ki, 47 ildən sonra PKK silahı yerə qoyur, bu həm də digər terror təşkilatlarına bir örnəkdir ki, artıq silah gücünə, hədə-qorxu ilə heç nəyə nail olmaq mümkün deyil.
ABŞ və Avropa ölkələrinin də terrorçu təşkilatlarla həmahəng hərəkətləri var idi. Bir neçə dəfə faktlarla sübut edilib ki, kürd yaraqlılarının maliyyəsi Almaniyadan, Belçikadan, Niderlanddan və digər Avropa ölkələrindən, həmçinin ABŞ-dən gəlir. Guya leqal şəkildə fəaliyyət göstərən kürd təşkilatları müxtəlif maskalara girirdilər ki, özlərini humanitar bir təşkilat kimi göstərsinlər.
Amma əslində gizli şəkildə terrora maliyyə dəstəyi verirdilər.
Hazırda terror adı altında çox mənfur, idbar ssenarilər də oynanılır. Məsələn, Hindistan islamafob hakimiyyətinin rəhbəri Nerandra Modi iki dəfə müsəlmanlara divan tutduğuna görə seçkilərdə qələbə çala bildi. İkinci seçkilərdə Modinin partiyası olduqca zəif idi. Ancaq müsəlmanlara qarşı soyqırım həyata keçirməklə qələbə qazanıb, hökumət formalaşdırmaq səlahiyyətinə sahibləndi. İndi Modi üçüncü dəfə eyni üsuldan istifadə etmək istəyir. Lakin bu dəfə o, bu üsulu "terrorizmlə mübarizə" pərdəsi altinda gizlətmək istəyir. Sonu toqquşmaya gəlib çıxdı və Hindistan bu mini müharibəni birmənalı şəkildə uduzdu. Pakistan ona elə bir dərs verdi ki, o uzun müddət səhvini tapmaq üçün düşünməlidir. Hindistanın ən böyük səhvi isə onda idi ki, artıq kölgəsinə sığınmaq istədiyi terrorizm dönəmi bitib.
ABŞ özü bu yaxınlara qədər İraq kürdlərinə silah-sursat və maliyyə dəstəyi verirdi. Yəqin ki, onların Konqresdə və Senatda lobbiçiləri var idi. Bunların qarşısını almaq üçün dünyaya yeni baxışın sərgilənməsinə ehtiyac var. İlk növbədə böyük dövlətlər, məsələn, Amerika proseslərdən məntiqi nəticələr çıxarmalıdır.
PKK əslində elə Sovet hökuməti tərəfindən yaradılmış və onlara marksizm-leninizm ideyalarını sırımışdılar. Guya onlar solçu idilər və öz hüquqları uğrunda mübarizə aparırdılar. Bu çox iyrənc üsullardır.
Məsələn, biz 2023-cü ildə Azərbaycan ərazisindəki erməni terrorizminə son qoyduq. Bu, dünyaya bir örnəkdir.
Bu gün terrorla əlaqə böyük qəbahət sayılmalıdır, nəinki ABŞ kimi ölkənin yetkilisi durub deyir ki, terrorçular bizə kömək edib. Bu özü Amerika dövlətinın zəifliyinin göstəricisidir.
Amma real şəraitdə ABŞ və Rusiyanın PKK-nın tərkisilah edilməsinə dəstək verəcəyi inandırıcı görünmür".
Dəniz NƏSİRLİ
