Paşinyan hökuməti 102-ci baza məsələsində də tam ziddiyyətli siyasət ortaya qoydu...
Məhəmməd Əsədullazadə: “Tərəflər arasında ikitıərəfli konfliktələrin davam etməsi gözlənir”
Ermənistan rəhbərliyinin son həftələrdə 102-cu Rusiya bazası barədə ziddiyətli bəyanatları yayılır. Belə ki, gah deyirlər bazaların qalması məsələsinə yenidən baxılsın. Gah da deyirlər ki, Rusiya bazalarının mövcudluğu onların təhlükəsizliyinin tərkib hissəsidir.
Qeyd edək ki, bir müddət əvvəl Ermənistan Müdafiə naziri David Tonoyan Şirak vilayətinin Panik kəndinə səfər etdikdən və Gümrüdəki 102 saylı Rusiya hərbi bazasının komandanlığı ilə görüşdükdən sonra jurnalistlərlə söhbətində bəyan edib ki, Ermənistanda dislokasiya olunmuş rus sərhəd qoşunlarının statusu haqqındakı Ermənistan-Rusiya müqaviləsinin bir sıra müddəalarına yenidən baxılacağını istisna etmir. Ondan sonra Ermənistan rəhbərliyində bazalarla bağlı ziddiyətli fikirlər daha da artmağa başladı. Vəziyyətin mürəkkəbliyini görən Ermənistan rəhbərliyi bəyan etdi ki, bazaların qalması vacibdir. Ancaq görünən odur ki, Paşinyan komandasında bununla bağlı birmənalı rəy yoxdur.
Ümumiyyətlə, Rusiyanın Ermənistanda hərbi iştirakı mövzusu, xüsusilə son illərdə, dövri olaraq ictimai-siyasi müzakirələrin gündəliyinə çıxır. Buna ilk növbədə çox vaxt cəzasız qalan – ən dəhşətli təzahürü Permyakov tərəfindən Avetisyan ailəsinin üzvlərinin qətl edilməsidir – Gümrüdəki hərbi bazanın hərbçilərinin davranışı şərait yaradır. Bu və çoxsaylı digər hadisələr erməni cəmiyyətini, hərbi bazanın varlığının məqsədəuyğunluğu haqqında olmasa da, heç olmasa, bu bazanın fəaliyyəti üzərində nəzarət qaydalarının sərtləşdirilməsi barədə məsələ qaldırmaq haqqında düşünməyə məcbur edir. Müzakirələrdə həmişə o məsələ də qeyd olunur ki, öz hərbi bazasının varlığına görə Rusiya Ermənistana bir qəpik də ödəmir, bundan başqa, müxtəlif məlumatlara görə, hətta bazanın məişət, kommunal xərclərini də erməni tərəfi qapadır.
Bütün hallarda, Rusiya bazaları ilə bağlı Ermənistan rəhbərliyinin ziddiyətli fikirlərini ekspertlər necə şərh edir?
Məsələyə münasibət bildirən politoloq Məhəmməd Əsədullazadə buna bir neçə kontekstdən yanaşdı: “Ermənistanda fəaliyyət göstərən Rusiyanın 102-ci hərbi bazası ətrafında siyasi proseslərin və diskussiyaların davam etməsi əsasən Nikol Paşinyanın bu bazanın ölkə ərazisində fəaliyyətinə xitam verməyinə hesablanıb. Qeyd edim ki, Rusiya hərbi bazası vasitəsilə Ermənistanda öz hərbi mövcudluğunu qorumaqla, bu ölkədə təsir gücünü saxlamağa hesablayıb. Ermənistanda Rusiyaya bağlı Sarkisyan rejimi devrildikdən sonra Qərbpərəst Nikol Paşinyanın hakimiyyətə gəlişilə, təbii ki, Rusiya üçün müəyyən demarşların olacağı gözlənilən idi. Çünki Qərbin əsas planı Nikol Paşinyanın əli ilə Ermənistandan Rusiya hərbi bazasını çıxarmaqla Kremlin bu ölkədə siyasi varlığına zərbə vurmaqdır. Paşinyanın həyata keçirdiyi siyasət buna hesablanıb və hesab edirəm ki, ikitıərəfli konfliktələrin davam etməsi gözlənir. Burada Nikol Paşinyan öz təhlükəsizlikləri naminə Rusiya bazalarının önəmini vurğulasa da, Qərbin əsas tələbi Ermənistanda məhz Rusiya izinin silinməsidir. Bu gün Ermənistanda Rusiyaya bağlı klana qarşı həbslər də elə bu plana uyğun aparılır. Rusiya, öz növbəsində, 102-ci bazanın çıxarılması ilə bağlı çağırışlara ciddi müqavimət göstərəcək. Panik kəndində rus hərbçilərinin atəş açması məhz İrəvana mesaj idi. Nikol Paşinyan Qərb və Moskva arasında var-gəl edir. Qərb tərəfi ciddi şəkildə Paşinyana təzyiqlər edir. Hesab edirəm, Rusiya Paşinayana qarşı plan hazırlayır. Moskva Ermənistandan çıxarsa, Paşinyana bədəl ödətdirəcək. Rusiya Ermənistanı hörümçək toru kimi sarıb. Bir növ Rusiya Ermənistan üçün xərçəng xəstəliyidir və bütün bədənə yayılıb. Bunun qoparılması çətin və ağrılı olacaq”.
Vidadi ORDAHALLI
