30/01/2023 03:14
728 x 90

Ermənistan Türkiyənin dostu müsəlman Qətər dövləti ilə bağlı hansı hədəflərə can atır...

Bəhruz Quliyev: “Düşünmürəm ki, Simonyanın şikayətləri bu ərəb ölkəsində ciddiyə alınsın”

img

Ermənistan rəsmilərinin Avropa ölkələrinə Azərbaycandan şikayət etmələri azmış kimi, indi də bizdən ərəb ölkələrinə şikayət edirlər. Belə ki, Ermənistan parlament sədri Alen Simonyan Qətərdə 3 günlük işgüzar səfərində Qətər rəsmilərinə şikayətlənərək, müharibədən sonrakı vəziyyəti və Azərbaycanın Ermənistanın “ərazi bütövlüyünə iddialarını” ətraflı təqdim edib. Qeyd edib ki, baş verənlər dinlə bağlı deyil.

Hiyləgər erməni taksikası. Avropa ölkələrində səfərdə olanda Qarabağ məsələsinə dini don geyindirirlər, müsəlman ölkələrinə səfər edəndə bunun dinlə bağlı olmadığını deyirlər. Digər tərəfdən, Qətər Türkiyə ilə çox yaxın münasibətlərə malikdir. Həm də iki ölkə strateji müttəfiqdir. O baxımdan maraqlıdır, Türkiyə ilə yaxın olan bir ölkədə Ermənistan hansı ümidlə, strategiya ilə işləyir? Bunda hədəf, məqsəd nədən ibarətdir, nəyə nail olmaq istəyir?

  • “Ermənistan istəyir ki, Qətərin Azərbaycana münasibəti mənfi mənada dəyişsin və oradan ölkəmizə qoyulan sərmayə dayansın”

Sözügedən məsələ ilə bağlı fikirlərini “Bakı-Xəbər”lə bölüçən “SƏS” Media Qrupunun rəhbəri, politoloq Bəhruz Quliyevin fikrincə, bununla Ermənistan rəsmiləri, öz təbirlərincə, siyasi biclikdən istifadə edirlər: “Təkcə bu faktın özü sübut edir ki, siyasi məngənədə sıxılıb-qalan Ermənistan xilas olması üçün hətta saman çöpündən də yapışmağa hazırdır. Bu xüsusda ölkə rəsmilərinin son vaxtlar müxtəlif xarici ölkələrə səfər etmələrini göstərmək olar. Yəni xristian klubu ölkələrinə səfərlər edərkən onlar özlərini müsəlman Azərbaycanın təzyiqləri altında “əzilən məzlum və əzabkeş xristianlar” kimi təqdim edir, müsəlman ölkələrinə gedərkən isə tamamilə başqa yöndən danışırlar və bu vasitələrlə diqqət mərkəzində qalmağa cəhd edirlər. Halbuki, Azərbaycanın torpaqları üç onillik boyunca erməni işğalına məruz qaldığı dövrlərdə Qərb ölkələri daha  çox susqunluğa, yaxud ikili standartlardan çıxış etməyə üstünlük verirdilər. Yəni hüquqi beynəlxalq sənədlər müqabilində Ermənistan işğalçı ölkə kimi tanınırdısa, həmin siyasətə qarşı nə sanksiyalar, nə də digər sərt qətnamələr qəbul edilirdi. Təəssüf ki, biz bu gün də bəzi Avropa İttifaqı ölkələrinin həmin mövqelərini müşahidə etməkdəyik. Azərbaycanın faydalı qazıntı yataqlarının qanunsuz istismarının qarşısının alınması istiqamətində ekofəallarımızın aksiya keçirmələri erməni rəsmiləri tərəfindən az qala “Leninqrad blokadası” kimi təqdim olunur. Amma separatçılara və onların Ermənistandakı havadarlarına nədənsə güldən ağır sözlər deyilmir. Bu faktın özü də sübut edir ki, ortada ikili standartlar mövcuddur və bu gün belə standartların Azərbaycanın ədalətli, haqlı tələblərinə heç bir təsiri ola bilməz. Beynəlxalq hüquq rəsmən bizim tərəfimizdədir və erməni rəsmilərinin haralara, necə, hansı məqsədlərlə səfər etmələri onların istədikləri nəticələri verməyəcək”.

B.Quliyev hesab edir ki, A.Simonyanın ərəb ölkələrinə, eləcə də Qətərə gedib Azərbaycan əleyhinə təbliğat aparması uğursuz nəticələnəcək: “Ona görə yox ki, Qətərin istər Azərbaycanla, istərsə də Azərbaycanın strateji müttəfiqi olan Türkiyə ilə kifayət qədər müsbət, sürətlə inkişaf edən münasibətləri var. Ona görə ki, Qətər ərəb ölkələri içində ən nüfuzlu ölkə olaraq tanınır və bu ölkənin beynəlxalq siyasi arenada da uğurlu fəaliyyəti mövcuddur. Qətər heç vaxt Simonyanın timsalındakı “ah-vaylara” ciddi əhəmiyyət verməyəcək. Daha dəqiq desək, Qətər də haqqın, ədalətin, beynəlxalq hüququn məhz Azərbaycanın yanında olduğunu çox gözəl bilir. Bu baxımdan, düşünmürəm ki, Simonyanın şikayətləri bu ərəb ölkəsində ciddiyə alınsın. Ermənistan istəyir ki, Qətərin Azərbaycana münasibəti mənfi mənada dəyişsin və oradan ölkəmizə qoyulan sərmayə dayansın. Yaxşı olardı ki, Ermənistan rəhbərliyi vaxt itirib xarici ölkələrə Azərbaycandan şikayət etmək yerinə, qarşılarında dayanan üçtərəfli bəyanatın bəndlərindəki tələbləri yerinə yetirsinlər. Çünki vaxt daralır və bu xüsusda Prezident İlham Əliyevin ölkə televiziyalarına verdiyi son müsahibəsindəki mühüm bir fikrini xatırlatmaq istərdim. O vurğuladı ki, 2023-cü il Ermənistanın yekun nəticəyə gəlməsi üçün son ildir və erməni rəsmiləri də həmin bəyanatı çox yaxşı dərk edirlər. Lakin təəssüf ki, əsl reallığı anlayaraq nəhayət ağıllı nəticəyə gəlmələri yerinə hələ də hansısa ölkələrdən, təşkilatlardan pənah ummaq səfərləri edirlər. Halbuki, belə səfərlər Ermənistanı daha çıxılmaz vəziyyətə salacaq və məsuliyyəti də həm Paşinyan rəhbərliyi, həm də bu ölkəyə havadarlıq edən bəlli ölkələr, ayrı-ayrı şəxslər daşımalı olacaqlar”.

Politoloq onu da qeyd etdi ki, erməni rəsmiləri boş-boş səfərlər etməkdənsə, müqəddəratlarını düşünsələr daha yaxşı olar.

Vidadi ORDAHALLI

Peşə etikası

Son xəbərlər