Yeganə Hacıyeva: “Azərbaycan özünün haqqı olan məsələni niyə alver predmetinə çevirməlidir?”
Azərbaycanla Ermənistan arasında aparılan danışıqlarla bağlı Rusiya mediası yeni iddialar səsləndirib. Rusiyanın “Kommersant” qəzetində dərc edilən materialda bildirilir ki, Qazaxın işğal altındakı 7 kəndi, həmçinin, sülhməramlıların nəzarət zonasında qalan Qırmızı qəsəbə-Şuşa yolu ilə bağlı Azərbaycan Moskva və İrəvanla danışıqlar aparır.
Danışıqlarda kəndlərin və yolun Azərbaycanın nəzarətinə qaytarılması müzakirə olunur. Nəşr Azərbaycanda saxlanılan əsir və diversantların sayı ilə bağlı da fikir ayrılıqlarının olduğunu yazıb: “Ermənistan Xarici İşlər Nazirliyindəki mənbə Bakıda 200 nəfərin, o cümlədən kimliyi təsdiqlənmiş 72 erməninin olduğunu bildirir. Qalan şəxslər barədə informasiya toplanır”. Bununla belə, qəzetə Azərbaycandan açıqlama verən adı açıqlanmayan mənbə Bakıda 59 erməni milliyyətindən olan diversantın saxlanıldığını söyləyib: “Atəşkəs və Ermənistanın kapitulyasiya aktını imzalaması baş verdi. Ancaq bundan sonra həmin saxlanılan şəxslər Azərbaycana daxil oldu. Onlar diversant və terrorçudur və onları mühakimə edəcəyik”.
Hər halda, Rusiya nəşrinin səsləndirdiyi iddialar reallığa oxşamır. Çünki istər Qazaxın kəndlərinin təhvil verilməsi, istərsə də Şuşa-Qırmızı Bazar yolu mütləq şəkildə bizim nəzarətimizə verilməlidir. Buna bizim haqqımız çatır, çünki öz ərazilərimizdir. Eyni zamanda, Ermənistan bununla bağlı üzərinə öhdəlik götürübsə, biz niyə bu məsələdə alverə getməliyik?
Politoloq Yeganə Hacıyeva “Bakı-Xəbər”ə bildirdi ki, Azərbaycan, Ermənistan və Rusiya liderləri arasında imzalanan bəyanatın 2-ci bəndinə əsasən, Qazax rayonunun işğal edilmiş 7 kəndi də Azərbaycana geri verilməlidir: “Azərbaycana qaytarılmalı olan 7 kənd Sofulu, Bərxudarlı, Bağanis Ayrım, Qızıl Hacılı, Yuxarı Əskipara, Aşağı Əskipara və Xeyrimlidir. Geri alınacaq kəndlərin 3-ü Azərbaycanın Ermənistandakı anklavıdır. Bu anklavlar Sofulu, Bərxudarlı və Yuxarı Əskipara kəndləridir. Belə ki, bu kəndlər işğal olunduqdan sonra Ermənistanın Tavuş vilayətinin ərazisi elan edilmişdi. Qeyd edək ki, hər üç kənd 1992-ci ildən işğal altındadır. Ermənistan həmin kəndlərin Azərbaycana geri qaytarılması ilə bağlı üzərinə öhdəlik götürüb. Rusiya nəşrinin yaydığı məlumat daha çox məqsədli şəkildə dövriyyəyə buraxılan dezinformasiya mahiyyəti daşıyır. Əvvəla, istinad olunan mənbənin adı qeyd edilmir. Digər tərəfdən isə, Azərbaycanın əlində olan diversantların sayı bir neçə dəfə çox göstərilir. Məlumdur ki, Azərbaycan əlində olan diversantların sayını rəsmən bəyan edir. Digər tərəfdən, Azərbaycan özünün haqqı olan məsələni niyə alver predmetinə çevirməlidir?
Qarabağda ən vacib yollardan biri sayılan Qırmızı Bazar-Şuşa yolu ilə də bağlı həqiqəti əks etdirməyən xəbərləri daha çox ermənilər tirajlayır. Bir neçə gün əvvəl Ermənistan KİV-i xəbər verib ki, yol yerli qanunsuz birləşmələrin nəzarətindən alınaraq, Rusiya sülhməramlı missiyasının nəzarəti altına keçib. Beləliklə, yolda hərəkət qrafikini yalnız rusiyalı hərbçilər tənzimləyir. Bununla da, Azərbaycan Ordusunun Xocavənd rayonunun Qırmızı Bazar kəndi ilə Şuşa şəhəri arasındakı yoldan daha intensiv istifadə etməsinə şərait yaranmış olur. Bu, əslində qanuni prosesdir. Sadəcə, ermənilər bundan özləri üçün faciə düzəltmək istəyir. “Kommersant”ın bu məsələni alver predmetinə çevirməsi təsadüfi deyil və daha çox Ermənistandakı seçkinin nəbzinə hesablanmış piardır”.
Məhəmmədəli QƏRİBLİ
